ធ្លាប់តែឃើញច្រៀងនិងរាំ តែឥឡូវនេះមកឃើញ Jennie ដើរម៉ូតវិញម្តង ធ្វើឱ្យអ្នកគាំទ្រស្ងើចសរសើរមិនដាច់ពីមាត់ថានាងជាតារាដែលមានទេពកោសល្យខ្ពស់ មិនត្រឹមពូកែច្រៀង រាំ សម្តែងប៉ុណ្ណោះទេ នាងក៏ពូកែខាងដើរម៉ូតដែរ។ នេះជាលើកដំបូងហើយដែល Jennie បានបង្ហាញខ្លួនក្នុងនាមជាតារាបង្ហាញម៉ូត ដោយបានដើរម៉ូតបិទកម្មវិធី “La Casa” នៅក្នុងប្រទេសអ៊ីតាលី។
យោងតាម teenvogue ថ្មីៗនេះគេបានប្រទះឃើញ Jennie សមាជិក BLACKPINK បានចូលរួមក្នុងកម្មវិធីដើរម៉ូតរបស់ម៉ាកយីហោល្បីល្បាញមួយគឺ Jacquemus ដែលធ្វើឡើងលើដំបូលអាគារនៃ Casa Malaparte ជាកន្លែងដ៏សំខាន់មួយត្រូវបានសាងសង់នៅលើកំពូលនៃច្រាំងថ្មចោទដ៏អស្ចារ្យជាមួយនឹងទិដ្ឋភាពសមុទ្រនៅលើកោះ Capri របស់ប្រទេសអ៊ីតាលី។ នៅក្នុងកម្មវិធីនោះគេក៏បានប្រទះឃើញមានតារាល្បីៗជាច្រើនចូលរួមផងដែរដូចជា Dua Lipa, Peggy Gou, Arón Piper, Manu Ríos និងជាច្រើននាក់ទៀត។
ទោះជាយ៉ាងណា លើកនេះ Jennie មិនត្រឹមចូលរួមជាភ្ញៀវប៉ុណ្ណោះទេថែមទាំងបានបង្ហាញខ្លួនក្នុងនាមជាតារាបង្ហាញម៉ូតលើកដំបូងបង្អស់របស់នាងផងដែរ ដោយបានដើរម៉ូតបិទកម្មវិធី “La Casa” ក្នុងគម្រប់ខួបទី ១៥ ឆ្នាំរបស់ម៉ាកយីហោនេះ។ នៅក្នុងកម្មវិធីបង្ហាញម៉ូតនោះគេបានឃើញថា Jennie ស្លៀករ៉ូបវែងពណ៌ខ្មៅវាលក្លៀក ព្រមជាមួយកាបូបពណ៌ផ្ទៃមេឃ និងលេងទឹកមុខយ៉ាងជឿជាក់សមជាតារាបង្ហាញម៉ូតអាជីពតែម្តង។
គួរបញ្ជាក់ដែរថា Jennie នៅតែជាសមាជិក BLACKPINK រហូតទោះបីជានាងបានចាកចេញពីផលិតកម្ម YG Entertainment ក៏ដោយ ក៏នាងនិងសមាជិក BLACKPINK ៣ រូបទៀតនៅតែមានទំនាក់ទំនងល្អជាមួយគ្នាធម្មតា។ បច្ចុប្បន្នតារាស្រីរូបនេះបានបន្តសកម្មភាពទោលក្រោមផលិតកម្មរបស់ខ្លួនគឺ ODD ATELIER ហើយនៅពេលចាកចេញពីទ្រនំចាស់ នាងនៅតែទទួលបានការគាំទ្រយ៉ាងច្រើនជុំវិញពិភពលោក៕
