ខ្លាដំបង៤ក្បាលនឹងលេចវត្តមាននៅជួរភ្នំក្រវាញ ក្រោយបាត់ខ្លួនជាង២០ឆ្នាំ

សត្វខ្លាធំ ឬខ្លាដំបង ចំនួន ៤ក្បាល ដែលជាអំណោយពីរដ្ឋាភិបាលឥណ្ឌា នឹងមកដល់ប្រទេសកម្ពុជានាពេលឆាប់ៗ ដែលនឹងត្រូវលែងឱ្យរស់នៅក្នុងតំបន់ស្នូលនៃជួរភ្នំក្រវាញ ដោយត្រូវបានការការពារ និងចាត់ទុកថា មានសុវត្ថិភាពបំផុត ក្នុងការស្តារសត្វខ្លាធំនៅកម្ពុជាឡើងវិញ។

ការមកដល់សត្វខ្លាធំ ក្រសួងបរិស្ថាន និងអង្គការសម្ព័ន្ធមិត្តសត្វព្រៃ WA បានរៀបចំដីព្រៃទំហំ ៩០ហិកតា ស្ថិតក្នុងដែនជម្រកសត្វព្រៃតាតៃ នៃតំបន់ជួរភ្នំក្រវាញ ដោយមានរបងដែក ទ្រុងដែក អាងទឹក និងសត្វព្រៃសម្រាប់ជាចំណីបន្ស៊ាំ ដែលគ្រោងទទួលពីរដ្ឋាភិបាលឥណ្ឌា មុនលែងចូលតំបន់ស្នូលនៃតំបន់ការពារធម្មជាតិ។

បើតាមខាងភាគីឥណ្ឌា បានលើកឡើងថា៖”ការប្រគល់សត្វខ្លាធំនេះអាចនឹងធ្វើឡើងអំឡុងពេលខែវិច្ឆិកា ឬខែធ្នូខាងមុខ ឬវាអាចពន្យាពេលយូរជាងនេះបន្ថែមទៀត ក៏អាចថាបាន អាស្រ័យលើអាកាសធាតុ និងកត្តារួមផ្សំមួយចំនួនទៀត។ ការប្រគល់សត្វខ្លាធំជំហ៊ានទី១ ដែលប្រទេសលោកស្រីឱ្យមកកម្ពុជា បេីទទួលជោគជ័យប្រទេសឥណ្ឌានឹងធ្វើការបង្កើនការផ្ដល់ជូនដល់ ១១ក្បាលបន្ថែមទៀត”។

សូមបញ្ជាក់ថា សត្វខ្លាធំ ឬ ខ្លាដំបង បានបាត់ខ្លួនចេញពីកម្ពុជាអំឡុងឆ្នាំ២០០៧ ដែលកាលនោះគេច្រើនប្រទះឃើញវត្តមាននៅភូមិភាគឦសាន និរតី និងខាងជើងប្រទេសកម្ពុជា។

ខ្លាដំបងជាប្រភេទសត្វដែលមានមាឌធំជាងគេបំផុតក្នុងចំណោមអំបូរឆ្មា ដោយវាអាចរស់បានដល់២៥ឆ្នាំ ដែលបច្ចុប្បន្ន វាត្រូវបានចុះក្នុងបញ្ជីក្រហមរបស់អង្គការសហភាពអន្តរជាតិដើម្បីអភិរក្សធនធានធម្មជាតិ (IUCN) ជាប្រភេទកំពុងរងគ្រោះថ្នាក់ជិតផុតពូជនៅលេីពិភពលោក៕