អ្នកគាំទ្រកម្ពុជាបានសម្តែងការខកចិត្តចំពោះកម្មវិធីប្រកួតសម្រស់ Miss International នៅតែមើលមិនឃើញពីសមត្ថភាពរបស់បេក្ខនារីកម្ពុជាមិនអាចចូល TOP ក្នុងកម្មវិធីនេះបាន។ សមត្ថភាពរបស់ ឡូយ ចាន់រស្មី ទាំងភាសា ចំណេះដឹង សម្រស់ដ៏ស្រស់សោភា នៅតែត្រូវបានមើលរំលង។ ភាពខកចិត្តបណ្តាលឱ្យហ្វេនៗលើកឡើងថាមិនដឹងត្រូវរកបេក្ខភាពតំណាងប្រទេសបែបណានោះទេទើបកម្មវិធីពេញចិត្ត។
កាលពីល្ងាចថ្ងៃទី១២ វិច្ឆិកា កម្មវិធី Miss International 2024 លើកទី៦២ ដែលរៀបចំនៅទីក្រុងតូក្យូ ប្រទេសជប៉ុនបានរកឃើញម្ចាស់មកុដហើយបានទៅលើប្រទេសវៀតណាមដោយបានយកឈ្នះបេក្ខភាព៧០នាក់ផ្សេងទៀត។ លំដាប់រងទី១ បានទៅប្រទេស Bolivia លំដាប់រងទី២ អេស្ប៉ាញ លំដាប់រងទី៣ វេណេស៊ុយអេឡា និងលំដាប់រងទី៤គឺឥណ្ឌូនេ ស៊ី។ 
ការប្រកួតកម្មវិធីនេះ កញ្ញា ឡូយ ចាន់រស្មី ជាអ្នកតំណាងកម្ពុជា ហើយក៏សោកស្តាយដែលត្រូវរងបរាជ័យមិនអាចចូល TOP នៅក្នុងការប្រកួតនេះបានឡើយ។ អ្នកគាំទ្រជាច្រើនបានសម្តែងការខកចិត្តចំពោះកម្មវិធីនេះ ព្រោះម្តងហើយម្តងទៀតនៅតែមិនឃើញសមត្ថភាពរបស់ខាងបេក្ខនារីតំណាងកម្ពុជា។ Miss Cambodia 2024 ឡូយ ចាន់រស្មី គឺជាបវរកញ្ញាខ្មែរមួយរូបជាអ្នកសផ្សព្វផ្សាយមាតិកា ជាអ្នកឌីហ្សាញសំលៀកបំពាក់ ជានិស្សិតផ្នែកទំនាក់ទំនងអន្តរជាតិ ធ្វើការនៅប្រទេសឥណ្ឌូនេស៊ី ប្រើប្រាស់បានរហូតដល់៤ភាសានៅតែមិនអាចចូលTOPបាន។
អ្នកគាំទ្រក៏ឃើញពីសក្កានុពលការខិតខំប្រឹងប្រែងរបស់ ឡូយ ចាន់រស្មី ក្នុងការប្រកួត Miss International 2024 នាងពិតជាប្រឹងប្រែងអស់ពីសមត្ថភាពពិតមែនប៉ុន្តែនៅតែមិនអាចចូលTOP អាចឱ្យគេប្រកាសឈ្មោះ Cambodia នៅលើឆាកអន្តរជាតិមួយនេះបាន។ អ្នកគាំទ្រខ្លះក៏ខកចិត្តខ្លាំងរហូតពោលថាតើកម្ពុជាគួរជ្រើសរើសបេក្ខភាពបែបណាទើបស័ក្តិសមឱ្យកម្មវិធីនេះមើលឃើញពីប្រទេសកម្ពុជាបានខ្លះ។
ក្នុងថ្ងៃផ្តាច់ព្រ័ត្រ កញ្ញា សំណាង អេលីណា Miss Cambodia 2023 និងលោក ម៉ែន និមលរ័ត្ន ក៏បានទៅចូលរួមលើកទឹកចិត្ត ឡូយ ចាន់រស្មីផងដែរ។
គេចាំបានថាកាលពីឆ្នាំមុនការប្រកួត Miss International 2023 ដែល សំណាង អេលីណា ជាអ្នកតំណាងកម្ពុជាខាងកម្មវិធីបានប្រកាសនៅលើឆាកតែTOP15 ខណៈរូបនាងបានជាប់ TOP16 នៅពេលឆ្នាំនេះខាងកម្មវិធីប្រកាស TOP20 លើឆាកតែត្រូវមកខកចិត្តម្តងទៀតព្រោះតែមិនអាចចូល TOP បាន៕
