ប្រទេសអូស្ត្រាលី ៖ ក្រុមហ៊ុនមួយបានក្លាសេសាកស.ព មនុស្សលើកដំបូងដោយការប្រើប្រាស់បច្ចេកវិទ្យាខ្ពស់ក្រោយការស្នើសុំពីគ្រួសារសាកស.ព ដើម្បីរង់ចាំពេលវេលាដែលបច្ចេកវិទ្យាលើពិភពលោកកាន់តែរីកចម្រើនខ្លាំង និងអាចជួយឱ្យសាកស.ព រស់ឡើងវិញ ។
កាលពីថ្ងៃទី២៣ ខែឧសភា ឆ្នាំ២០២៤ សារព័ត៌មានជាច្រើនរបស់អូស្ត្រាលីរាយការណ៍ថា ក្រុមហ៊ុនអូស្ត្រាលីឈ្មោះ Southern Cryonics ដែលផ្តល់សេវាកម្មក្លាសេសាកស.ព ប្រកាសថា ពួកគេបានទទួលក្លាសេសាកស.ព អតិថិជនដំបូងដោយជោគជ័យ ។
លោក Philip Rhoades ជាអ្នកជំនាញក្រុមហ៊ុននេះបញ្ជាក់ថា វាជាសាកសពរបស់បុរសអាយុ៨០ឆ្នាំ រស់នៅទីក្រុងស៊ីដនី ប្រទេសអូស្ត្រាលី ដែលបុរសរូបនេះទើបតែបានស្លាប់កាលពីដើមខែឧសភា ឆ្នាំ២០២៤ ។ ការក្លាសេសាកសពបានធ្វើឡើងដោយផ្ចិតផ្ចង់ និងប្រុងប្រយ័ត្នយ៉ាងខ្លាំង ហើយលោកមានអារម្មណ៍តានតឹងផងដែរ ដោយសារដំណាក់កាលក្លាសេសាកសពក្នុងមួយថ្ងៃៗមានភាពស្មុគស្មាញខុសៗគ្នា ។ លើសពីនេះ វាងាយប្រឈមនឹងការភ្លាត់ស្នៀត បើដំណាក់កាលនីមួយៗពុំបានរៀបចំគម្រោងត្រឹមត្រូវ ។
លោក Philip Rhoades រៀបរាប់ថា កន្លងមក មានគ្រួសារផ្សេងទៀតបានទាក់ទងមកកាន់ក្រុមហ៊ុនដើម្បីក្លាសេសាកសព ប៉ុន្តែពួកគេក៏បាត់ដំណឹង ។ រីឯសាកសពដែលក្រុមហ៊ុនយកមកក្លាសេលើកដំបូងនេះ គឺមកពីគ្រួសារដែលពុំបានចុះឈ្មោះជាសមាជិកជាមុនជាមួយក្រុមហ៊ុន ទើបធ្វើឱ្យក្រុមការងារមានពេលត្រឹមតែ១សប្តាហ៍ប៉ុណ្ណោះក្នុងការត្រៀមឧបករណ៍ផ្សេងៗ ។
សាកសពយកមកក្លាសេជាលើកដំបូងនេះ បានស្លាប់កាលពីថ្ងៃទី១២ ខែឧសភា ឆ្នាំ២០២៤ នៅមន្ទីរពេទ្យមួយក្នុងទីក្រុងស៊ីដនី ហើយគ្រួសារក៏បានទាក់ទងក្រុមហ៊ុនភ្លាមៗ ។ ក្រុមហ៊ុនបានទទួលសាកសពនេះមកក្លាសេតាមការស្នើសុំរបស់គ្រួសារ រីឯថ្លៃសេវាវិញ គឺស្មើប្រមាណ១៧ម៉ឺនដុល្លារអូស្ត្រាលី ។
រាងកាយគ្មានវិញ្ញាណរបស់បុរសជរា ត្រូវបានគេបញ្ជូនពីមន្ទីរពេទ្យមកកាន់បន្ទប់ក្លាសេរបស់ក្រុមហ៊ុនដែលពោរពេញទៅដោយទឹកកក ។ បន្ទាប់មក គេក៏បញ្ជូនសាកសពទៅកាន់បន្ទប់មួយទៀត ដែលក្រុមជំនាញនឹងចាក់បញ្ចូលសារធាតុគីមីរាវទៅក្នុងរាងកាយសាកសពដើម្បីថែរក្សាកោសិកា និងយកទឹកកកមករុំលើសាកសពសម្រាប់កាត់បន្ថយសីតុណ្ហភាពឱ្យចុះត្រជាក់រហូតដល់ -៨០អង្សារសេ ។ ក្រោយមក គេក៏បញ្ជូនសាកសពទៅបន្ទប់មួយទៀតរបស់ក្រុមហ៊ុន Southern Cryonics ។
នៅពេលគេបញ្ជូនសាកសពមកដល់បន្ទប់នេះហើយ ក្រុមអ្នកជំនាញនឹងកាត់បន្ថយសីតុណ្ហភាពសាកសពបន្ថែមទៀតរហូតដល់ -២០០អង្សារសេ រួចហើយ ក៏យកសាកសពទុកនៅកន្លែងគ្មានខ្យល់ ។ ក្រុមហ៊ុនបញ្ជាក់ថា កន្លងមក ពួកគេបានសាកល្បងជាមួយគំរូជាច្រើនលើក ហើយការសាកល្បងនេះទទួលបានលទ្ធផលគួរឱ្យពេញចិត្ត ទើបធ្វើឱ្យការអនុវត្តផ្សេងៗប្រព្រឹត្តទៅដោយរលូនពេលអនុវត្តជាមួយសាកសពជាក់ស្តែង ។
ការក្លាសេសាកសពមនុស្សនេះដោយសារគេជឿថា នៅថ្ងៃអនាគតរាប់រយឆ្នាំខាងមុខ បច្ចេកវិទ្យាលើពិភពលោកនឹងអភិវឌ្ឍន៍កាន់តែខ្លាំង ហើយវានឹងជួយឱ្យអ្នកស្លាប់មានជីវិតរស់ឡើងវិញ ។ ក្រុមហ៊ុនបញ្ជាក់ថា ក្រោយពេលអ្នកស្លាប់រស់ឡើងវិញ ពួកគេនឹងមានរាងកាយរឹងមាំល្អ, ខួរក្បាលពោរពេញទៅដោយចំណេះដឹង និងចងចាំគ្រប់ហេតុការណ៍ទាំងអស់របស់រាងកាយដើម ៕
