ប្រាសាទ ដាវីន អួលដើមកក្រោយឃើញប្រជាជនកម្ពុជាសាមគ្គីគ្នាជួយបោះឆ្នោតដើម្បីទទួលបានពានមាស

ពិធីករ ជា វណ្ណារិទ្ធ ជាសិល្បករដុតដៃដុតជើងខ្លាំងជាងគេក្នុងការជួយជ្រោមជ្រែងការបោះឆ្នោតឱ្យ ប្រាសាទ ដាវីន បវរកញ្ញាចក្រវាលកម្ពុជាឆ្នាំ២០២៤ ដើម្បីមានឱកាសឈ្នះពានមាសឬប្រាក់។ កម្លាំងនៃការសាមគ្គីគ្នារបស់ប្រជាជនកម្ពុជាបានធ្វើឱ្យអ្នកតំណាងកម្ពុជា ប្រាសាទ ដាវីន ក្តុកក្តួលចិត្តយ៉ាងខ្លាំងនិយាយទាំងអួលដើមកអរគុណប្រជាជនកម្ពុជា។

លោក ជា វណ្ណារិទ្ធ បានបង្ហោះវីដេអូនាវេលាម៉ោង២ទៀបភ្លឺឈានចូលថ្ងៃទី១១ វិច្ឆិកា ឆ្នាំ២០២៤ ពីអ្នកនាង ប្រាសាទ ដាវីន ដោយពិធីកររូបនេះថាលោកមើលហើយរំភើបគេងលែងលក់។ ក្នុងវីដេអូនេះ Miss Universe Cambodia 2024 បាននិយាយថារយៈពេលមកនេះបងប្អូនទាំងអស់គ្នាតស៊ូប្រឹងប្រែងដើម្បី Vote ឱ្យ Cambodia ក៏ដូចជារូបនាងផ្ទាល់ នាងពិតជារំភើបមែនទែនគ្មានពាក្យអ្វីក្រៅពីពាក្យថាអរគុណសម្រាប់ទឹកចិត្តមួយនេះ។

ប្រាសាទ ដាវីន និយាយទាំងអួលដើមកថា ការសាមគ្គីភាពមួយនេះគឺពិតជាអស្ចារ្យមែនទែននាងមិននឹកស្មាននោះទេ។ និយាយបណ្តើរហូរទឹកភ្នែកបណ្តើរ ប្រាសាទ ដាវីន បានពោលអរគុណទៅកាន់ពិធីករ ជា វណ្ណារិទ្ធ ដែលបានជួយ។ ប្រាសាទ ដាវីន ថាការសាមគ្គីនេះជាពេលវេលាមួយដែលបង្ហាញទៅដល់ពិភពលោកថាមានភាពសាមគ្គីមិនចាញ់គេនោះទេ។

នៅព្រឹកថ្ងៃទី១១ ខែវិច្ឆិកា ការបោះឆ្នោត Voice for Change សម្រាប់ ប្រាសាទ ដាវីន Miss Universe Cambodia 2024 ស្ថិតនៅចំណាត់ថ្នាក់TOP1 បណ្តោះអាសន្ន។ ការបោះឆ្នោតនេះ នឹងជួយឱ្យកម្ពុជាអាចទទួលបានជ័យលាភីពានមាស និងប្រាក់ ក្នុងចំណោមប្រទេសទាំង១០ សម្រាប់ការងារសប្បុរសសម្រាប់ការអភិវឌ្ឍប្រកបដោយចីរភាព។ TOP3 នឹងទទួលបានពានមាស ចំណែកទៅTOP7 នឹងទទួលបានពានប្រាក់។

ប្រាសាទ ដាវីន Miss Universe Cambodia 2024 បានបង្ហាញសកម្មភាពលេចធ្លោជាច្រើននៅក្នុងការប្រកួត Miss Universe 2024 លើកទី៧៣ នៅ Mexico ដែលមានបេក្ខភាពសរុបរហូតដល់ទៅជាង១០០នាក់។ ប្រាសាទ ដាវីន ក៏បានឈ្នះ Best Make up ជាមួយនឹងបេក្ខភាព១៩នាក់ផ្សេងទៀតដែលទទួលបានគ្រឿង Make up ប្រ៊េនរបស់កម្មវិធីនេះផ្ទាល់ដែលគិតជាទឹកប្រាក់គឺចំនួន៣០០០ដុល្លារ។

វគ្គផ្តាច់ព្រ័ត្រ Miss Universe 2024 លើកទី៧៣នេះនឹងប្រព្រឹត្តិទៅនៅយប់ថ្ងៃទី១៦ វិចិ្ឆកា ម៉ោងនៅ Mexico ត្រូវនឹងព្រឹកថ្ងៃទី១៧ ខែវិច្ឆិកា ឆ្នាំ២០២៤៕