ប្រទេសវ៉េណេស៊ុយអេឡា ៖ បុរសជនជាតិវ៉េណេស៊ុយអេឡា ដែលត្រូវបាន Guinness World Records កត់ត្រាក្នុងស្ថិតិថា គឺជាបុគ្គលមានអាយុវែងបំផុតនៅលើពិភពលោកនោះ បាន ស្លា.ប់ ហើយ កាលពីថ្ងៃទី២ ខែមេសា ឆ្នាំ២០២៤ នៅពេលលោកមានអាយុ១១៤ឆ្នាំ ។
កាលពីថ្ងៃទី៤ ខែកុម្ភៈ ឆ្នាំ២០២២ លោក Juan Vicente Perez Mora ត្រូវបានគេទទួលស្គាល់ថា គឺជាបុគ្គលម្នាក់ដែលមានអាយុវែងបំផុតនៅលើពិភពលោក ។ នៅពេលនោះ លោកមានអាយុ១១២ឆ្នាំ និង២៥៣ថ្ងៃ ។
ក្រោយពីលោក Juan Vicente Perez Mora ស្លាប់ លោកប្រធានាធិបតីវ៉េណេស៊ុយអេឡា Nicolás Maduro បានបង្ហោះសារកាន់ទុក្ខនៅក្នុងបណ្តាញសង្គម X ថា ៖ «លោកតាបានទៅកាន់សុគតិភពហើយ ត្រឹមអាយុ១១៤ឆ្នាំ» ។
លោកតាមានអាយុវែងបំផុតនេះ មានឈ្មោះដើមថា Teo Vicente បានកើតនៅថ្ងៃទី២៧ ខែឧសភា ឆ្នាំ១៩០៩ ក្នុងក្រុមគ្រួសារកសិកររស់នៅទីក្រុង El Cobre រដ្ឋ Tachira ប្រទេសវ៉េណេស៊ុយអេឡា ។ លោកតា គឺជាបុគ្គលទី៩ ដែលមានអាយុវែងបំផុតនៅលើពិភពលោក ក្នុងចំណោមបុគ្គលមានអាយុវែង ចំនួន១០នាក់ ។
បើតាមទិន្នន័យរបស់ Guinness World Records បញ្ជាក់ថា នៅពេលលោក Teo Vicente អាយុបាន៥ឆ្នាំ លោកបានចាប់ផ្តើមជួយធ្វើការងារឪពុក-ម្តាយ និងបងប្អូនប្រមូលដំណាំអំពៅ និងគ្រាប់កាហ្វេ ។
ក្រោយមក បើទោះជាលោក Teo Vicente មានតួនាទីជាអភិបាលស្រុក ដែលធ្វើការងារផ្នែកសម្រុះសម្រួលវិវាទពាក់ព័ន្ធនឹងបញ្ហាដីធ្លី និងគ្រួសារក្តី ប៉ុន្តែលោកពុំបោះបង់មុខរបរជាកសិករទេ ។ បើតាមទិន្នន័យកាលពីឆ្នាំ២០២២ ឱ្យដឹងថា លោក Teo Vicente មានកូនសរុប ១១នាក់, មានចៅ ៤១នាក់ និងចៅទួត ១៨នាក់ ៕
