ថ្មីៗនេះ មហាជនហាក់ចាប់អារម្មណ៍នឹងកោតសរសើរយ៉ាងខ្លាំងទៅលើលោកយាយជាជនជាតិខ្មែរ រស់នៅសហរដ្ឋអាមេរិកម្នាក់ មានវ័យរហូតដល់ទៅ៨៧ឆ្នាំហើយ នូវតែមានសុខភាពល្អមាំមួន ស្មារតីនឹងនរ ថែមទាំងមានសទ្ធាជ្រះថ្លា បរឡាននិមន្តព្រះសង្ឃបានធម្មតា។
កាលពីថ្ងៃទី២៣ ខែឧសភានេះ យោងតាមការបង្ហោះនៅលើបណ្តាញសង្គមហ្វេសបុក ដោយគណនីរបស់ព្រះតេជគុណ មាស ចន្ថា គឺបានភ្ជាប់មកជាមួយនឹងឃ្លីបវីដេអូនិងរូបថតប៉ុន្មានសន្លឹក ដែលមានចំណងជើងថា« ឧបាសិកា ទឹម សារី អាយុ៨៧ឆ្នាំហើយនៅបើកឡានបានយ៉ាងឡូយ សូមជូនពរឧបាសិកា មានសុខភាពល្អ សំណាងល្អ»។
តាមការរៀបរាប់របស់ព្រះតេជគុណជាមួយនឹងលោកបានឲ្យដឹងទៀតថា លោកយាយទឹម សារី ដែលរស់នៅសហរដ្ឋអាមេរិក បច្ចុប្បន្ននេះគឺមានព្រះជន្ម ៨៧ឆ្នាំហើយ ប៉ុន្តែនូវតែមានកម្លាំងមាំមួន អាចបររថយន្តនិមន្តព្រះសង្ឃបានជាធម្មតា។ លោកយាយនៅក្នុងទឹកមុខប្រកបដោយស្នាមញញឹមនិងសទ្ធាជ្រះថ្លា បើតាមការបញ្ជាក់ គាត់នៅមានស្មារតីនឹងនរ គ្រាន់តែពេលខ្លះមានការភ្លេចភ្លាំងបន្តិចបន្តួចប៉ុណ្ណោះ។ នៅក្នុងរថយន្តជាមួយគ្នានោះក៏នូវមានលោកយាយម្នាក់ទៀតអង្គុយកៅអីនៅខាងក្រោយ ដែលបានលើកឡើងថា គាត់មានព្រះជន្ម ៩០ឆ្នាំហើយ ប៉ុន្តែបើក្រឡេកមើលទៅលើទឹកមុខនិងកាយរការវិញគឺនូវតែស្រស់ថ្លា និងរស់ររើកជានិច្ច។
តាមរយៈការបង្ហោះខាងលើ មហាជនជាច្រើនក៏បានចូលទៅបញ្ចេញមតិព្រាតដោយក្តីគោរពស្រលាញ់លោកយាយទាំង២ ដោយអ្នកខ្លះគឺបានលើកឡើងថា«លោកយាយដ៏ចម្រើន មកពីផ្លូវចិត្តរឹងមាំលោកម្ចាស់»។ អ្នកខ្លះថា«លោកយាយអស្ចារ្យណាស់»។ អ្នកខ្លះថា«លោកយាយអាយុច្រើនៗហើយ នៅរឹងមាំទៀត ជូនពរសុខភាពល្អ លោកយាយ»។ អ្នកខ្លះថា«សូមឲ្យចាស់ទៅមានសុខភាពល្អដូចលោកយាយ»។ អ្នកខ្លះថា«ចៅៗ សុំខ្មាស់»។
គួរបញ្ជាក់ថា បើទោះបីជាលោកយាយ២ខាងលើ ឬក៏លោកយាយលោកតាជាច្រើនទៀតដែលបានធ្វើការផ្លាស់ប្តូរទៅរស់នៅឯបរទេសក៏ពិតមែន ប៉ុន្តែពួកគាត់គឺនូវតែប្រកាន់យកនូវទំនៀមទម្លាប់ប្រពៃណីខ្មែរ ជាពិសេសគឺសាសនាព្រះពុទ្ធ ដែលត្រូវបានប្រជាជនខ្មែរគោរពប្រតិបត្តិយ៉ាងខ្ជាប់ខ្ជួនតាំងពីបុរាណកាលរហូតមកដល់បច្ចុប្បន្ន។ ជាមួយគ្នានេះ វាក៏ជាការសបញ្ជាក់ពីផ្នែកជំនឿសាសនាដ៏មុតមាំ ដែលបានចាក់ចូលក្នុងក្រអៅបេះដូងរបស់ប្រជាជនខ្មែរគ្រប់ៗរូបមិនថាទាំងក្នុងនិងក្រៅប្រទេសផងដែរ៕
