បុរសជនជាតិអង់គ្លេសមួយរូប ដែលត្រូវបានគេស្គាល់ថាជា លោកនិច ម៉ាក បានចំណាយពេលវេលាប្រមាណនឹង ២៣ ឆ្នាំមកហើយ ក្នុងការរួមចំណែកអភិរក្សនិងការពារសត្វព្រៃនៅកម្ពុជា ដែលកំពុងនឹងប្រឈមមុខនឹងការដាក់អន្ទាក់និងឈូសឆាយព្រៃ។ 
លោកនិច ម៉ាក នៅក្នុងវ័យ ៧៣ ឆ្នាំ បានធ្វើដំណើរមកកាន់ប្រទេសកម្ពុជាអំឡុងឆ្នាំ២០០១ ដើម្បីបម្រើការឲ្យអង្គការក្រៅរដ្ឋាភិបាលផ្នែកអភិរក្សសត្វព្រៃ គឺអង្គការ Wild Alliance។ បច្ចុប្បន្ននេះ លោកគឺជានាយកសង្គ្រោះនិងថែរក្សាសត្វព្រៃរបស់អង្គការសម្ព័ន្ធមិត្តសត្វព្រៃប្រចាំប្រទេសកម្ពុជា។ ក្នុងនាមជាជនបរទេសមួយរូប ប៉ុន្តែអាចនិយាយភាសាខ្មែរបាន បើទោះបីជាវ័យរៀងជ្រេបន្តិចក្តី ប៉ុន្តែលោក ក៏នៅតែអាចឡើងភ្នំ ចូលព្រៃ មានកម្លាំងខ្លាំងក្លាមិនចាញ់វ័យជំទង់។
នៅក្នុងកិច្ចសម្ភាសន៍របស់លោកនិច ម៉ាក កាលពីពេលកន្លងទៅបានឲ្យដឹងថា កាលពីតូចលោកជាក្មេងម្នាក់ មិនចូលចិត្តការសិក្សាឡើយ។ ចំណង់ចំណូលចិត្តរបស់លោក និក ចាប់តាំងពីដឹងក្តីមក គឺចូលចិត្ត និងស្និទ្ធស្នាលខ្លាំងជាមួយសត្វ។ កាលនោះលោកតែងបានយកសត្វមកចិញ្ចឹម និងសង្គ្រោះពួកវានៅផ្ទះជានិច្ច។
នៅក្នុងវ័យ១៩ ឆ្នាំលោកក៏ផ្តើមនិស្ស័យការងារជាមួយសត្វព្រៃនៅឯសួនសត្វ លើទឹកដីនៃប្រទេសកំណើតខ្លួន គឺចក្រភពអង់គ្លេស ។ បន្ទាប់មក លោកក៏ធ្វើដំណើរស្វែងរកបទពិសោធន៍បន្ថែមនៅលើទឹកដីអាហ្រ្វិកខាងត្បូងទៅលើផ្នែកនេះបន្តទៀត។ រួចក៏បន្តដំណើរទៅកាន់ប្រទេសទី៣ លើអាជីពការងារខ្លួនដោយមិនយកប្រាក់ចំណូល គឺប្រទេសឥណ្ឌា។ បន្ទាប់មកលោកក៏ត្រឡប់ទៅកាន់ប្រទេសអង់គ្លេសវិញ ហើយជាចុងក្រោយក៏បានដល់ប្រទេសកម្ពុជា អំឡុងឆ្នាំ២០០១ និងចាប់ផ្តើមលើអាជីពការងារដែលគាត់ស្រលាញ់មួយនេះ លើទឹកដីកម្ពុជារហូតមកដល់បច្ចុប្បន្ន។ 
នៅក្នុងបទសម្ភាសន៍មួយ លោកបាននិយាយថា «កម្ពុជា ជាប្រទេសងាយស្រួលសម្រាប់ខ្ញុំ ទាំងអាហារ ការរស់នៅ ទំនាក់ទំនង និងអាកាសធាតុ។ ធាតុពិតប្រទេសខ្ញុំ ត្រជាក់ ប៉ុន្ដែមកដល់កម្ពុជាអាកាសធាតុមិនមែនជាបញ្ហាសម្រាប់ខ្ញុំឡើយ។ គ្រប់យ៉ាងគឺរលូន។ កម្ពុជាខុសពីប្រទេសផ្សេងត្រង់ ប្រជាជនខ្មែរភាគច្រើន រួសរាយរាកទាក់ និងចិត្តល្អណាស់ ចាត់ទុកខ្ញុំដូចជាគ្រួសារគេដែរ។ នៅខ្មែរទោះជាគេអត់ស្គាល់យើងក៏ដោយ ក៏គេស្វាគមន៍និងផ្ដល់ភាពកក់ក្តៅប្លែកពីប្រទេសដទៃ។ បើធៀបទៅស្រុកខ្ញុំវិញ ខុសគ្នាដាច់ស្រឡះ»។
ក្តីស្រម៉ៃតែមួយគត់របស់លោកគឺ លោកពិតជាចង់ឃើញ ពលរដ្ឋគ្រប់រូបចេះថែរក្សា សត្វព្រៃ និងព្រៃឈើ ដែលនៅសេសសល់ សម្រាប់មនុស្សជំនាន់ក្រោយ ព្រោះបើកាលណាគ្រប់គ្នាមិនចូលរួមថែធនធានទាំងនោះ ពិតណាស់ថា នៅពេលវាបាត់បង់ហើយ ពិតជាពិបាកស្ដារមកវិញណាស់៕
