ស្នងការដ្ឋាននគរបាលរាជធានីភ្នំពេញ បានបញ្ជូនខ្លួនជនសង្ស័យចំនួន៣នាក់ទៅតុលាការពាក់ព័ន្ធនឹងការបាញ់សម្លាប់មនុស្ស២នាក់ នៅក្នុងបុរីប៉េងហួតបឹងស្នោ ស្ថិតនៅខណ្ឌច្បារអំពៅ រាជធានីភ្នំពេញ។
ជនសង្ស័យចំនួន៣នាក់ ត្រូវបាននាយកដ្ឋានព្រហ្មទណ្ឌនៃក្រសួងមហាផ្ទៃ ចោទប្រកាន់ពាក់ព័ន្ធនឹងករណីឃាតកម្មគិតទុកជាមុន និងកំពុងរៀបចំបញ្ជូនខ្លួនពួកគេ ទៅកាន់តុលាការដើម្បីបន្តនីតិវិធី។
បើតាមឯកឧត្តម ឧត្តមសេនីយ៍ទោ ជួនណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានលើកឡើងថា៖”ខ្មាន់កាំភ្លើងតែម្នាក់ឯងទេ និយាយឱ្យចំទៅគឺតែម្នាក់ឯង សហចារីគឺអ្នកដឹកមក ទី២គឺដឹកយកទៅកន្លែងឡាន អីចឹងគឺការងារនេះ ភ្លាមៗក្នុងរង្វង់ប្រតិបត្តិការគឺត្រូវតែឃាត់សិន ហើយអ្វីដែលដាក់បន្ទុកគឺនៅលើការស្រាវជ្រាវ និងការប្រមូលវត្ថុតាង ដូច្នេះប្រហែលជាកិច្ចការងារនេះ យើងមានទិន្នន័យច្បាស់លាស់ហើយ ដើម្បីចោទប្រកាន់លើអ្នកសម្រួលមធ្យោបាយដល់ជនសង្ស័យដែលរត់គេចខ្លួន”។
គួរបញ្ជាក់ផងដែរថា កាលពីថ្ងៃទី ១៧ ខែមិថុនា មានករណីផ្ទុះអាវុធជាច្រើនគ្រាប់ ក្នុងបុរីប៉េងហួតបឹងស្នោ ស្ថិតនៅក្នុងខណ្ឌច្បារអំពៅ រាជធានីភ្នំពេញ បានបណ្ដាលឲ្យមនុស្សចំនួន២នាក់បាត់បង់ជីវិត និងមនុស្ស២នាក់ទៀតរងរបួស៕
