ធ្លាប់ដឹងអត់! Master Card និង Visa Card ខុសគ្នាដូចម្តេច?

Master Card និង Visa Card ជាប្រភេទកាតធនាគារ ដែលត្រូវបានគេយកមកប្រើប្រាស់ក្នុងវិស័យ ហិរញ្ញវត្ថុ សំរាប់បម្រើសេវាផ្នែកហិរញ្ញវត្ថុប្រចាំថ្ងៃ ហើយវាមានភាពងាយស្រួលដោយមិនចាំបាច់​មានសាច់ប្រាក់ស្រស់ក្នុងដៃ។ មានមនុស្សមួយចំនួន ប្រហែលជា នៅមានចម្ងល់នៅឡើយ តើ​ប្រភេទកាតទាំង២នេះ ខុសគ្នាដូចម្តេច?

កាតទាំងពីរនេះ ជាប្រភេទកាតគណនី​ធនាគារ ដែលគេប្រើប្រាស់សំរាប់ដកសាច់ប្រាក់ពី ទូរម៉ាស៊ីន​ ATM ហើយត្រូវបានគេប្រើប្រាស់​យ៉ាងទូលំទូលាយទូទាំងសកលលោក។

Master Card និង Visa Card អាចចែកចេញជា បណ្ណឥតពន្ធ (Debit Card) និងកាតឥណទាន (Credit Card) ដែល Debit Card គឺជាកាតនៃគណនីធនាគារ​ដែលអតិថិជនប្រើប្រាស់ សម្រាប់ការទិញដូរ​ទំនិញ តាមផ្សារទំនើបនានា ដោយមិនចាំបាច់ប្រើក្រដាស់ប្រាក់ក្នុងការទិញ ទំនិញឡើយ។ នៅពេលប្រើប្រាស់កាតប្រភេទនេះ ក្នុងការទិញទំនិញតាមអនឡាញ ឬតាមផ្សារ ទំនើបនានា នោះលុយរបស់អ្នកដែលមានក្នុងគណនីធនាគារ និងត្រូវដករឺកាត់យកទៅបង់ថ្លៃ ទំនិញដែលអ្នកបានទិញតាមហាងអនអលាញ​ឬផ្សារទំនើបណាមួយ ដែលជាបើកប្រតិបត្តិការ ទូទាត់ថ្លៃទំនិញជាមួយ ធនាគារ ដែលអ្នកកំពុងប្រើប្រាស់សេវា Debit Card (Visa or Master Card) នេះតាមរយៈការឆូត កាតដើម្បីទូទាត់ថ្លៃទំនិញ។

ដោយឡែក កាតឥណទាន (Credit Card) គឺជាកាតនៃគណនីធនាគារដែលអតិថិជនប្រើប្រាស់ សម្រាប់ការទិញដូរទំនិញតាមអនឡាញ ឬផ្សារទំនើបនានា ដោយមិនចាំបាច់ប្រើក្រដាស់ប្រាក់ ក្នុងការទិញទំនិញឡើយ។ តាមពិតទៅ កាតឥណទាននេះ គឺត្រូវបានគេប្រើប្រាស់ក្នុងន័យជា លក្ខណៈខ្ចីលុយពីធនាគារដើម្បីយកប្រើប្រាស់ក្នុងការចាយវាយប្រចាំថ្ងៃ រួចហើយពួកគេបង់លុយ ទៅខាងធនាគារនៅពេលណាមួយនៅពេលក្រោយដោយសងទាំងដើម និងការប្រាក់ផងដែរ៕

ប្រភព៖ Money