កាលពីពេលថ្មីៗនេះ ម្ចាស់មេដាយមាសសុីហ្គេម២០២៣ លើវិញ្ញាសាកីឡាប៊ីយ៉ាការ៉ុម អ្នកនាងស្រួង ភាវី បានក្លាយជាទូតសុច្ឆន្ទៈរបស់ក្រុមហ៊ុនអាកាសចរណ៍ ស្កាយអង្គរ SKY ANGKOR។
នៅក្នុងការធ្វើជាទូតសុច្ឆន្ទៈ អ្នកនាងស្រួង ភាវី បានបញ្ជាក់ថា៖”ការចុះកុងត្រានេះខ្ញុំមិនយកប្រាក់សម្រាប់ខ្លួនឯងទេ គឺខ្ញុំបានបង្វិលទៅជាកិច្ចការសប្បុរសធម៌វិញ”។
យោងទៅតាមការបង្ហោះនៅលើទំព័រផ្លូវការរបស់អ្នកនាងបានឱ្យដឹងថា៖”សូមជម្រាបពុកម៉ែបងប្អូន!
នាងខ្ញុំបានចុះកុងត្រាជាមួយក្រុមហ៊ុនអាកាសចរណ៍ ស្កាយអង្គរ SKY ANGKOR ក្នុងនាមជាទូតសុច្ឆន្ទៈរបស់ក្រុមហ៊ុន។
ការចុះកុងត្រានេះខ្ញុំមិនយកប្រាក់សម្រាប់ខ្លួនឯងទេ គឺខ្ញុំបានបង្វិលទៅជាកិច្ចការសប្បុរសធម៌វិញ។ គឺថាប្រសិនបើខ្ញុំត្រូវមានកិច្ចការសប្បុរសធម៌ត្រូវធ្វើ ឬមានប្អូនៗ ក៏ដូចជាប្រជាជនខ្មែរយើងដែលមានជីវភាពខ្វះខាត ហើយត្រូវបានអង្គការសប្បុរសធម៌របស់នាងខ្ញុំធានាពួកគាត់មកព្យាបាលជំងឺនៅប្រទេសកូរ៉េ គឺមិនតម្រូវឱ្យយកប្រាក់ពីពួកគាត់ឡេីយ។ ការស្នើលក្ខខណ្ឌរបស់នាងខ្ញុំនេះ គឺបានខាងក្រុមហ៊ុនទទួលយល់ព្រមដោយសេចក្ដីសោមនស្សរីករាយទាំងអស់គ្នា។ ខ្ញុំមានខ្លួនតែមួយ រាល់កិច្ចការដែលខ្ញុំទទួលធ្វើទាំងអស់គឺជាអម្រែកដ៏ធំធេង ប៉ុន្តែការលះបង់ទាំងប៉ុន្មានរបស់ខ្ញុំវាមានតម្លៃធំធេងពេកសម្រាប់ប្រទេសក៏ដូចជាប្រជាជនខ្ញុំ ទេីបធ្វើឱ្យខ្ញុំញញឹមទទួលធ្វើទាំងដឹងថាវាជាអម្រែកដ៏ធំធេង”។
បច្ចុប្បន្ន អ្នកនាង ស្រួង ភាវី មានមូលនិធិសប្បុរសធម៌មួយរបស់ខ្លួន ដែលតែងតែជួយកុមារកម្ពុជារាប់ពាន់នាក់ ដែលមានជីវភាពខ្វះខាត ឬមានជំងឺប្រចាំកាយជាដើម។
សូមរំលឹកផងដែរថា នេះមិនមែនជាលើកទីមួយនោះទេសម្រាប់អ្នកនាង ស្រួង ភាវី ក្នុងកិច្ចការមនុស្សធម៌នោះ ជាក់ស្តែង កាលពីថ្ងៃទី១៨ ខែឧសភា ឆ្នាំ២០២៣កន្លងទៅនេះ អ្នកនាង ក៏បាននាំយកថវិការដែលបានមកពីការឈ្នះព្រឹត្តិការណ៍សុីហ្គេមលើកទី៣២ ទៅបរិច្ចាកជួយដល់កុមារកម្ពុជាផងដែរ៕
