កោះទទឹង គឺជាកោះមួយ ដែលស្ថិតនៅក្នុងទឹកដី ឃុំកោះស្ដេច ស្រុកគីរីសាគរ ខេត្តកោះកុង បើតាមមើលទេសភាពនៃកោះនេះ ពិតជាស្រស់ស្អាតមិនចាញ់កោះដទៃឡើយ។ កោះនេះលាតសន្ធឹងប្រមាណជាជិត ១គីឡូម៉ែត្រការ៉េ។ កោះទទឹង ជាដែនកោះដ៏តូចមួយ មានទេសភាពគួរអោយចង់គយគន់មិនជិនណាយ ក៏ប៉ុន្តែកោះនេះមិនសូវមានភ្ញៀវទេសចរណ៍ទៅដល់ ឬ ស្គាល់នោះទេ។
កោះទទឹងគឺជាទីស្ថានដ៏សមប្រកបបំផុតសម្រាប់ភ្ញៀវទេសចរដែលចូលចិត្តបរិយាកាសស្ងប់ស្ងាត់ និងរស់នៅជាមួយធម្មជាតិ។
ដើម្បីបានទៅកម្សាន្តនៅលើកោះនេះ ភ្ញៀវទេសចរអាចធ្វើដំណើរតាមអូប័រ ពីផែកោះស្ដេច ឆ្ពោះទៅទិសពាយព្យ ក្នុងចម្ងាយប្រមាណ ៥គីឡូម៉ែត្រប៉ុណ្ណោ។ ប្រសិនបើចង់សម្រាកស្នាក់នៅគេត្រូវកក់ទុកជាមុន ព្រោះកន្លែងសម្រាក មិនមានច្រើននោះទេ។
បើនិយាយពីសម្រស់ធម្មជាតិវិញ មានខ្យល់បរិសុទ្ធ បរិយាកាសស្ងបើស្ងាត់ល្អ និងមានទឹកថ្លាខៀវខ្ចីមើលធ្លុះដល់បាតសមុទ្រ ឃើញសម្រស់ហ្វូងមច្ឆា និងផ្កាថ្មជាច្រើនប្រភេទ។ ទាំងនេះជាអ្វីដែលកោះទទឹងបានទាក់ទាញភ្ញៀវទេសចរណ៍ដែលមកកម្សាន្តហើយ ចង់មកម្តងទៀត៕
