មនុស្សភាគច្រើនតែងតែអនុវត្តទម្លាប់អាក្រក់ប្រចាំថ្ងៃមួយចំនួនដោយមិនដឹងខ្លួន ដែលទម្លាប់ទាំងនោះអាចមានហានិភ័យខ្ពស់ក្នុងការបំផ្លាញឆ្អឹង និងសន្លាក់ធ្វើឱ្យសុខភាពរាងកាយរបស់យើងទ្រុឌទ្រោមឬចាស់មុនអាយុជាដើម។ ដូច្នេះហើយទម្លាប់អាក្រក់ទាំង ៦ យ៉ាងនោះមានដូចជា៖
១.មិនធ្វើចលនា៖ ការមិនធ្វើចលនា ឬភាពអសកម្មមានផលវិបាកជាច្រើនចំពោះសុខភាពទូទៅ ជាពិសេសហានិភ័យនៃការលើសទម្ងន់ ឬធាត់ដោយសារការញ៉ាំអាហារដោយមិនធ្វើលំហាត់ប្រាណ។ រាងកាយដែលលើសទម្ងន់ដាក់សម្ពាធយ៉ាងខ្លាំងលើសន្លាក់ ជាពិសេសសន្លាក់ជង្គង់ ដែលនាំឱ្យសន្លាក់ចុះខ្សោយមុនពេលវេលា។
២.ពាក់ស្បែកជើងកែង៖ ជារឿយៗស្ត្រីចូលចិត្តពាក់ស្បែកជើងកែងខ្ពស់ ដើម្បីបង្កើនរូបរាង និងបង្កើនទំនុកចិត្ត។ ទោះជាយ៉ាងណាក៏ដោយ ការពាក់ស្បែកជើងប្រភេទនេះ នឹងដាក់សម្ពាធដោយអចេតនាលើកែងជើង សាច់ដុំកំភួនជើង និងចង្កេះ ក៏ដូចជាធ្វើឱ្យសាច់ដុំ និងសរសៃពួរមានការលំបាកយ៉ាងខ្លាំង រួមទាំងបណ្តាលឱ្យប៉ះពាល់ដល់សន្លាក់ទៀតផង។
៣.ទម្លាប់កាច់ដៃ កាច់ជើង៖ មនុស្សភាគច្រើនតែងតែមានទម្លាប់កាច់ដៃ កាច់ជើង នៅពេលដែលនឿយហត់ក្នុងកន្លែងធ្វើការ ព្រោះគិតថាការធ្វើវិធីនេះនឹងកាត់បន្ថយការអស់កម្លាំងសន្លាក់។ ទោះជាយ៉ាងណាក៏ដោយ នេះគឺជាទម្លាប់ដ៏គ្រោះថ្នាក់មួយសម្រាប់ឆ្អឹង និងសន្លាក់ ព្រោះវាងាយនឹងបង្កជារបួសដល់ឆ្អឹងខ្ចី។ ដូច្នេះ ការកាច់កែងដៃញឹកញាប់ក៏ជាមូលហេតុនៃការពន្លឿនភាពចាស់ដែលបណ្តាលឱ្យមានជំងឺពុកឆ្អឹង និងការឈឺសន្លាក់ផងដែរ ។
៤.អង្គុយមួយកន្លែង៖ ការអង្គុយនៅកន្លែងមួយក្នុងរយៈពេលយូរជាមួយនឹងឥរិយាបថថេរ នឹងរារាំងឈាមមិនឱ្យចរាចរបានយ៉ាងងាយស្រួលដោយហេតុនេះបង្កើនល្បឿនដំណើរការនៃការពុកឆ្អឹងនិងភាពចាស់។
៥.ជក់បារី៖ ជាតិពុលក្នុងបារីដែលចូលក្នុងខ្លួននឹងប៉ះពាល់ដល់សរសៃឈាម ដែលមិនបានបញ្ជូនទៅសន្លាក់បានគ្រប់គ្រាន់សម្រាប់ការចិញ្ចឹមនឹងបង្កជាជំងឺ។
៦.ពិសាគ្រឿងស្រវឹង និងញ៉ាំអាហាររហ័សជាប្រចាំ៖ ការផឹកស្រា និងញ៉ាំអាហាររហ័សជាប្រចាំ នឹងធ្វើឱ្យរាងកាយខ្វះសារធាតុចិញ្ចឹមដើម្បីចិញ្ចឹមឆ្អឹង និងសន្លាក់ ហើយក៏ប៉ះពាល់ដល់ការស្រូបយក និងដឹកជញ្ជូនកាល់ស្យូមទៅក្នុងស្រទាប់ឆ្អឹងផងដែរ លើសពីនេះ វាក៏នឹងបង្កើនហានិភ័យនៃជំងឺឆ្អឹង និងសន្លាក់យ៉ាងរហ័សទៀតផង៕
