សហរដ្ឋអាមេរិក ៖ សារព័ត៌មានបរទេសរាយការណ៍ថា ការសាកល្បងបង្ហោះយានអវកាស Starship របស់ក្រុមហ៊ុន SpaceX ដែលលោក Elon Musk ជាស្ថាបនិក កាលពីខែតុលា ឆ្នាំ២០២៤ គឺជាព្រឹត្តិការណ៍ដ៏សំខាន់នៅលើពិភពលោក ។ វាបង្ហាញពីភាពរីកចម្រើនរបស់បច្ចេកវិទ្យានាពេលបច្ចុប្បន្ន និងថ្ងៃអនាគត ។
ក្រុមហ៊ុន SpaceX លើកឡើងថា នេះជាភាពជោគជ័យដ៏ធំដែលក្រុមហ៊ុនសម្រេចបាននៅឆ្នាំ២០២៤ ហើយវាបង្ហាញពីជោគជ័យនាថ្ងៃអនាគត ។ ក្រុមហ៊ុនរំពឹងថា នឹងធ្វើការសាកល្បងបង្ហោះយានអវកាស Starship រហូតដល់ជាង៤០០លើកក្នុងរយៈពេល៤ឆ្នាំមុខ ដើម្បីឱ្យការធ្វើដំណើរទៅអវកាសបានជោគជ័យ ។.png)
ប៉ុន្តែការសាកល្បងបង្ហោះយានអវកាសរបស់ក្រុមហ៊ុននេះ នឹងបង្កគ្រោះថ្នាក់ដល់ជីវិតសត្វស្លា ឬប៉ះពាល់ដល់តំបន់នៅក្បែរនោះ ។ អ្នកស្រាវជ្រាវនិយាយថា គ្រឿងម៉ាស៊ីនចំនួន៣៣ របស់យានអវកាស Starship មានកម្រិតសំឡេងរំខាន ចាប់ពី១០៥ឌីស៊ីបែល ទៅ១២៥ឌីស៊ីបែល ក្នុងអំឡុងពេលវាហោះឡើង និងចុះចត ។
ចំណែកអាជ្ញាធរទីក្រុង Port Isabel ដែលស្ថិតនៅជិតរដ្ឋតិចសាស់ ឱ្យដឹងថា កម្រិតសំឡេងរំខានខ្ពស់ ស្មើនឹង១៤៤.៦ឌីស៊ីបែលរបស់យានអវកាស បានធ្វើឱ្យប៉ះពាល់ដល់អគារ ឬអគារបែកបាក់ ។ ក្រៅពីនេះ វាបានប៉ះពាល់ដល់សត្វព្រៃ ដែលរស់នៅក្បែរបរិវេណបង្ហោះយានអវកាសផងដែរ ដូចជា ៖ ប៉ះពាល់ពងសត្វស្លាបក្នុងសំបុក ហើយអាជ្ញាធរទីក្រុងនេះស្នើឱ្យ Federal Aviation Administration (FAA) ដោះស្រាយបញ្ហាសំឡេងរំខាន ដើម្បីសង្គ្រោះដល់ជីវិតសត្វស្លាប ។
គួរបញ្ជាក់ថា កាលពីថ្ងៃទី១៣ ខែតុលា ឆ្នាំ២០២៤ ក្រុមហ៊ុន SpaceX របស់លោក Elon Musk បានបង្ហោះយានអវកាស Starship នៅសហរដ្ឋអាមេរិក ក្នុងគោលបំណងសាកល្បងប្រព័ន្ធផ្សេងៗដែលចាំបាច់ដល់ដំណើរការយានអវកាស ៕
