ជនបរទេសតែម្នាក់គត់នៅក្នុងកម្មវិធី The Voice Cambodia រដូវកាលទី៣ កញ្ញា ហ៊ូអ៊ីន ហ្វាង បានធ្លាក់ចេញពីកម្មវិធីហើយបន្ទាប់ពីឆ្លងកាត់អស់ជាច្រើនវគ្គដោយក្នុងវគ្គ Live Show សប្តាហ៍ទី៤ គ្រូបង្វឹក ពេជ្រ សោភា សម្រេចជ្រើសយក លឹម សេរីហានីកា និងបង្ខំចិត្តបោះបង់រូបនាង។
បេក្ខនារីដែលជាជនជាតិកូរ៉េ ហ៊ូអ៊ីន ហ្វាង អាចចាត់ទុកថាជាបេក្ខនារីលេចធ្លោមួយរូបនៅក្នុងកម្មវិធីប្រលងចម្រៀងលំដាប់ពិភពលោក The Voice Cambodia រដូវកាលទី៣ របស់ស្ថានីយទូរទស្សន៍ហង្សមាស។ ការចាត់ទុកនារីកូរ៉េរូបនេះជាបេក្ខនារីលេចធ្លោនោះដោយសារសមត្ថភាពរបស់ ហ៊ូអ៊ីន មិនធម្មតាដោយត្រូវប្រកួតប្រជែងជាមួយបេក្ខជនខ្លាំងៗជាច្រើនប៉ុន្តែរូបនាងនៅតែអាចខាបបេះដូងរបស់គ្រូបង្វឹកផ្ទាល់គឺអ្នកនាង ពេជ្រ សោភា សម្រេចចិត្តជ្រើសយក ហ៊ូអ៊ីន ឱ្យបន្តជាច្រើនវគ្គរហូតឈានមកដល់វគ្គ Live Show សប្តាហ៍ទី៤។
រាត្រីវគ្គ Live Show សប្តាហ៍ទី៤ ថ្ងៃទី១៧ ខែកញ្ញា ហ៊ូអ៊ីន ហ្វាង បានបកស្រាយបទចម្រៀងមួយបទជាភាសាអង់គ្លេសមានចំណងជើងថា «Someone Like You» ដែលជាសំនៀងដើម Adele ហើយបទនេះមិនងាយស្រួលបកស្រាយឡើយ។
ស្ថិតក្នុងចំណោម៣នាក់សម្រាប់កូនក្រុម ពេជ្រ សោភា រួមមានបេក្ខជន ស៊ុន វេហា បេក្ខនារី ហ៊ូអ៊ីន ហ្វាង និង លឹម សេរីហានីកា , វេហា ទទួលបានសំឡេងផ្ញើសារគាំទ្រច្រើនជាងគេនៅក្នុងក្រុម ខណៈនៅសល់២នាក់ខូចស៍ ពេជ្រ សោភា សម្រេចចិត្តបោះបង់ ហ៊ូអ៊ីន ហ្វាង ដោយសម្រេចចិត្តជ្រើស នីកា ឱ្យបន្តទៅវគ្គពាក់កណ្តាលផ្តាច់ព័្រត្រ។
គួរបញ្ជាក់ផងដែរថា ហ៊ូអ៊ីន ហ្វាង មានអាយុ២៣ឆ្នាំមានស្រុកកំណើតនៅក្នុងទីក្រុងសេអ៊ូល ប្រទេសកូរ៉េខាងត្បូង ហើយក្រុមគ្រួសាររបស់នាងបានមករស់នៅប្រទេសខ្មែរ១០ឆ្នាំហើយ។ ហ៊ូអ៊ីន បានក្លាយជាជនបរទេសតែមួយគត់ចូលរួមប្រកួតកម្មវិធីនេះដែលធ្វើឱ្យមានការចាប់អារម្មណ៍យ៉ាងខ្លាំងពីសំណាក់មហាជន៕
