បើយោងតាមរបាយការណ៍ចុងក្រោយរបស់ធនាគារពិភពលោកដែលបានប្រកាសនាពេលថ្មីៗនេះ បានឱ្យដឹងថា នៅឆ្នាំ ២០៥០ ពិភពលោកនឹងបង្កើតកាកសំណល់ចំនួន ៣.៤ ពាន់លានតោនក្នុងមួយឆ្នាំ ស្មើនឹងការកើនឡើង ៧០% បើធៀបនឹងបរិមាណកាកសំណល់ក្នុងឆ្នាំ ២០១៦ ខណៈដែលបច្ចុប្បន្នការផលិតកាកសំណល់សកលត្រូវបានគេព្យាករណ៍ថានឹងកើនឡើងរហូតដល់ ២.៣ ពាន់លានតោន។ ដូច្នេះកំណើនសំណល់រឹងនៃទីក្រុងសកលនឹងជះឥទ្ធិពលជាចម្បងទៅលើប្រទេសក្រីក្របំផុត ដោយប្រទេសទាំងនោះមិនមានធនធានគ្រប់គ្រាន់ដើម្បីគ្រប់គ្រងកាកសំណល់របស់ពួកគេឱ្យបានត្រឹមត្រូវទេ។
មូលហេតុចម្បងនៃការកើនឡើងបែបនេះ រួមមានការអភិវឌ្ឍន៍សេដ្ឋកិច្ច និងកំណើនប្រជាជន។ អ្នកស្រាវជ្រាវបានរកឃើញថា វាអាចមានទំនាក់ទំនងវិជ្ជមានរវាងការបង្កើតកាកសំណល់ និងកម្រិតប្រាក់ចំណូល។ ពួកគេក៏បានប៉ាន់ប្រមាណថា នៅក្នុងប្រទេសដែលមានប្រាក់ចំណូលខ្ពស់នៅឆ្នាំ ២០៥០ មនុស្សម្នាក់នឹងបង្កើតកាកសំណល់ ១៩% ប្រចាំថ្ងៃ ខណៈប្រទេសដែលមានប្រាក់ចំណូលទាប និងមធ្យម ពួកគេនឹងបង្កើតកាកសំណល់រហូតដល់ ៤០% ឬច្រើនជាងនេះ។ ការរកឃើញនេះបានបង្ហាញឱ្យឃើញថា ការបង្កើតកាកសំណល់នឹងកើនឡើងលឿនក្នុងប្រទេសដែលមានចំណូលទាប។
ហេតុនេះហើយ ពិភពលោកនឹងបង្កើតកាកសំណល់ ០.៧៤ គីឡូក្រាមក្នុងមួយថ្ងៃសម្រាប់មនុស្សម្នាក់ៗ។ នៅក្នុងប្រទេសដែលមានចំណូលទាប ការបង្កើតកាកសំណល់អាចកើនឡើងលើសពីបីដងនៅឆ្នាំ ២០៥០ ហើយវានឹងធ្ងន់ធ្ងរខ្លាំងជាពិសេសនៅតំបន់សាហារ៉ាអាហ្រ្វិក។ ដោយកាកសំណល់អាហារ និងកាកសំណល់បៃតងមានច្រើនជាង ៥០% នៃកាកសំណល់សរុបនៅក្នុងប្រទេសដែលមានចំណូលទាប និងមធ្យម។ រីឯនៅក្នុងប្រទេសដែលមានប្រាក់ចំណូលខ្ពស់វិញ សមាមាត្រនៃកាកសំណល់វេចខ្ចប់មានកម្រិតទាបជាង ហើយសមាមាត្រនៃកាកសំណល់មិនមែនសរីរាង្គគឺខ្ពស់ជាង។
នៅទូទាំងពិភពលោក ៣៧% នៃកាកសំណល់ត្រូវបានបោះចោលក្នុងទម្រង់នៃការចាក់សំរាមមួយចំនួន មានតែ ៨% ប៉ុណ្ណោះដែលជាអនាម័យ និងប្រើប្រាស់ប្រព័ន្ធប្រមូលឧស្ម័ន។ កាកសំណល់ដែលបោះចោលដោយបើកចំហមានចំនួន ៣៣% ដែលបរិមាណសំណល់កែច្នៃ និងជីកំប៉ុសមានចំនួន ១៩% ហើយទីបំផុត ១១% ប្រើប្រាស់ប្រព័ន្ធដុតសំរាមទំនើប។ បើយោងតាមអង្គការសហប្រជាជាតិ ការបំពុលនឹងបន្តកើនឡើងជាមួយអត្រាកំណើនសំរាមលឿនបំផុត រួមជាមួយនឹងការព្រមានអំពីគ្រោះថ្នាក់សុខភាព សេដ្ឋកិច្ច និងបរិស្ថានដ៏គួរឱ្យរន្ធត់ ដែលបរិមាណសំរាមនេះអាចកើនឡើងខ្ពស់។
បើគ្មានវិធានការបន្ទាន់ទេ នៅឆ្នាំ ២០៥០ បរិមាណកាកសំណល់សកលអាចឡើងជិត ៤ ពាន់លានតោន ដែលលើសពីការព្យាករណ៍ពីមុន។ គួរបញ្ជាក់ដែរថា ទាំងនេះគឺជាសកម្មភាពដែលបង្កើនការបញ្ចេញឧស្ម័នផ្ទះកញ្ចក់ បង្កើនហានិភ័យនៃសារធាតុគីមីពុលចូលទៅក្នុងដី ទឹក និងខ្យល់។ លទ្ធផលខាងលើបង្ហាញថា ពិភពលោកត្រូវការផ្លាស់ប្តូរជាបន្ទាន់ទៅកាន់វិធីសាស្រ្ត “សូន្យកាកសំណល់” ខណៈពេលដែលការកែលម្អដំណើរការប្រព្រឹត្តិកម្មកាកសំណល់ ដើម្បីជៀសវាងការបំពុលធ្ងន់ធ្ងរ ការបំភាយឧស្ម័នផ្ទះកញ្ចក់ និងផលប៉ះពាល់អវិជ្ជមានដល់សុខភាពមនុស្ស៕
