ទន្ទឹមនឹងការលើកឡើងរបស់អ្នកនាង ស្រីអូន មិនយកគ្រួសារជាធំ បានធ្វើឱ្យអ្នកលេងបណ្តាញសង្គមបញ្ចេញមតិភ្លូកទឹកភ្លូកដី។ ជាមួយគ្នានេះកញ្ញា រឿន ណាត បវរកញ្ញាចក្រវាលកម្ពុជាឆ្នាំ២០១៨ក៏បានលើកឡើងថាសម្រាប់រូបនាងគ្មានប្រយោជន៍នោះទេបើទទួលបានពិភពលោកទាំងមូលហើយបាត់បង់គ្រួសាររបស់ខ្លួន។
នៅលើបណ្តាញសង្គមរបស់ រឿន ណាត បវរកញ្ញាចក្រវាលកម្ពុជាឆ្នាំ២០១៨ នាថ្ងៃទី១៩ ខែមីនា ឆ្នាំ២០២៤ បានចែករំលែកការលើកឡើងរបស់អ្នកនាង ស្រីអូន ជុំវិញការនិយាយមិនជ្រើសយកគ្រួសារជាធំដោយភ្ជាប់ជាមួយខ្លឹមសារថា «ខ្ញុំសួរខ្លួនឯងតើវាមានប្រយោជន៍អ្វី បើខ្ញុំទទួលបានពិភពលោកទាំងមូលហើយបាត់បង់គ្រួសាររបស់ខ្ញុំ»។ .png)
បវរកញ្ញារូបនេះបានលើកឡើងទៀតថា «បើអ្នកមានទំនាក់ទំនងល្អនៅក្នុងគ្រួសារ គ្រប់ទំនាក់ទំនងរបស់អ្នកដទៃនិងសង្គមខាងក្រៅកាន់តែងាយស្រួល»។ រឿន ណាត បានបន្ថែមក្នុងខម្មិនថា «ក្រៅពីធ្វើជាមនុស្សល្អនៅក្នុងគ្រួសារនិងសង្គមគោលការណ៍ជីវិតដ៏សំខាន់បំផុតរបស់ខ្ញុំគឺធ្វើជាភរិយាដ៏ល្អរបស់មនុស្សម្នាក់នោះ»។
ងាកទៅកាន់ តារាសម្តែងជើងចាស់លោក សាវិន ហ្វីលីព វិញក៏បានលើកឡើងនៅលើបណ្តាញសង្គមដែរថា «ខ្ញុំតែងឱ្យតម្លៃនិងគិតដល់ក្រុមគ្រួសាររបស់ខ្ញុំមុនគេ វាជាផ្នែកមួយដ៏សំខាន់នៃជីវិតខ្ញុំ»។
គួរបញ្ជាក់ថា កញ្ញា រឿន ណាត ត្រៀមបង្ហាញស្នាដៃថ្មីជាមួយលោក លាវ វេងហួរ Mister Friendship International 2023 ក្នុងរឿងប្រភេទហ្សូមប៊ី របស់ផលិតកម្មសាស្រ្តាហ្វៀម។ គ្រាន់តែបញ្ចេញតែចំណងជើង និងរូបភាពក្រៅឆាកបន្តិចប៉ុណ្ណោះភាពយន្តខ្មែរមួយនេះទទួលបានការចាប់អារម្មណ៍យ៉ាងខ្លាំងពីទស្សនិកជន៕
