Rain សារភាពត្រង់ៗទម្រាំបាន Kim Tae Hee ធ្វើជាភរិយាមិនមែនជារឿងងាយស្រួល

នៅក្នុងកម្មវិធីជជែកជាមួយពិធីករ Shin Dong Yup ដែលចាក់ផ្សាយនៅលើ YouTube នៅល្ងាចថ្ងៃទី៣ ខែមិថុនា Rain បានបង្ហើបថានៅពេលដែលលោកបានជួប Kim Tae Hee លើកដំបូងក្នុងឆ្នាំ ២០១២ ធ្វើឱ្យកើតមានចិត្តចង់តាមរកនាង។ បន្ទាប់ពីសុំលេខទូរសព្ទ Rain បានខលទៅអញ្ជើញតារាស្រីរូបនេះទៅញ៉ាំអាហារ ប៉ុន្តែនាងបដិសេធព្រោះ «គ្មានហេតុផលដែលត្រូវញ៉ាំជាមួយលោកទេ»។ នាងថែមទាំងនិយាយចំៗថា Rain មិនមែនជាមនុស្សប្រុសដែលនាងចូលចិត្តនោះទេ។

ការត្រូវបានគេបដិសេធទាំងស្រុងបានធ្វើឱ្យ Rain មិនអស់ចិត្តជាខ្លាំងពេលនោះលោកគិតក្នុងចិត្តថា៖ «មានរឿងអីទៅ លោកជាមនុស្សល្អ មិនអាក្រក់បែបហ្នឹងទេ»។ ប្រហែលជា ១០នាទីបន្ទាប់ពីខលទៅលើកដំបូង Rain បានទូរសព្ទទៅ Kim Tae Hee ម្តងទៀត ប៉ុន្តែនៅតែមិនអាចណាត់ជួបបានដដែល។ តារាចម្រៀងរូបនេះថែមទាំងបានអង្វរថា «ខ្ញុំនឹងចូលបម្រើទ័ពក្នុងរយៈពេលពីរសប្តាហ៍ទៀត តើអ្នកអាចជួប និងនិយាយជាមួយខ្ញុំមួយរយៈបានទេ?” ចម្លើយមកវិញ Kim Tae Hee មិនព្រមជួបលោកដដែល។

បន្ទាប់ពី Rain បានទៅបំពេញកាតព្វកិច្ចយោធា មួយឆ្នាំក្រោយមក នៅវិស្សមកាល លោកបានផ្ញើសារទៅកាន់ Kim Tae Hee ហើយអញ្ជើញនាងទៅញ៉ាំអាហារ។ តារាចម្រៀង និងសម្តែង Rain បានសារភាពស្នេហ៍ជាមួយតារាស្រីរូបនេះជាច្រើនដង ប៉ុន្តែត្រូវបានគេបដិសេធដោយសារតែKim Tae Hee មិនជឿទុកចិត្តតារាចម្រៀងរូបនេះគ្រប់គ្រាន់ ដោយគិតថាជាការលេងសើច មិនមែនជាស្នេហាពិតនោះទេ។ Rain មានភាពស្មោះត្រង់ជាមួយនាង ដោយបង្ហាញពីអារម្មណ៍ស្មោះត្រង់ ទើបធ្វើឱ្យនាងបើកចិត្តទទួលយកចំណងស្នេហ៍នេះ។
គូស្នេហ៍មួយគូនេះបានរៀបចំពិធីមង្គលការឯកជនមួយនៅឆ្នាំ ២០១៧ ដោយការចំណាយសរុបនៃពិធីមង្គលការគឺត្រឹមតែ ១,១០០ដុល្លារប៉ុណ្ណោះ រួមទាំងការជួលទីកន្លែង ផ្កាអាពាហ៍ពិពាហ៍ និងការតុបតែងជប់លៀង។ តម្លៃនេះមិនរាប់បញ្ចូលរ៉ូបអាពាហ៍ពិពាហ៍ អាវធំ និងចិញ្ចៀនអាពាហ៍ពិពាហ៍របស់ពួកគេទេ។ បន្ទាប់ពីរៀបការរួច Kim Tae Hee បានកំណត់ការងាររបស់នាងក្នុងការថែរក្សាកូនស្រីទាំងពីរ ខណៈដែល Rain នៅតែបន្តសកម្មភាពនៅក្នុងកម្មវិធីតន្ត្រី និងកម្មវិធីទូរទស្សន៍។

យោងតាម tvN គូស្នេហ៍មួយគូនេះស្ថិតក្នុងចំណោមអ្នកមានបំផុតក្នុងវិស័យសិល្បៈកូរ៉េ។ នៅឆ្នាំ ២០២១ Rain បានទិញអគារមួយតម្លៃ ៩២ពាន់លានវ៉ុន (ប្រហែល៨០ លានដុល្លារ) នៅទីក្រុងសេអ៊ូល។ គូស្នេហ៍តារាមួយគូនេះរស់នៅក្នុងវីឡាមួយដែលមានតម្លៃប្រហែល ៥ ពាន់លានវ៉ុន (ប្រហែល៤,៤ លានដុល្លារ)។ បច្ចុប្បន្នអ្នកទាំងពីរមានកូនស្រី២នាក់ជាចំណងដៃផងដែរ៕