នាវេលាម៉ោង០៤និង៣០នាទីរសៀលថ្ងៃទី១៨ ខែតុលា ឆ្នាំ២០២៤ មានភ្លៀងធ្លាក់មួយមេធំ នៅខេត្តចន្ទបុរី ប្រទេសថៃជាប់នឹងព្រំប្រទល់ខេត្តប៉ៃលិន បណ្ដាលឱ្យជន់លិចច្រកទ្វារអន្តរជាតិព្រំ និងហូរលិចទាំងផ្ទះប្រជាពលរដ្ឋជាង១០០គ្រួសារ នៅក្នុងខេត្តប៉ៃលិន។
ជំនន់ទឹកភ្លៀងនេះ បានកើតឡើងត្រង់ចំណុចលូដាច់ ភូមិផ្សារព្រំត្បូង ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានធ្វើឱ្យខូចខាតហេដ្ឋារចនាសម្ព័ន្ធជាខ្លាំង ដោយប្រជាជនខ្លះបង្ខំចិត្តឡើងទៅដំបូលផ្ទះ ដើម្បីស្វែងរកសុវត្ថិភាព។
បន្ទាប់ពីកើតហេតុភ្លាមៗ អាជ្ញាធរស្រុកសាលាក្រៅ បានចុះអន្តរគមន៍ជួយសង្គ្រោះប្រជាពលរដ្ឋ ដោយក្នុងនោះក៏មានការសហការជាមួយកម្លាំងប្រដាប់អាវុធ ព្រមទាំងអាជ្ញាធរមូលដ្ឋានផងដែរ។
.png)
គិតត្រឹមម៉ោង១២៖៤៧យប់ ឈានចូលថ្ងៃទី១៩ ខែតុលា ឆ្នាំ២០២៤ ជំនន់ទឹកភ្លៀងធ្លាក់ពីភ្នំជន់លិចច្រកព្រំដែនអន្តរជាតិ បានស្រកអស់វិលត្រឡប់មកសភាពធម្មតាវិញហើយ ខណៈដែលពលរដ្ឋមួយចំនួនក៏ត្រឡប់មកលំនៅឋានរបស់ខ្លួនវិញផងដែរ៕
