វណ្ណដា និងតារាច្រើនរូបត្រៀមអន្រួនឆាកតន្រ្តីសប្បុរសធម៌ដើម្បីជួយកុមារកំពុងប្រយុទ្ធប្រឆាំងនឹងជំងឺមហារីក

តារាចម្រៀងរ៉េប ម៉ាន់ វណ្ណដា យូហៃ ម្ចាស់ពាន The Rapper Cambodia និងតារាកិត្តិយសជាច្រើនរូបទៀតនឹងមានការប្រគំតន្រ្តីសប្បុរសធម៌ដ៏ធំមួយមានឈ្មោះថា « Journey From The Heart » ដើម្បីជួយកុមារដែលកំពុងប្រយុទ្ធប្រឆាំងនឹងជំងឺមហារីក ដែលទស្សនិកជនអាចចូលរួមបរិច្ចាគបានទាំងអស់គ្នា។

តាមការប្រកាសបានឱ្យដឹងថា «ការប្រគំតន្ត្រីសប្បុរសធម៌ដ៏ធំប្រចាំឆ្នាំរបស់ហនុមាន “Journey From The Heart“ បានមកដល់ហើយ!នៅពីក្រោយស្នាមញញឹមដ៏ស្រស់ស្អាតសាជាថ្មីរបស់កុមារដែលកំពុងប្រយុទ្ធប្រឆាំងនឹងជំងឺមហារីក គឺស្ថិតលើការចូលរួមបរិច្ចាគ និងក្តីស្រឡាញ់ចេញពីបេះដូងយើងទាំងអស់គ្នា»។

កម្មវិធីនេះនឹងមានការចូលរួមពីសិល្បករ និងសិល្បការនីជាច្រើនរូបដូចជាតារាចម្រៀងរ៉េប វណ្ណដា, KingChi គ្រូបង្វឹកកម្មវិធី The Rapper ,Kwan ម្ចាស់បទ «មេឃបើកថ្ងៃ» ដែលសហការជាមួយវណ្ណដា យូហៃ ម្ចាស់ពាន The Rapper Cambodia, Goofy បេក្ខជនTOP3, Roxy ម្ចាស់ពាន Fan Favorite រួមទាំងពិធីករ ពិធីការិនីដ៏មានប្រជាប្រិយភាព លោក អៀង វិច្ឆ័យ និងកញ្ញា ហេង កែវនីតា។

ការប្រគំតន្រ្តីសប្បុរសធម៌នេះធ្វើឡើងនៅថ្ងៃទី២៣ ខែមីនា ឆ្នាំ២០២៤ ដោយទស្សនិកជនអាចចូលរួមទស្សនាដោយសេរី ដែលមានទីតាំងមុខរោងមហោស្រពកោះពេជ្រ។
គួរបញ្ជាក់ថា កាលពីខែសីហា ឆ្នាំ២០២៣ វណ្ណដា បានចូលរួមកម្មវិធីសប្បុរធម៌ «Journey From The Heart » ដោយបានចែករំលែកក្តីស្រលាញ់ជាមួយកុមារអូទីស្សឹមនៅវិទ្យាល័យអប់រំពិសេសតាខ្មៅ ខេត្តកណ្តាល ដែលសកម្មភាពទាំងនេះបានធ្វើឱ្យកុមារៗនៅទីនោះពោរពេញដោយអារម្មណ៍រីករាយពេលបានជួបជាមួយតារាចម្រៀងដ៏ល្បីរូបនេះ៕