ប្រទេសហ្វីលីពីន ៖ បច្ចុប្បន្ន ការបង្កើតមាតិកាផ្សេងៗក្នុងបណ្តាញសង្គម គឺជាអាជីពមួយអាចរកប្រាក់ចំណូលបានខ្ពស់ រហូតធ្វើឱ្យមនុស្សជាច្រើនងាកមកប្រកបអាជីពនេះ ជាពិសេស ការអង្គុយ Live បរិភោគអាហារច្រើនៗដើម្បីទាក់ទាញចំណាប់អារម្មណ៍ ។ ប៉ុន្តែការ Live បរិភោគអាហារច្រើនហួសកម្រិតបែបនេះ ក៏អាចធ្វើឱ្យប៉ះពាល់ដល់សុខភាព ឬអាយុជីវិតផងដែរ ។
កាលពីថ្ងៃទី៤ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា អ្នកបង្កើតមាតិកាដ៏ល្បីល្បាញម្នាក់នៅប្រទេសហ្វីលីពីន បានស្លាប់បាត់បង់ជីវិតភ្លាមៗ ក្រោយពេលរូបគេអង្គុយ Live បរិភោគសាច់មាន់យ៉ាងច្រើនក្នុងបណ្តាញសង្គម ។
លោក Dongz Apatan និងមានឈ្មោះពិតថា Manoy Apatan អាយុ៣៨ឆ្នាំ តែងតែអង្គុយ Live បរិភោគអាហារច្រើនហួសកម្រិតក្នុងបណ្តាញសង្គមជាញឹកញាប់ ដូចជា ៖ ត្រី, សាច់ជ្រូក និងសាច់មាន់ ដើម្បីរកប្រាក់ចំណូលពីបណ្តាញសង្គម ដែលមនុស្សទូទៅពុំអាចបរិភោគច្រើនដូចលោក ។ រីឯហ្វេសប៊ុករបស់លោក មានអ្នកតាមដានចំនួន៤៥ម៉ឺន៧ពាន់នាក់ ។
កាលពីថ្ងៃទី១៣ ខែមិថុនា ឆ្នាំ២០២៤ លោកបាន Live វីដេអូចុងក្រោយបង្អស់របស់ខ្លួនពេលកំពុងអង្គុយបរិភោគសាច់មាន់យ៉ាងច្រើនជាមួយបាយ ។ ប៉ុន្តែនៅថ្ងៃបន្ទាប់មក ស្រាប់តែប្អូនស្រីរបស់លោក ឈ្មោះ Leah Apatan បានសរសេរក្នុងបណ្តាញសង្គមថា «បងប្រុសស្លាប់ហើយ» ។ នាងបញ្ជាក់ថា ក្រោយពីបងប្រុសអង្គុយ Live បរិភោគសាច់មាន់រួចមក ស្រាប់តែកើតអាការៈគាំងបេះដូង ហើយក្រុមគ្រួសារក៏បានបញ្ជូនបងប្រុសទៅមន្ទីរពេទ្យភ្លាមៗ ។
បន្ទាប់ពីប្អូនស្រីបង្ហោះថា បងប្រុសរបស់ខ្លួនស្លាប់រួចមក វាធ្វើឱ្យមហាជនបង្ហាញការសោកស្តាយ និងចូលរួមរំលែកទុក្ខ ។ ប៉ុន្តែពលរដ្ឋហ្វីលីពីនមួយចំនួននិយាយថា មូលហេតុនៃការស្លាប់នេះ គឺអាចបណ្តាលមកពីលោក Dongz Apatan បរិភោគអាហារច្រើនជ្រុលពេក ហើយលោកគួរតែបរិភោគក្នុងបរិមាណសមល្មម ។
ប៉ុន្តែប្អូនស្រីរបស់លោក Dongz Apatan និយាយថា ការ Live វីដេអូបរិភោគអាហារច្រើនៗ គឺបងប្រុសបរិភោគពុំអស់គ្រប់ចានទេ ។ សូមកុំគិតថា បងប្រុសជាតួកំប្លែង ពីព្រោះប្រាក់ចំណូលទទួលបានពីបណ្តាញសង្គម គឺបងប្រុសយកទៅជួយអ្នកដទៃ ។
ចំណែកគ្រូពេទ្យនិយាយថា ការស្លាប់របស់អ្នកបង្កើតមាតិការូបនេះ គឺបណ្តាលមកពីការដាច់សរសៃឈាមខួរក្បាល និងមានកំណកឈាមក្នុងខួរក្បាល ខណៈសម្ពាធឈាមកើនឡើង ។ គ្រូពេទ្យបន្តថា វាកើតឡើងដោយសារការបរិភោគសាច់សត្វ និងអាហារមានរសជាតិប្រៃញឹកញាប់ ៕
