អ្នកគាំទ្របានបង្ហាញអារម្មណ៍រំភើបចិត្តជាខ្លាំងជាមួយនឹងការរំពឹងទុកថា វណ្ណដា វណ្ណថាន និង នរិទ្ធ នឹងមានអ្វីថ្មីជូនអ្នកគាំទ្របន្ទាប់ពីមានវីដេអូបង្ហាញសកម្មភាពពួកគេកំពុងចម្អិនបទថ្មី។ បន្ទាប់ពី វណ្ណដា ស្ងប់ស្ងាត់មួយរយៈនាថ្ងៃទី២៩ ខែកញ្ញា នេះលោកនឹងមានមុខបទថ្មីជាមួយ ហ្សេដេស ម្ចាស់បទ «ក្រឡុក» ផងដែរ។
ថ្មីៗនេះគណនីបណ្តាញសង្គម ម៉ាន់ វណ្ណដា បានបង្ហាញសកម្មភាពជាវីដេអូស្ថិតក្នុងបរិយាកាសដ៏សែនល្អនៅតាមខេត្តជាមួយនឹងទេសភាពត្រជាក់ភ្នែកជាមួយក្រុមការងារ ជាពិសេសគឺបានបង្ហាញពីវត្តមាន វណ្ណថាន និង នរិទ្ធ នៅជាមួយគ្នាទៀតផង។ តាមរយៈ Story របស់តារារ៉េបល្បីឈ្មោះរូបនេះគឺកំពុងតែរៀបចំបទភ្លេងជាមួយគ្នាជាហេតុធ្វើឱ្យអ្នកគាំទ្ររំពឹងទុកថាអ្នកទាំងបីទំនងមានអ្វីថ្មីចែកជូនអ្នកគាំទ្រ។
បើតាមការប្រកាសពី Olympic Cambodia កាលពីថ្ងៃទី១២ កញ្ញា សិល្បករប្រចាំ និងសិល្បករផ្សេងទៀតនឹងមានវត្តមាន ក្នុងពិធីបើកព្រឹត្តិការណ៍កីឡាជាតិ និងកីឡាជាតិជនពិការ ឆ្នាំ២០២៤ ដែលនឹងធ្វើឡើងនៅថ្ងៃទី៣០ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិក។ ការជួបជុំរបស់អ្នកទាំងបីដើម្បីរៀបចំសម្រាប់ព្រឹត្តិការណ៍នេះ ឬជាអ្វីផ្សេងអ្នកគាំទ្រពុំទាន់ដឹងច្បាស់នោះទេ។
ទោះបីជាមិនទាន់បានដឹងពីកម្រោងថ្មីនេះក្តី ប៉ុន្តែអ្នកគាំទ្របានសម្តែងការសប្បាយចិត្តនិងរំពឹងដែរថាមានបទថ្មីជូនអ្នកគាំទ្រ។ កន្លងមក វណ្ណដា ធ្លាប់បានសហការជាមួយវណ្ណថាន និង នរិទ្ធ សុទ្ធតែទទួលបានការគាំទ្រទាំងអស់។
ទោះបីជាសកម្មភាពខាងលើមិនទាន់ច្បាស់ការណាមួយក្តី ប៉ុន្តែអ្វីដែលអ្នកគាំទ្រច្បាស់នោះគឺ វណ្ណដា នឹងមានបទថ្មីជាមួយ ហ្សេដេស ដែលជាអតីតបេក្ខជន TOP3 ក្នុងកម្មវិធីរ៉េបនិងបានសាងភាពល្បីល្បាញតាមរយៈបទ «ក្រឡុក»។ ហ្សេដេស បានប្រកាសថានឹងចេញបទថ្មីសហការជាមួយ វណ្ណដា នៅថ្ងៃទី២៩ ខែកញ្ញា នេះដោយបង្ហើបប្រាប់ថា «ភ្លេងនេះក្តៅ ក្តៅធ្វើឱ្យអ្នកឆេះ»។
វណ្ណដា ជាសិល្បកររ៉េបម្នាក់ដែលមានការសហការច្រើនជាមួយសិល្បករផ្សេងទៀតទាំងក្នុងទ្រនំនិងក្រៅទ្រនំរបស់ខ្លួន៕
