អបអរសាទរ! កម្ពុជាជាប់ជាគោលដៅទេសចរណ៍វប្បធម៌ឈានមុខគេប្រចាំតំបន់អាស៊ី ២ ឆ្នាំជាប់ៗគ្នា ២០២២ និង ២០២៣

ប្រទេសកម្ពុជា ដែនដីអច្ឆរិយៈ ដែលសម្បូរដោយវប្បធម៌អរិយធម៌ដ៏ចំណាស់ កាលពីពេលកន្លងទៅនេះ ត្រូវបានចាត់ថ្នាក់ថាជាមជ្ឈមណ្ឌលវប្បធម៌ដ៏ធំ នាំមុខគេធំនៅអាស៊ីអាគ្នេយ៍ ព្រោះបានទាក់ទាញអ្នកធ្វើដំណើរមកពីជុំវិញពិភពលោកមកទស្សនាពីភាពល្អឯកនៃប្រាសាទបុរាណ ព្រះបរមរាជវាំង និងទីតាំងប្រវត្តិសាស្រ្តជាច្រើន។

យោងតាមគេហទំព័រទេសចរណ៍អន្តរជាតិមួយ World Travel Awards គឺបានបោះឆ្នោតឲ្យប្រទេសកម្ពុជាក្លាយជាទិសដៅទេសចរណ៍ឈានមុខគេនៅអាស៊ីរយៈពេល២ឆ្នំាជាប់ៗគ្នា ពោលគឺឆ្នាំ២០២២ និង២០២៣ ដែលទាំងនេះគឺបានសបញ្ជាក់ពីកិត្យានុភាពដ៏ខ្លាំងក្លារបស់ប្រទេស និងជាមោទកភាពសម្រាប់ប្រជាជាតិខ្មែរទាំងមូលលើផ្នែកវប្បធម៌និងទេសចរណ៍។

ពានរង្វាន់ដែលកម្ពុជាបានទទួលស្គាល់ជាអន្តរជាតិខាងលើនេះ គឺជាសក្ខីភាពដែលបង្ហាញអំពីសម្បត្តិបេតិកភណ្ឌវប្បធម៌ដ៏សម្បូរបែប តាមរយៈស្ថាបត្យយកម្មប្រាសាទបុរាណ ទីតាំងប្រវត្តិសាស្រ្តរាប់ពាន់កន្លែង ប្រពៃណីក្នុងស្រុកដ៏រស់ររើក (ដែលជា Soft Power របស់ប្រទេស)ក៏ដូចជាពិធីបុណ្យប្រពៃណីទំនៀមទម្លាប់ជាតិខ្មែរ វប្បធម៌បុរាណ អរិយធម៌ដ៏ចំណាស់ រួមបញ្ចូលជាមួយនឹងទំនើបកម្ម គឺពិតបានទាក់ទាញភ្ញៀវទេសចរជុំវិញពិភពលោកមកទស្សនានិងចង់សិក្សាស្វែងយល់បន្ថែម។

ជាពិសេស ប្រាសាទអង្គរវត្តខ្មែរ នៅលើទឹកដីនៃខេត្តសៀមរាប ដែលបានចូលជាសម្បត្តិបេតិកភណ្ឌពិភពលោកដោយអង្គការយូនីស្កូកាលពីថ្ងៃទី ១៤ ខែធ្នូ ឆ្នាំ១៩៩២ និងជាប់ជាសំណង់អច្ឆរិយៈទី៧នៅលើពិភពលោកទៀតផង។ មិនត្រឹមតែប៉ុណ្ណោះក៏នៅមានប្រាសាទបុរាណតូច ធំយ៉ាងច្រើនសន្ធឹកសន្ធាប់ទៀត ដូចជាប្រាសាទព្រះវិហារ ប្រាសាទសម្បូរព្រៃគក់ ប្រាសាទបន្ទាយស្រី។ល។

ទីក្រុងភ្នំពេញ ជាទីកន្លែងប្រមូលផ្តុំគ្នាយ៉ាងមានភាពមមាលញឹកនិងអ៊ូអរនៅតាមដងផ្លូវ បទពិសោធន៍ដើរផ្សារដ៏គួរឲ្យចាប់អារម្មណ៍ ផ្សាររាត្រី កន្លែងកម្សាន្តរាត្រី ប្រជាពលរដ្ឋខ្មែរមានភាពស្មោះត្រង់រួសរាយរាក់ទាក់ រួមបញ្ចូលជាមួយនឹងភាពស៊ីវីល័យនៃទីក្រុង ខណៈទីតាំងប្រវត្តិសាស្រ្តខ្មែរ សារមន្ទីរ ព្រះបរមរាជវាំងជាដើម ក៏ស្ថិតនៅក្នុងក្រុងភ្នំពេញនេះតែមួយដែលបង្កបានជាភាពសម្បូរបែប និងគួរឲ្យចាប់អារម្មណ៍បំផុតពីសំណាក់ភ្ញៀវទេសចរទាំងជាតិនិងអន្តរជាតិ។

គួរបញ្ជាក់ដែរថា ប្រទេសដែលបានជាប់ក្នុងបញ្ជីទិសដៅទេសចរណ៍វប្បធម៌នៅអាស៊ីឆ្នាំ២០២៣នេះ រួមមាន ថៃ វៀតណាម ជប៉ុន ឥណ្ឌា ស្រីលង្ការ នេប៉ាល់ជាដើម។ រីឯតំណែងលេខ ១ ជាគោលដៅទេសចរណ៍វប្បធម៌ឈានមុខគេ រយៈពេល ៥ ឆ្នាំចុងក្រោយនេះ គឺ ឆ្នាំ ២០២៣ បានលើប្រទេសកម្ពុជា ,ឆ្នាំ២០២២ បានលើប្រទេសកម្ពុជា , ឆ្នាំ២០២១ បានលើប្រទេសថៃ , ឆ្នាំ ២០២០ បានលើប្រទេសវៀតណាម ,និងឆ្នាំ២០១៩ក៏បានលើប្រទេសវៀតណាមផងដែរ៕