ស្គាល់អត្តសញ្ញាណបុរសដែលប្រើអំពើហិង្សាលើនារីរងគ្រោះហើយ ខណៈស្នងការនគរបាលបញ្ជាឱ្យ ស្វែងរកបុរសនោះមកសួរនាំនិងចាត់ការតាមផ្លូវច្បាប់

នាថ្ងៃទី២៧ ខែមីនា ឆ្នាំ២០២៣ នេះ ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យតាមស្វែងរកបុរស ដែលប្រើអំពើហិង្សា ដោយយកមួកសុវត្ថិភាពវាយលើក្បាលស្ដ្រីម្នាក់ ក្រោយវីដេអូផ្ទុះកក្រើកពេញបណ្តាញសង្គម។ បើតាមការឱ្យដឹងពីអធិការនគរបាលខណ្ឌទួលគោកបានឱ្យដឹងថា បុរសនិងស្រ្តីរូបនោះគឺជាប្តីប្រពន្ធនឹងគ្នា។

អ្នកនាំពាក្យស្នងការនគរបាលរាជធានីភ្នំពេញ ឧត្តមសេនីយ៍ត្រី សាន សុខសីហា បានថ្លែងប្រាប់សារព័ត៌មានក្នុងស្រុកមួយថា ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យស្វែងរកបុរសម្នាក់ដែលប្រើអំពើហិង្សាលើនារីម្នាក់ដោយយកមួកសុវត្ថិភាពវាយលើក្បាល នៅស្ដុបសន្ធរម៉ុខ ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ដើម្បីសួរនាំ និងចាត់ការតាមនីតិវិធីច្បាប់។

ជាមួយគ្នានេះដែរ តាមការបញ្ជាក់ពីលោក ស៊ឹម ពិសិដ្ឋ អធិការនគរបាលខណ្ឌទួលគោក បានឱ្យដឹងថា ពួកគេទាំង២នាក់ជាប្តីប្រពន្ធ ហើយរស់នៅសង្កាត់បឹងសាឡាង ខណៈសមត្ថកិច្ចកំពុងតាមស្រាវជ្រាវ។

គួរបញ្ជាក់ថា កាលពីយប់ថ្ងៃទី២៦ ខែមីនា មានគណនីហ្វេកប៊ុក មួយបានបង្ហោះវីដេអូខ្លីប្រមាណ៩វិនាទី ដោយមានបុរសម្នាក់យកមួកសុវត្ថិភាពវាយលើនារីម្នាក់យ៉ាងដំណំដោយមិនដឹងមូលហេតុ៕