ថ្មីៗនេះ មហាជនជាច្រើនហាក់មានការចាប់អារម្មណ៍យ៉ាងខ្លាំងទៅលើគំនិតច្នៃប្រឌិតកែច្នៃសម្លៀកបំពាក់ ម្កុដអប្សរា និងគ្រឿងអង្ការក្រោមទម្រង់ជាខ្មែរ បំពាក់ទៅលើតុក្កតា Labubu ដែលកំពុងល្បីល្បាញជុំវិញពិភពលោកក្នុងអំឡុងពេលនេះ។
ជឿជាក់ថា សាធារណជនភាគច្រើនប្រាកដជាស្គាល់យ៉ាងច្បាស់ហើយអំពីតុក្កតា Labubu ដែលកំពុងតែមានប្រជាប្រិយភាព ដោយសង្កេតឃើញថាមនុស្សម្នាបានសម្រុកទិញតុក្កតានេះគ្រប់ៗគ្នា ព្រោះតែរូបរាងដ៏ខ្ជីខ្ជូតគួរឲ្យស្រលាញ់និងភាពចម្រុះពណ៌របស់វា ខណៈអំឡុងពេលមុនបានជំរុញឲ្យការលក់តុក្កតានេះរហូតអស់ពីស្កុកទៀតផង។
យ៉ាងណាមិញ ថ្មីៗនេះ នៅលើបណ្តាញសង្គម Tik Tok ដោយគណនីមួយដែលមានឈ្មោះថា @hearathana45 គឺបានធ្វើការបង្ហោះឃ្លីបវីដេអូខ្លីមួយបង្ហាញពីសកម្មភាព ច្នៃគ្រឿងប្រដាប់តែងកាយតូចៗក្នុងរចនាបទជាខ្មែរ សម្រាប់បំពាក់ទៅលើតុក្កដា Labubu ខណៈក៏ទទួលបាននូវការកោតសរសើរព្រោងព្រាត។
តាមរយៈវីដេអូប្រមាណនឹង ១ នាទី គឺឆ្លុះបានបង្ហាញឲ្យឃើញពីសកម្មភាពក្នុងការកែច្នៃទៅលើសម្លៀកបំពាក់ កូនម្កុដអប្សរា គ្រឿងលម្អកាយផ្សេងៗ ក្នុងទម្រង់ជាខ្មែរនិងមានដោយក្បូរក្បាច់រចនាដ៏ប្រណីត ខណៈពីមួយដំណាក់កាលទៅមួយដំណាក់កាលនៃការកែច្នៃនិងការផលិតគឺពិតជាមិនងាយស្រួលនោះទេ។ បន្ទាប់ពីបានច្នៃរួច គេក៏បានយកគ្រឿងប្រដាប់ទាំងនោះ ទៅបំពាក់លើកាយរបស់តុក្កតា Labubu គឺឃើញថាស្រស់ស្អាតនិងសាកសមខ្លាំងមែនទែន។ ជាមួយគ្នានោះ មហាជនខ្មែរជាច្រើនក៏បានចូលទៅបញ្ចេញមតិកោតសរសើរព្រោងព្រាតពីស្នាដៃនិងគំនិតច្នៃប្រឌិតដែលបានដាក់បង្ហោះដោយគណនីខាងលើនោះ។
គួរបញ្ជាក់ថា Labubu គឺជាតុក្កតាដ៏មានប្រជាប្រិយភាពបំផុតមួយប្រចាំឆ្នាំ២០២៤នេះ ខណៈតុក្កតា Labubu ទាំងតូចនិងធំ គឺមានតម្លៃគួរសមដែរ រហូតដល់ខ្ទង់រាប់រយឬរាប់ពាន់ដុល្លារ ដែលគេតែងនិយមទិញវា ព្រោះតែការស្រលាញ់ រហូតដល់យកវាទៅធ្វើជាបន្តោងកាបូប ស្បែកជើង និងសម្លៀកបំពាក់រូប Labubu ជាដើមផងដែរ៕
