មិនមាត់កពីទំនាក់ទំនងតែ Lisa និងអ្នកស្នងមរតកមហាសេដ្ឋីត្រូវបានគេឃើញនៅសហរដ្ឋអាម៉េរិកជាមួយគ្នា

ថ្មីៗនេះវីដេអូនិងរូបថតជាច្រើនសន្លឹករបស់ Lisa សមាជិក BLACKPINK និងលោក Frédéric Arnault ដែលជាអ្នកស្នងមរតកមហាសេដ្ឋីកំពុងតែល្បីខ្លាំងនៅលើប្រព័ន្ធអ៊ីនធឺណិត។ ទំនាក់ទំនងអ្នកទាំងពីរមិនបានប្រកាសជាសាធារណៈនោះទេ ប៉ុន្តែសកម្មភាព Lisa និងកូនមហាសេដ្ឋីរូបនេះស្ទើរតែនៅក្បែរគ្នាគ្រប់ពេលវេលា។

Lisa សមាជិកក្រុម BLACKPINK និង Frédéric Arnault ត្រូវបានគេប្រទះឃើញនៅទីតាំងតែមួយនៅ Miami Beach រដ្ឋ Florida ដែលធ្វើឱ្យមានការចែកចាយយ៉ាងច្រើននៅលើបណ្តាញសង្គម X។ អ្នកទាំងពីរបានរក្សាចម្ងាយពីគ្នាទៅវិញទៅមកបើយោងទៅតាមរូបភាពបង្ហោះ ដោយ Lisa ដើរជាមួយសមាជិកគ្រួសាររបស់ Frédéric Arnault ខណៈ Frédéric Arnault ដើរជាមួយបងប្រុស។

ការរំពឹងនៃទំនាក់ទំនងជិតស្និទ្ធរបស់ Lisa ជាមួយកូនមហាសេដ្ឋី កាន់តែខ្លាំងនៅពេលដែល Frédéric Arnault បានចាប់ផ្តើមតាមដាន Lisa នៅលើ Instagram ក្នុងឆ្នាំ២០២២ ហើយបានចូលទៅចុច Liked ការបង្ហោះរបស់នាងជាបន្តបន្ទាប់។ អ្នកទាំងពីរត្រូវបានគេឃើញជាញឹកញាប់លើបណ្តាញសង្គមពេញមួយឆ្នាំក្នុងឆ្នាំ២០២៣ ប៉ុន្តែអ្នកទាំងពីរមិនដែលបដិសេធឬទទួលស្គាល់ទំនាក់ទំនងជាមួយគ្នាឡើយ។

Lisa កំពុងពង្រីកប្រជាប្រិយភាពរបស់នាងយ៉ាងសកម្មនៅក្នុងប្រទេសបារាំងតាមរយៈការប្តេជ្ញាចិត្តផ្សេងៗ រួមទាំងការសម្តែងនាពេលថ្មីៗនេះនៅក្នុងកម្មវិធីសម្បុរសធម៌ដែលដឹកនាំដោយស្រ្តីទីមួយរបស់ប្រទេសបារាំង។

គួរបញ្ជាក់ថា Frédéric Arnault មានអាយុ ២៩ ឆ្នាំបច្ចុប្បន្នជានាយកប្រតិបត្តិនៃផ្នែកនាឡិការបស់ក្រុមហ៊ុន LVMH គ្រប់គ្រងម៉ាកយីហោប្រណីតជាច្រើន៕