នៅរសៀលថ្ងៃទី០៨ ខែឧសភា ឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្រ្តីកម្ពុជាបានផ្ញើសារសំឡេងអំពាវនាវសុំឱ្យឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការរាជអាវុធហត្ថលើផ្ទៃប្រទេស និងជាប្រធានសហព័ន្ធកីឡាបាល់ទាត់កម្ពុជា ឱ្យបន្ដដឹកនាំការងារនេះតទៅមុខទៀត។
សម្តេចបានគូសបញ្ជាក់ថា «ចាប់តាំងពីឯកឧត្តម សៅ សុខា ទទួលតំណែងជាប្រធានសហព័ន្ធកីឡាបាល់ទាត់កម្ពុជា កីឡាបាល់ទាត់កម្ពុជាមានការរីកចម្រើនឈានឡើងជាលំដាប់បើទោះបីជាការលេងរបស់យើងមានលទ្ធផលមិនទាន់បានការចង់បានរបស់យើង តែយើងបានដើរឆ្ងាយចេញពីពេលមុន»។
សម្តេច ក៏បានបន្ថែមទៀតថា ការអំពាវនាវឱ្យឯកឧត្តមនាយឧត្តមសេនីយ៍ សៅ សុខា បន្តធ្វើជាប្រធានសហព័ន្ធកីឡាបាត់ទាល់ជាបន្តទៀត សម្តេច សង្ឃឹមថាឯកឧត្តម សៅ សុខា នៅជាមួយសម្តេចអស់រយៈពេល៤៦ឆ្នាំរួចមកហើយនោះ នឹងទទួលយកនូវសំណូមពររបស់សម្តេច។
«ខ្ញុំគ្មានសិទ្ធិដាក់បញ្ជាទៅលើសហព័ន្ធកីឡាបាល់ទាត់នោះទេ ប៉ុន្តែខ្ញុំមានសំណូមពរក្នុងនាមរដ្ឋាភិបាលកម្ពុជា ឱ្យឯកឧត្តម សៅ សុខា បន្តការដឹកនាំកីឡាបាត់ទាល់បន្តទៀត សូមឱ្យ ឯកឧត្តម សៅ សុខា ទទួលយកនូវកិច្ចការដ៏សំខាន់នេះដើម្បីការរីកចម្រើនរបស់កីឡាបាត់ទាត់»។ នេះជាការលើកឡើងរបស់សម្តេចតេជោ ។
គួរបញ្ជាក់ថា ឯកឧត្តមនាយឧត្តមសេនីយ៍ សៅ សុខា បានប្រកាសសុំលាលែងពីតំណែងភ្លាមៗនៅយប់ថ្ងៃទី៧ ខែឧសភា ក្រោយពីក្រុមបាល់ទាត់ជម្រើសជាតិកម្ពុជាចាញ់ក្រុមជម្រើសជាតិមីយ៉ាន់ម៉ា ដោយគោរពតាមការសន្យារបស់ប្រសិនបើក្រុមបាល់ទាត់កម្ពុជាមិនអាចឈានដល់វគ្គពាក់កណ្តាលផ្តាច់ព្រ័ត្របាន៕
