ប្រទេសថៃ ៖ មន្ត្រីការិយាល័យគយតំបន់៤ និងក្រុមការងារពិសេសកងវរសេនាធំថ្មើរជើងទី៥ បានសហការគ្នាចាប់សាច់ជ្រូកក្លាស្សេចំនួន៣០តោន ស្មើទឹកប្រាក់៦លានបាត ដែលបានលួចនាំចូលមកប្រទេសថៃខុសច្បាប់តាមរយៈរថយន្តកុងតឺន័រ ឆ្លងតាមព្រំដែនស្តៅ ខេត្តសុងខ្លា ។
សាច់ជ្រូកក្លាស្សេនេះបានដាក់នៅក្នុងទូរកុងតឺន័រ ដែលមានការគ្រប់គ្រងសីតុណ្ហភាពនៅក្នុងទូរ រួចផ្ទេរទៅកាន់រថយន្តដឹកទំនិញផ្សេងទៀតនៅបរិវេណកន្លែងដឹកទំនិញ ភូមិទី២ ឃុំសាំណាក់ខាម ស្រុកស្តៅ ខេត្តសុងខ្លា ។
តាមការត្រួតពិនិត្យរបស់មន្ត្រីគយថៃឃើញថា សាច់ជ្រូកក្លាស្សេទាំងនេះបាននាំចេញពីប្រទេសប្រេស៊ីល ហើយពួកគេគ្មានលិខិតអនុញ្ញាតនាំចូល ឬឯកសារពាក់ព័ន្ធផ្សេងៗឡើយ ។.jpg)
ប្រធានការិយាល័យគយតំបន់៤ បានឱ្យដឹងថា ក្រុមមន្ត្រីកំពុងតែត្រួតពិនិត្យសាច់ជ្រូកទាំងនេះថា តើពួកគេនឹងនាំយកទៅណា ដោយបានចាប់ឃុំខ្លួនអ្នកបើកបររថយន្ត និងស៊ើបសួររកអ្នកផ្សេងទៀតដែលពាក់ព័ន្ធនឹងការលួចនាំចូល និងគោលដៅដែលពួកគេប្រុងយកទៅលក់ ។
ប្រធានការិយាល័យគយតំបន់៤ បញ្ជាក់ថា ការចាប់សាច់ជ្រូកក្នុងចំនួនដ៏ច្រើននេះ គឺជាការចាប់រឹបអូសជាលើកដំបូងដែលមានការលួចនាំចូលមកតាមច្រកព្រំដែនស្តៅ ។ កាលពីពេលកន្លងមក ជនខិលខូចតែងលួចនាំសាច់សត្វចូលមកបង្កប់ជាមួយទំនិញផ្សេងៗ ហើយខាងមន្ត្រីក៏បានចាប់រឹបអូសជាច្រើនលើកផងដែរ រីឯសាច់ជ្រូកក្លាស្សេដែលចាប់បានលើកនេះ មន្ត្រីនឹងបញ្ជូនទៅនាយកដ្ឋានអភិវឌ្ឍន៍បសុសត្វ ដើម្បីយកទៅកម្ទេចចោល ៕
ប្រភព ៖ Mono News
