កន្សែងជូតខ្លួន គឺជារបស់ប្រើប្រាស់ផ្ទាល់ខ្លួនរបស់មនុស្សម្នាក់ៗ និងពុំគួរប្រើលាយឡំជាមួយអ្នកដទៃ ។ តាមការស្រាវជ្រាវរបស់អ្នកជំនាញសុខភាពសហរដ្ឋអាមេរិកបញ្ជាក់ថា ក្រៅពីការហាមប្រើប្រាស់កន្សែងជូតខ្លួនជាមួយអ្នកដទៃ គឺយើងពុំគួរដាក់វានៅកន្លែងទាំង៤នេះដាច់ខាត ពីព្រោះការទុកនៅកន្លែងទាំងនេះនឹងបណ្តាលឱ្យកើតជំងឺ ។
១-ផ្ទះបាយ ៖ អ្នកជំនាញសុខភាពសហរដ្ឋអាមេរិកលើកឡើងថា ក្រោយប្រើប្រាស់កន្សែងជូតខ្លួនរួច គួរតែហាលនៅក្រោមកំដៅថ្ងៃឱ្យងាប់មេរោគ ប៉ុន្តែពុំគួរព្យួរ ឬទុកវាក្នុងផ្ទះបាយទេ ពីព្រោះជាកន្លែងចម្អិនអាហារ សម្បូរខ្លាញ់ និងផ្សែង ។ បើទោះជាផ្ទះបាយជាច្រើនបានដាក់ឧបករណ៍ស្រូបផ្សែងក្តី ប៉ុន្តែក្លិនអាហារ និងខ្លាញ់នៅតែសាយភាយពេញបរិវេណផ្ទះបាយ រួមទាំងកន្សែង ។
ក្រៅពីនេះ កន្សែងជូតខ្លួន គឺជាកន្លែងប្រមូលផ្តុំមេរោគ និងងាយស្រូបក្លិនអាហារ ។ ការយកកន្សែងព្យួរក្នុងផ្ទះបាយមកជូតដៃ ឬមុខ វានឹងកាន់តែធ្វើឱ្យកខ្វក់ខ្លាំងថែមទៀត មេរោគនឹងចូលក្នុងស្បែកបណ្តាលឱ្យរមាស់ស្បែក និងប៉ះពាល់សុខភាព ។
២-បន្ទប់ទឹក ៖ មនុស្សច្រើនណាស់និយមព្យួរកន្សែងជូតខ្លួនក្នុងបន្ទប់ទឹក ប៉ុន្តែអ្នកជំនាញប្រាប់ថា វាជាកន្លែងមានសំណើមខ្លាំងបំផុតក្នុងផ្ទះ ។ ការព្យួរកន្សែងក្នុងបន្ទប់ទឹក នឹងធ្វើឱ្យកន្សែងប្រមូលផ្តុំមេរោគ និងធុំក្លិន ហើយការប្រើប្រាស់កន្សែងក្នុងបន្ទប់ទឹក អាចបណ្តាលឱ្យកើតមុនលើមុខ និងជំងឺផ្សេងៗពិបាកព្យាបាល ។
៣-ព្យួរក្បែរកន្លែងបន្ទោរបង់ ៖ កន្លែងមួយទៀតដែលអ្នកជំនាញហាមឃាត់ គឺការព្យួរកន្សែងនៅក្បែរចានបង្គន់ ជាពិសេស គេបានឃើញញឹកញាប់នៅតាមសណ្ឋាគារ និងមន្ទីរពេទ្យ ។ អ្នកជំនាញនិយាយថា ពេលយើងចុចទឹកបង្គន់ក្រោយបន្ទោរបង់រួច មេរោគផ្សេងៗនឹងសាយភាយឡើងលើ និងជាប់ជាមួយកន្សែង ហើយការប្រើប្រាស់កន្សែងនេះនឹងធ្វើឱ្យមេរោគចូលក្នុងខ្លួន និងប៉ះពាល់សុខភាពយ៉ាងខ្លាំង ។
៤-ដាក់ក្នុងចានដែក ៖ ការទុកកន្សែងជូតខ្លួនក្នុងចានដែកបោកសម្លៀកបំពាក់ ឬឡាបូលាងមុខ ត្រូវបានចាត់ទុកថា គឺជាកន្លែងកខ្វក់យ៉ាងខ្លាំង ។ កន្សែងនឹងប្រមូលផ្តុំមេរោគ មានក្លិនមិនល្អ ហើយបណ្តាលឱ្យកើតជំងឺស្បែក និងជំងឺផ្លូវដង្ហើម ៕
