មានឆ្នាំមួយនោះ! ការប្រឡងបាក់ឌុបមានបេក្ខជនប្រឡងតែ៨២នាក់

ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤-២០២៥ នឹងចាប់ផ្តើមនាថ្ងៃទី៨ ខែតុលានេះ ក្រោយពីបេក្ខជន បានសម្រាកក្នុងឱកាសបុណ្យភ្ជុំបិណ្ឌ។

នាឆ្នាំនេះ បេក្ខជនប្រឡងសរុបចំនួនជាង១៣ម៉ឺននាក់ ដោយក្នុងនោះបេក្ខជនប្រឡងថ្នាក់វិទ្យាសាស្ត្រពិតមានចំនួនជិត៤ម៉ឺននាក់ ខណៈថ្នាក់វិទ្យាសាស្ត្រសង្គមវិញមានចំនួនជាង៩ម៉ឺន៧ពាន់នាក់។

បើត្រឡប់ទៅរំលឹកអតីកាលវិញ នា​ឆ្នាំ ១៩៧៩ ក្រោយប្រទេស​កម្ពុជា​ចេញផុតពីរបបប៉ុលពត​ ពោការប្រឡង​សញ្ញាបត្រ​មធ្យម​សិក្សា​ទុតិយភូមិ​​ (បាក់ឌុប) ឆ្នាំ ១៩៨០ មានបេក្ខជនត្រមតែ ៨២ នាក់​ប៉ុណ្ណោះ។ ក្នុង​ចំណោម​សិស្ស ៨២ នាក់ អ្នក​​ជាប់​មាន​ចំនួន ៧២ នាក់ ស្មើអត្រា ៨៧.៨០%។

លុះដល់ឆ្នាំក្រោយៗមក បេក្ខជនប្រឡងមានការកើនឡើងជាបន្តបន្ទាប់ ជាក់ស្តែងដូចនៅឆ្នាំ១៩៨១ មាន១១២នាក់ និងមកទល់បច្ចុប្បន្នមានប្រមាណជាធម្យម៨មុឺនទៅ៩មុឺននាក់។

គួរបញ្ចាក់ផងដែរថា មុននឹងឈានដល់ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៤-២០២៥ មន្ត្រីនាំពាក្យក្រសួងអប់រំ យុវជន និងកីឡា បានស្នើ និងព្រមានដាច់ខាតដល់បេក្ខជន ដែលមានបំណងចង់ជួលនរណាម្នាក់ ដើម្បីមកប្រឡងជំនួស។

លើសពីនេះទៅទៀត ដើម្បីឱ្យការប្រឡងអនុវត្តទៅតាមគោលការណ៍ ក្រសួងអប់រំបានសហការជាមួយអង្គភាពប្រឆាំងអំពើពុករលួយ(ACU) សហភាពសហព័ន្ធយុវជនកម្ពុជា(ស.ស.យ. ក.) និងអប្បមាទប្រមាណ៣ពាន់នាក់ ក្នុងគោលបំណងដើម្បីអនុវត្តដំណើរការប្រឡងឱ្យមានប្រសិទ្ធភាព និង ស្របតាមគោលការណ៍ “អ្នកចេះគឺជាប់”៕