រាជធានីភ្នំពេញ ៖ កាលពីប៉ុន្មានម៉ោងនេះ មន្ត្រីជំនាញ នៃអនុគណៈកម្មការស្រាវជ្រាវជំងឺកូវីដ១៩ បានអំពាវនាវជាថ្មីម្ដងទៀត អ្នកពាក់ព័ន្ធ សូមមេត្តាកុំខ្មាសអៀន ដែលធ្លាប់បានទៅទទួលសេវាម៉ាស្សាដោយបុរស នៅហាង «GANESH» ឬធ្លាប់ហៅបុគ្គលិកម៉ាស្សាបុរសៗ ចេញទៅផ្ដល់សេវានៅខាងក្រៅ ចាប់ពីថ្ងៃទី០១ ដល់ថ្ងៃទី១៥ ខែមីនា ឆ្នាំ២០២១ សូមទៅយកសំណាក ពិនិត្យរកមេរោគកូវីដ១៩ និងដាក់ខ្លួននៅដាច់ដោយឡែក(ចត្ដាឡីស័ក) ។
ហាងម៉ាស្សាដោយបុរស មានឈ្មោះ GANESH មានទីតាំង នៅផ្ទះលេខ ២២Z ផ្លូវលេខ៤២០ ភូមិ៤ សង្កាត់បឹងត្របែក ខណ្ឌចំការមន រាជធានីភ្នំពេញ ។
ដាក់ខ្លួនឲ្យនៅដាច់ដោយឡែក ឬប្រសិនបើមានអាការមិនស្រួលខ្លួន ឬសង្ស័យ សូមមេត្តាប្រញាប់ ទៅធ្វើតេស្តរកមេរោគកូវីដ១៩ ដែលមានទីតាំងនៅវិទ្យាល័យបាក់ទូក វិទ្យាល័យបឹងត្របែក មណ្ឌលសុខភាពចាក់អង្រែ មន្ទីរពេទ្យមិត្តភាពខ្មែរ-សូវៀត ឬនៅមន្ទីរពេទ្យបង្អែកនៅតាមបណ្តាខេត្តនានា ដោយឥតគិតថ្លៃ ។
ក្នុងរយៈពេល កន្លងមក រដ្ឋបាលរាជធានីភ្នំពេញ បានរកឃើញបុគ្គលិករបស់អាជីវកម្មម៉ាស្សា Ganesh ចំនួន ០៧ នាក់ ក្នុងចំណោម ០៩នាក់ បានយកសំណោកជាប់ពាក់ព័ន្ធ ព្រឹត្តិការណ៍សហគមន៍ ២០កុម្ភៈ ដែលមានលទ្ធផលតេស្តវិជ្ជមានជំងឺកូវីដ-១៩ ក្នុងនោះ អាជ្ញាធរមូលដ្ឋាន និងមន្ត្រីជំនាញ បានចុះបិទទីតាំងរបស់ លោក នួន វី ម្ចាស់អជីវកម្មរួចរាល់ហើយ ប៉ុន្តែលោក នៅតែបង្កលក្ខណៈដល់បុគ្គលិករបស់ខ្លួន ឲ្យបន្តអាជីវកម្មម៉ាស្សាជូនអតិថិជន តាមរយៈការណាត់ជួបនៅតាមទីតាំងខាងក្រៅ ផ្សេងទៀត ដោយប្រើប្រាស់ប្រព័ន្ធទូរស័ព្ទ និងប្រព័ន្ធទំនាក់ទំនងសង្គមផ្សេងៗ ដែលនេះ គឺជាទង្វើផ្ទុយពីវិធានការណែនាំរបស់ក្រសួងសុខាភិបាល និងអាចនាំទៅដល់ការចម្លងជំងឺកូវីដ១៩ ក្នុងសហគមន៍ កាន់តែធ្ងន់ធ្ងរបន្ថែមទៀត ៕
