អាហារ ៥ មុខដែលមិនមានថ្ងៃផុតកំណត់ទុកកាន់តែយូរកាន់តែល្អ

ចំពោះស្ត្រីមេផ្ទះគ្រប់រូបប្រាកដជាចង់ដឹងហើយថា តើអាហារប្រភេទណាខ្លះដែលមិនមានថ្ងៃផុតកំណត់ ក៏ដូចជាទុកកាន់យូរកាន់តែល្អ និងទុកកាន់តែយូរ កាន់តែមានតម្លៃ។ ដូច្នេះហើយ KBN News នឹងណែនាំប្រិយមិត្តមកស្គាល់ពីអាហារដែលមិនចេះហួសដឺឡេទាំង ៥ មុខដូចខាងក្រោម៖

១.អំបិល៖ អំបិល គឺជាគ្រឿងទេសដែលអាចខ្វះបាននៅក្នុងផ្ទះបាយ ដោយជាទូទៅអំបិលត្រូវបានគេប្រើជាញឹកញាប់ដើម្បីការពារអាហារពីផ្សិត និងបាក់តេរី។ លើសពីនេះ អំបិលក៏ជាសារធាតុរ៉ែដ៏សំខាន់សម្រាប់សុខភាពរបស់មនុស្សម្នាក់ៗផងដែរ ដូច្នេះហើយ វាមិនចេះខូចនោះទេ គ្រាន់តែទុកវាចោលនៅកន្លែងត្រជាក់ និងស្ងួត គឺគ្រប់គ្រាប់ហើយ។

២.គ្រឿងស្រវឹង៖ ស្រាគ្រប់ប្រភេទ គឺជាភេសជ្ជៈពិសេស ទុកកាន់តែយូរ កាន់តែជ្រួតជ្រាប តម្លៃក៏កាន់តែខ្ពស់ រសជាតិក៏កាន់តែល្អ និងត្រូវបានមនុស្សជាច្រើនចូលចិត្ត។ ទោះជាយ៉ាងណាក៏ដោយ អ្នកគួរចំណាំថាមានតែស្រាដែលផលិតពីគ្រាប់អង្កសុទ្ធប៉ុណ្ណោះ ដែលអាចរក្សាទុកបានយូរ ហើយមិនខូចគុណភាព។

៣.ទឹកឃ្មុំ៖ ទឹកឃ្មុំជាសារធាតុធម្មជាតិដែលមានលក្ខណៈសម្បត្តិប្រឆាំងបាក់តេរីខ្លាំង នឹងរក្សាទុកកាន់តែយូរកាន់តែឆ្ងាញ់ ដូច្នេះទឹកឃ្មុំគ្មានកាលបរិច្ឆេទផុតកំណត់នោះទេ។ អ្នកក៏មិនចាំបាច់រក្សាទុកអាហារនេះក្នុងទូទឹកកកដែរ ដោយគ្រាន់តែរក្សាទុកក្នុងកន្លែងត្រជាក់ និងស្ងួត ឆ្ងាយពីពន្លឺព្រះអាទិត្យទៅបានហើយ។

៤.ទឹកខ្មេះ៖ ទឹកខ្មេះមានអាយុកាលយូរណាស់មកហើយ ដោយសារតែធម្មជាតិអាស៊ីតរបស់វា។ វាមានសមត្ថភាពរក្សាខ្លួនដោយមិនចាំបាច់ដាក់ទូរទឹកកកឡើយ ដោយគ្រាន់តែក្សាទឹកខ្មេះក្នុងកន្លែងត្រជាក់ ងងឹត និងឆ្ងាយពីប្រភពកំដៅ ដើម្បីកុំឱ្យវាខូចគុណភាព គឺគ្រប់គ្រាប់ហើយ។

៥. ទឹកស៊ីអ៊ីវ៖ ទឹកស៊ីអ៊ីវគឺជាគ្រឿងផ្សំមិនអាចខ្វះបានក្នុងផ្ទះបាយ នឹងត្រូវបានគេប្រើប្រាស់គ្រប់គ្រួសារ។ ទឹកស៊ីអ៊ីវអាចប្រើសម្រាប់ជ្រលក់ ឬធ្វើម្ហូបពេលកែច្នៃ ដោយវាមានរសជាតិសម្បូរបែប។ លើសពីនេះទឹកស៊ីអ៊ីវក៏ជាអាហារដែលអាចរក្សាទុកបានយូរផងដែរ ប្រសិនបើទឹកស៊ីអ៊ីវនោះសុទ្ធល្អ និងគ្មានសារធាតុបន្ថែម៕