មហាជនជាច្រើនហាក់សម្តែងការចាប់អារម្មណ៍ច្រើន ពាក់ព័ន្ធនឹងការសិក្សាធ្វើបណ្ណបើកបរទោចក្រយានយន្ត(ម៉ូតូ) ដែលមានកម្លាំងចាប់ពី«60CC»ឡើងទៅ។ ចុះអ្នកទាំងអស់គ្នាមានដែរដឹងទេថា ច្បាប់នៃព្រះរាជាណាចក្រកម្ពុជា តម្រូវឱ្យយានយន្តណាខ្លះ ត្រូវតែមានបណ្ណបើកបរ?
យោងតាមមាត្រា៤០ថ្មី នៃច្បាប់ស្តីពីចរាចរណ៍ផ្លូវគោក និងវិសោធនកម្ម ចែងថា បណ្ណបើកបរជាតិសម្រាប់បើកបរយានយន្តក្នុងព្រះរាជាណាចក្រកម្ពុជា មាន ៥ប្រភេទ គឺប្រភេទ ក ខ គ ឃ និង ង។
ប្រភេទ ក៖
- ទោចក្រយានយន្ត ដែលមានទំហំស៊ីឡាំងលើសពី ១២៥សង់ទីម៉ែត្រគូប (CC) ឬមានថាមពលអគ្គិសនីលើសពី ១១គីឡូវ៉ាត់
ទោចក្រយានយន្តសណ្តោងររឺម៉កនិងត្រីចក្រយានយន្ត។
ប្រភេទ ខ៖
- រថយន្តដឹកអ្នកដំណើរមិនលើសពី ៩នាក់ ដោយគិតទាំងអ្នកបើកបរ
- រថយន្តដឹកទំនិញ ដែលមានទម្ងន់សរុបអតិបរមាមិនលើសពី ៣,៥តោន
• រថយន្តក្នុងប្រភេទខនេះ អាចសណ្តោងរ៉ឺម៉កដែលមានទម្ងន់សរុបអតិបរមាមិនលើសពី ០,៧៥តោន។
ប្រភេទ គ៖
- រថយន្តដឹកជំនិញដែលមានទម្ងន់សរុបអតិបរមាលើសពី ៣,៥តោន និងអាចសណ្តោងរ៉ឺម៉កដែលមានទម្ងន់សរុបអតិបរមាមិនលើសពី ០,៧៥តោន។
ប្រភេទ ឃ៖ រថយន្តដឹកអ្នកដំណើរ៖
- ឃ១: រថយន្តដឹកអ្នកដំណើរចាប់ពី ១០នាក់ ដល់ ២០នាក់ ដោយគិតទាំងអ្នកបើកបរ និងអាចមានសណ្តោងរ៉ឺម៉កដែលមានទម្ងន់សរុបអតិបរមាមិនលើសពី ០,៧៥តោន។
- ឃ២: រថយន្តដឹកអ្នកដំណើរលើសពី ២០នាក់ ដោយគិតទាំងអ្នកបើកបរ និងអាចមានសណ្តោងរ៉ឺម៉ក ដែលមានទម្ងន់សរុបអតិបរមា មិនលើសពី ០,៧៥តោន។
ប្រភេទ ង៖
- រថយន្តប្រភេទ ខ គ និង ឃ មានសណ្តោងរ៉ឺម៉កដែលមានទម្ងន់សរុបអតិបរមាលើសពី ០,៧៥តោន ត្រូវចែកជា៣ប្រភេទ គឺ ប្រភទ ង(ខ) ប្រភេទ ង (គ) និងប្រភេទ ង (ឃ)៕
