ចូលចិត្តដើរលេងក្រៅប្រទេសមែនទេ ! ត្រូវដឹងពីគន្លឹះខាងក្រោមនេះដើម្បីទិញសំបុត្រយន្តហោះក្នុងតម្លៃទាបបំផុតនឹកស្មានមិនដល់

ការដើរលេងទៅក្រៅប្រទេសជាធម្មតាយើងតែងចំណាយលុយច្រើនទៅលើការទិញសំបុត្រយន្តហោះ ព្រោះតម្លៃជើងហោះហើរបានផ្លាស់ប្តូរឥតឈប់ឈរ ជាហេតុធ្វើឱ្យលោកអ្នកខាតបង់ប្រាក់ច្រើន ជាពិសេសនៅពេលដែលយើងមានគម្រោងចេញចូលក្រៅប្រទេសញឹញាប់។ ទោះជាយ៉ាងណាប្រសិនបើលោកអ្នកដឹងពីគន្លឹះទាំងនេះហើយ ធានាថាការទិញសំបុត្រយន្តហោះគឺមានតម្លៃទាបជាងមុន។

១.ធ្វើការកក់ទុកនៅថ្ងៃអង្គារ និងថ្ងៃពុធ៖ ថ្ងៃអង្គារ និងថ្ងៃពុធ គឺជាថ្ងៃដ៏ល្អបំផុតក្នុងការទិញសំបុត្រយន្តហោះ។ ក្រុមហ៊ុនអាកាសចរណ៍ភាគច្រើនតែងតែរៀបចំប្រព័ន្ធកក់របស់ពួកគេនៅថ្ងៃអង្គារ វេលាម៉ោង ៧:០០ យប់ ដោយសារតែក្រុមហ៊ុនអាកាសចរណ៍ដឹងថាអ្នកដំណើរភាគច្រើននឹងគ្មានពេលកក់សំបុត្រនៅថ្ងៃនេះទេ។ យោងតាមស្ថិតិ បានឱ្យដឹងថា មនុស្សភាគច្រើនរកមើលតែតម្លៃសំបុត្រនៅថ្ងៃសុក្រ សៅរ៍ និងថ្ងៃអាទិត្យប៉ុណ្ណោះ ដែលជាថ្ងៃសំបុត្រឡើងថ្លៃ។

២.កក់មុនរយៈពេលយូរ៖ ដោយផ្អែកលើបទពិសោធន៍ អ្នកគួរតែកក់សំបុត្រយ៉ាងហោចណាស់ ២១ ថ្ងៃមុនកាលបរិច្ឆេទធ្វើដំណើររបស់អ្នក។ ដោយសារក្រុមហ៊ុនអាកាសចរណ៍ភាគច្រើនបានរៀបចំប្រព័ន្ធរបស់ពួកគេដើម្បីសម្រេចបានការលក់សំបុត្រឱ្យបានច្រើនតាមដែលអាចធ្វើទៅបាន។ ជាឧទាហរណ៍ នៅក្នុងប្រព័ន្ធវាត្រូវបានកំណត់ថាសម្រាប់ជើងហោះហើរពី Kuala Lumpur ទៅ London មានតែអ្នកដំណើរ ២០ នាក់ដំបូងប៉ុណ្ណោះនឹងទទួលបានតម្លៃទាបបំផុត។ ហើយអ្នកដំណើរ ២០០ នាក់បន្ទាប់នឹងទទួលបានតម្លៃមធ្យម ហើយនៅសល់អាចមានតម្លៃថ្លៃជាង។ សរុបមក ប្រព័ន្ធរបស់ក្រុមហ៊ុនអាកាសចរណ៍នឹងកំណត់តម្លៃសំបុត្រដោយផ្អែកលើរឹមដែលពួកគេចង់បាននៅពេលហោះហើរពី Kuala Lumpur ទៅទីក្រុងឡុងដ៍។

៣.ថ្ងៃហោះហើរសមស្រប៖ ព្យាយាមកក់សំបុត្រដើម្បីហោះហើរនៅថ្ងៃអង្គារ ឬថ្ងៃពុធ។ ក្រុមហ៊ុនអាកាសចរណ៍ភាគច្រើនកំណត់ពីរថ្ងៃនេះជា ‘ថ្ងៃរវល់តិចជាងគេ’ សម្រាប់ប្រព័ន្ធកក់។ អាកាសយានដ្ឋានក៏ជាធម្មតាមិនសូវមមាញឹកដែរក្នុងពីរថ្ងៃនេះបើធៀបនឹងថ្ងៃសុក្ររហូតដល់ថ្ងៃអាទិត្យដែលប្រព័ន្ធកក់សំបុត្រនិងអាកាសយានដ្ឋានរវល់ខ្លាំង។

៤.ស្វែងរកឱកាសល្អសម្រាប់ទិញគឺ Best deal ៖ ក្រុមហ៊ុនអាកាសចរណ៍ភាគច្រើននឹងផ្តល់ឱកាសល្អៗដល់អតិថិជនរបស់ខ្លួនប្រហែល ១១ ទៅ ១២ សប្តាហ៍ជាមុនសម្រាប់ជើងហោះហើរអន្តរជាតិ ដែលគេហៅថាជាឱកាស Best deal។ ដូច្នេះអ្នកត្រូវពិនិត្យតម្លៃសំបុត្រឱ្យបានទៀងទាត់ក្នុងអំឡុងពេលនេះហើយនឹងចាប់យកឱកាសដើម្បីទិញឱ្យទាន់ពេលក្រុមហ៊ុនបញ្ចុះតម្លៃ។

៥.ជ្រើសរើសចុះចតនៅព្រលានយន្តហោះតូចៗ៖ ជាទូទៅមនុស្សតែងតែធ្វើការចុះចតនៅព្រលានយន្តហោះធំៗ។ ឧទាហរណ៍ ប្រសិនបើអ្នកចង់ទៅទីក្រុងឡុងដ៍ មនុស្សជាច្រើននឹងជ្រើសរើសចុះចតនៅ Heathrow ដូច្នេះកុំឱ្យអស់លុយច្រើនអ្នកគួរចុះចតនៅអាកាសយានដ្ឋាន ‘តូចជាងនេះ’ ដូចជាព្រលានយន្តហោះនៅទីក្រុង Manchester ជាដើម។ បន្ទាប់ពីចុះចតនៅ Manchester អ្នកអាចជិះរថភ្លើងទៅទីក្រុងឡុងដ៍យ៉ាងមានសុវត្ថិភាព។

៦. Clear ‘Cookies’៖ ប្រសិនបើអ្នកបានចូលមើលគេហទំព័ររបស់ក្រុមហ៊ុនអាកាសចរណ៍ច្រើនដង ត្រូវតែ Clear ‘Cookies’ នៅលើកុំព្យូទ័រយួរដៃ និងស្មាតហ្វូនរបស់អ្នកឱ្យអស់ ដើម្បីកុំឱ្យគេដឹងថាយើងចូលមើលតម្លៃយន្តហោះញឹកញាប់។ នេះគឺដោយសារតែតាមរយៈការមើលខូគីទាំងនេះ ប្រព័ន្ធកក់របស់ក្រុមហ៊ុនអាកាសចរណ៍នឹងសន្មត់ថាអ្នកបានចូលមើលគេហទំព័ររបស់ពួកគេម្តងហើយម្តងទៀត។ ដូច្នេះ ប្រព័ន្ធកក់នឹងកំណត់តម្លៃដូចគ្នា ទោះបីជាអ្នកបានចូលមើលគេហទំព័រច្រើនដងក៏ដោយ ហើយពេលខ្លះតម្លៃក៏អាចឡើងជាងមុនផងដែរ។ ដូច្នេះសូមអនុវត្តទម្លាប់នៃការ Clear ‘Cookies’ នៅលើកម្មវិធីរុករកអ៊ីនធឺណិតរបស់អ្នក។

៧.កុំផ្តោតលើគេហទំព័រតែមួយ៖ ប្រសិនបើអ្នកពិតជាមានគម្រោងដើរលេងក្រៅប្រទេសមែន ចូលប្រៀបធៀបតម្លៃនៅគេហទំព័រឱ្យបានច្រើន ព្រោះតម្លៃសំបុត្រយន្តហោះនីមួយៗអាចនឹងខុសៗគ្នា។ ដូច្នេះចូលអ្នកស្វែងរកកម្មវិធីធ្វើដំណើរតាម Skyscanner, CheapFlight, Momondo, Kayak, Google Flight និង Ita Software៕