សំបូរ ជាដំរីមួយក្បាល ធ្លាប់បម្រើការជាអ្នកដឹកភ្ញៀវទេសចរណ៍នៅជុំវិញតំបន់វត្តភ្នំអស់រយៈពេល៣០ឆ្នាំ មុនពេលដែលត្រូវបញ្ជូនឱ្យមកនៅព្រៃវិញនៅឆ្នាំ២០១៤។
សំបូរ ត្រូវបាន គេយកទៅថែរក្សាទុកក្នុងតំបន់ព្រៃការពារក្នុងស្រុកកែវសីមា ក្នុងជ្រលងភ្នំមួយនៃខេត្តមណ្ឌលគីរី នៅថ្ងៃទី២៩ ខែវិច្ឆិកា ឆ្នាំ២០១៤។
ថ្មីៗនេះ សំបូរ បានបាត់បង់ជីវិតហើយនៅអាយុ៦៣ឆ្នាំ ក្នុងខេត្តមណ្ឌលគិរី ដោយសារឆ្លងជំងឺធ្មេញអស់រយៈពេលជាងមួយខែចុងក្រោយ ដែលធ្វើឱ្យស្ថានភាពទ្រុឌទ្រោមខ្លាំងទៅ មិនមានលទ្ធភាពក្នុងការព្យាបាលទៀត។
សំបូរ ត្រូវបានគេស្គាល់ទាំងជាតិនិងអន្តរជាតិ វាតែងតែបង្ហាញវត្តមាននៅរមណីយដ្ឋានវត្តភ្នំរៀងរាល់ថ្ងៃដើម្បីរង់ចាំដឹកភ្ញៀវទេសចរណ៍ដែលទៅកំសាន្តនៅទីនោះ។ វាបានរស់នៅជាមួយលោកអ៊ំប្រុសម្នាក់ ឈ្មោះ ស៊ិន ស៊ន ក្នុងអំឡុងសម័យសង្គមរាស្ដ្រនិយមរហូតដល់សម័យកម្ពុជាប្រជាធិបតេយ្យរបស់ពួកខ្មែរក្រហម។
នៅសម័យនោះពួកខ្មែរក្រហមបានដកហូតសត្វចតុបាតនេះទុក។ លុះដល់របបខ្មែរក្រហមបានដួលរលំ លោកស៊ន បានស្វែងរកដំរីនេះឡើងវិញហើយបានយកមកចិញ្ចឹមនិងបានប្រើវាក្នុងការដឹកជញ្ជូនភ្ញៀវទេសចរណ៍កំសាន្តនៅជុំវិញវត្តភ្នំ ចាប់តាំងពីទសវត្សរ៍១៩៨០មកម្ល៉េះ។
បើតាមលោក ស៊ិន ស៊ន បានឱ្យដឹងថា មុនចូលនិវត្តន៍សំបូរ បានសម្រាកនៅផ្ទះរបស់លោកអស់រយៈពេលជិតពីរឆ្នាំមកហើយ ដោយសារសំបូរឈឺជើងមុខខាងស្តាំ មិនអាចបម្រើការដឹកភ្ញៀវទេសចរណ៍បានទៀត៕
