ទិន្នផលត្រីប្រហុកនៅតាមដាយ ក្នុងដើមឆ្នាំ២០២៥នេះ មានការកើនឡើងខ្ពស់ ប្រមាណ ១០ភាគរយ តែតម្លៃហាក់ធ្លាក់ទាបជាឆ្នាំមុនបន្តិច។
តម្លៃត្រី ត្រូវបានឈ្មួញចុះមកទិញដល់កន្លែងក្នុងតម្លៃចន្លោះពី ៥០០រៀលដល់៨០០រៀល ក្នុងមួយគីឡូ លើកលែងតែត្រូវធំៗបន្តិចទើបអាចលក់បាន១០០០រៀល។
ដោយឡែក ត្រីដែលកាត់សម្អាតរួច អាចលក់បានថ្លៃក្នុងតម្លៃ ៧០០០រៀល ទៅ ៨០០០រៀល ក្នុងមួយគីឡូក្រាម។
បើតាមឯកឧត្តម ឌិត ទីណា រដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ បានមានប្រសាសន៍ថា៖”ឆ្នាំនេះ ការនេសាទរបស់យើងទទួលបានផលច្រើនជាង១០ភាគរយ បើធៀបទៅឆ្នាំមុន ដោយសមិទ្ធផលនេះមិនមែនកើតឡើងដោយចៃដន្យទេ គឺជាកិច្ចខិតខំប្រឹងប្រែងក្នុងការគ្រប់គ្រង ក៏ដូចជាប្រជានេសាទមួយចំនួនយល់ដឹងបានច្បាស់ពីការនេសាទនេះ”។
គួរបញ្ជាក់ថា នៅក្នុងឆ្នាំ២០២៤ កម្ពុជា ប្រមូលផលនេសាទនិងវារីវប្បកម្ម បានចំនួន ៩២៦ ៩៣៤តោន ក្នុងនោះផលនេសាទទឹកសាប មាន៤៦៧ ៣៤៤តោន ផលនេសាទសមុទ្រ ១៣៩ ៣១០ តោន និងផលវារីវប្បកម្ម ៣២០ ២៨០តោន៕
