ព្រះពុទ្ធបដិមាក្នុងទម្រង់រចនាបថ ទ្រង់ផ្ជាញ់មា ស្ថិតនៅលើកំពូលឥសីបតមៈ (ហៅភ្នំស្វាយ) ទម្ងន់ជាង ៣០០តោន សាងសង់ឡើងពីប្រភេទថ្មភក់យកមកពីខេត្តកំពង់ធំ ដែលបានចាប់ផ្តើមដំណើរការសាងសង់ កាលពីឆ្នាំ២០១៧ ដោយចំណាយថវិកាប្រមាណជាង២០ម៉ឺនដុល្លារអាមេរិក។
ភ្នំស្វាយ ឬ ឥសីបតមៈ ស្ថិតនៅក្រុងបានលុង ខេត្តរតនគិរី ជាកន្លែងមើលថ្ងៃលិចដ៏ស្រស់ស្អាតមួយ អមជាមួយព្រះពុទ្ធបដិមាកម្ពស់ជាង១៥ម៉ែត្រមួយអង្គ។
ក្រៅពីជាទីតាំងសម្រាប់គោរពសក្ការបូជា និងជាទីកន្លែងទេសចរណ៍ បែបសាសនានៅលើទឹកដីភាគឦសាន ទីនេះក៏កំពុងក្លាយជាកន្លែងសម្រាប់ភ្ញៀវទេសចរស្រូបខ្យល់អាកាស និងមកមើលទេសភាពពីលើទីក្រុងបាលុងនាពេលរាត្រី ឬពេលព្រឹករលឹមផងដែរ។
គួរបញ្ជាក់ផងដែរ សម្រាប់ឈ្មោះ “ឥសីបតមៈ” ជាឈ្មោះអ្នកតាភ្នំពីបុរាណដែលបានថែរក្សាតំបន់នេះក្នុងសម័យ កាលយូរលង់ណាស់មកហើយ៕
