បរទេស៖ យោងតាមប្រភពព័ត៌មាន CNN បានឱ្យដឹងថា គ្រោះរញ្ជួយដីដ៏ខ្លាំងមួយបានវាយប្រហារភាគខាងលិចប្រទេសអាហ្វហ្គានីស្ថានកាលពីថ្ងៃទី ៨ ខែតុលាកន្លងទៅ ដែលបណ្តាលឱ្យមនុស្ស ២,០៥៣ នាក់បាត់បង់ជីវិត និង ១,២៤០ នាក់ទៀតរងរបួស រួមទាំងផ្ទះចំនួន ១,៣២០ ខ្នងត្រូវបានបំផ្លាញទាំងស្រុង ដែលធ្វើឱ្យអ្នកស្រុកនៅទីនោះគ្មានកន្លែងស្នាក់នៅ។
ការរញ្ជួយនេះដីមានកម្រិត ៦.៣ រិចទ័រដែលបានវាយប្រហារក្នុងទីក្រុង Herat ភាគខាងលិចប្រទេសអាហ្វហ្គានីស្ថាន នឹងជាទីក្រុងធំជាងគេក្នុងប្រទេសនេះផងដែរ។
លោក Zabihullah Mojahid អ្នកនាំពាក្យក្រុមតាលីបង់បាននិយាយថា ក្រុមជួយសង្គ្រោះបានទៅដល់ទីក្រុង Herat ហើយអាហារ ទឹក ថ្នាំពេទ្យ និងសំលៀកបំពាក់ក៏ត្រូវបានបញ្ជូនទៅកាន់កន្លែងនោះដែរ។
ទោះជាយ៉ាងណាក៏ដោយ យោងតាមរូបភាពបានបង្ហាញពីគំនរបាក់បែកដ៏ធំសម្បើមបន្ទាប់ពីអគារបានដួលរលំ រីឯហ្វូងមនុស្សនៅរស់រានមានជីវិតបានប្រមូលផ្តុំគ្នានៅតាមផ្លូវដើម្បីសុវត្ថិភាព។
អង្គការសហប្រជាជាតិបាននិយាយថា បច្ចុប្បន្នតំបន់ដែលអាចនឹងជួបគ្រោះរញ្ជួយដីមានប្រហែល ២០ តំបន់រួមមាន Dasht Hows, Bahadorzai, Zoryan និង Koshkak…។ លើសពីនេះ គ្រួសារប្រមាណ ៣០០ (ប្រហែល ២,១០០ នាក់) ត្រូវបានរាយការណ៍ថានឹងផ្លាស់ទីលំនៅទៅទីក្រុងណាដែលមានសុវត្ថភាពបំផុត។
ទោះជាយ៉ាងណាក៏ដោយ បច្ចុប្បន្នប្រទេសអាហ្វហ្គានីស្ថានបានរងការខូចខាតយ៉ាងធ្ងន់ធ្ងរពីការរញ្ជួយដីជាបន្តបន្ទាប់ ចំពេលមានវិបត្តិសេដ្ឋកិច្ច និងគ្រោះអត់ឃ្លានដ៏ធ្ងន់ធ្ងរដែលកំពុងបន្តសម្លាប់ និងជម្លៀសមនុស្សរាប់ម៉ឺននាក់រួមផ្សំគ្នា។ ប្រទេសនេះក៏បានក្លាយជាប្រទេសក្រីក្របំផុតមួយនៅអាស៊ីជាយូរមកហើយ ហើយក៏ត្រូវបានបំផ្លាញដោយជម្លោះអស់ជាច្រើនទសវត្សរ៍ផងដែរ៕
