ឧកញ៉ា ខេមរៈ សិរីមន្ត ទើបតែចូលក្នុងទ្រនំហ្គោឡាក់ស៊ីមែនពិត តែសន្ទុះនៃការគាំទ្ររបស់លោកមិនធម្មតាបទចម្រៀងទម្លាក់លើទីផ្សារមានអ្នកទស្សនាខ្ទង់លានច្រើនបទ ជាពិសេសបទកំពុងពេញនិយមមានចំណងជើងថា «ទយៗ» និងបទ«ផឹកកំដរពួកម៉ាកsad» ដែលបកស្រាយរួមគ្នាជាមួយតារាចម្រៀង ខេម ដើម្បីអបអរសាទរបុណ្យចូលឆ្នាំខ្មែរជាដើម។
អ្វីដែលហួសចិត្តនោះ កាលពីថ្ងៃទី៩ ខែមេសា ឧកញ៉ា ខេមរៈ សិរីមន្ត បានបង្ហោះរូបភាពបែបខ្យូតមួយសន្លឹកនៅលើបណ្តាញសង្គមហ្វេកប៊ុកមុនជួបអ្នកគាំទ្រនៅខេត្តកំពង់ធំ ប៉ុន្តែបែរជាអ្នកលេងបណ្តាញសង្គមម្នាក់ចូលមកខំមិនថាឧកញ៉ា ខេមរៈ សិរីមន្ត «ដូចខ្ទើយ» ទៅវិញ។
ជាមួយការខំមិនបែបនេះ ម្ចាស់បទពើតៗបានចូលទៅតបស្រាលៗតែចុកខ្លាំង ធ្វើឱ្យអ្នកគាំទ្រផ្ទុះសំណើចសឹងគ្រប់គ្នា។ ឧកញ៉ា ខេមរៈ សិរីមន្ត តបអ្នកថាលោកដូចខ្ទើយថា « ខ្ទើយបងកូនបីហើយ ចូលចិត្តណាស់កញ្ញាណារាំទយៗ..»។
គួរបញ្ជាក់ផងដែរថា តារាចម្រៀងងារជាឧកញ៉ារូបនេះបានភ្ជាប់ចំណងស្នេហ៍ជាមួយអ្នកនាងកុយ ផល្លី ក្នុងឆ្នាំ២០០៩ ហើយបច្ចុប្បន្នអ្នកទាំងពីរមានកូនប្រុសស្រីគួរឱ្យស្រឡាញ់៣នាក់ជាចំណងដៃ។ បន្ថែមពីលើនេះ ភរិយា ឧកញ៉ាខេមរៈ សិរីមន្ត ត្រូវមហាជនពោលសរសើរមិនដាច់ពីមាត់ថា អ្នកនាងយកចិត្តទុកដាក់ចំពោះស្វាមីណាស់ តាមមើលថែទោះនៅកន្លែងថតក៏ដោយ៕
