ខ្យង ខ្ចៅ កំពិស ជាសត្វដែលងាយស្រួលរកជាទីបំផុត ពពួកសត្វប្រភេទនេះភាគច្រើនវាចូលចិត្តរស់នៅតាមបឹង វាលស្រែ ប្រឡាយ ស្រះ និងតាមថ្លុកជាដើម។ សត្វទាំងនេះ តាំងពីដើមមកគឺជាម្ហូបដ៏ពេញនិយមបំផុតរបស់ប្រជាជនខ្មែរយើង ជាពិសេសបងប្អូននៅតាមទីជនបទ។
ឥឡូវនេះដោយសារតែប្រទេសមានការរីកចំរើន គេចាប់ផ្ដើមលុបបឹងបួរដើម្បីយកដីធ្វើអគារ ហេដ្ឋារចនាសម្ពន្ធ័ផ្សេងៗ ដូចច្នេះវាសូវជាសំបូរដូចមុនទៀតទេ។ ដើម្បីជួយសម្រួលដល់បងប្អូនទាំងអស់ យើងនឹងណែនាំពីរបៀបចិញ្ចឹមកំពិស ខ្យង ខ្ចៅ នៅក្នុងលូដែលវិធីនេះមិនត្រូវការទីកន្លែងធំទូលាយក៏យើងអាចចិញ្ចឹមបាន ងាយស្រួលធ្វើជាលក្ខណៈគ្រួសារដើម្បីបង្កើនប្រាក់ចំណូល។
* ការរៀបចំកន្លែងចិញ្ចឹម៖
– រៀបចំលូដែលមានមុខកាត់១ម៉ែត្រ យកលូចាស់ៗដែលប្រើរួចសាបជាតិស៊ីម៉ងត៍ ប្រសិនបើលូថ្មីត្រូវត្រាំទឹកចោលរយៈពេល១០ថ្ងៃសិន រួចចាក់បិតបាតរបស់វាកុំឲ្យជ្រាប់ទឹកចេញ
– អាចធ្វើនៅកន្លែងដែលមានម្លប់ខ្លះ មិនត្រូវថ្ងៃខ្លាំងពេក
– ដាក់ទឹកបញ្ចូលកម្ពស់៤តឹក និងដាក់ដាំចក ក៏កំប្លោក និងស្លឹកដូងមួយចំនួន ដើម្បីជាជម្រក និងបង្កើតអុកស៊ីសែន និងជួយបង្កើតចំណី ហើយទុកវាចោលរយៈពេលប្រមាណ១០ថ្ងៃ
– ដាក់មេកំពិសដែលមានពងស្រាប់ប្រមាណ១០ក្បាល ឬមិនទាន់មានពងក៏បាន និងឈ្មោលប្រមាណ៥ក្បាលក្នុងលូមួយ (អាចទិញយកមកពីទីផ្សារ កំពិសឈ្មោលមានមាឌតូចជាងកំពិសញី និងមិនមានសំបុកពងនៅពោះវាទេ)
– ដាកខ្ចៅចូលប្រមាណមួយកំប៉ុង
* ការឲ្យចំណី៖
– ស្ងោរពងទាចំនួន២គ្រាប់ យកតែស្នូលក្រហម បំបែកវាជាដុំៗហើយយកទៅក្នុងលូជា៣កន្លែង ឲ្យចំណីចំនួន ២-៣ដងក្នុងមួយថ្ងៃ។
– អាចប្រើចំណីបន្ថែមខ្លះៗដូចជាកាកសំណល់ត្រីសាច់ផ្សេងៗ។
– បច្ចេកទេសដែលអាចជួយឲ្យកំពិសឆាប់ពងគឺ
យើងត្រូវដាក់ឧបករណ៍បាញ់ខ្យល់ទឹកក្នុងលូនោះវិលចុះឡើងរយៈពេលប្រមាណ ១០-២០ នាទីក្នុង១ថ្ងៃ ព្រោះកំពិសវាចូលចិត្តទឹកដែលមានលំហូរ ដែលធ្វើឲ្យវាឆាប់កកើតពង។
– ត្រូវប្តូរទឹករាល់២អាទិត្យម្តង
– ដើម្បីឲ្យកំពិសឆាប់ធំធាត់យើងត្រូវលាយទឹក EM ១ស្លាព្រាបាយ ស្ករងូ១ស្លាព្រាបាយ លាយជាមួយទឹក១លីត្ររក្សានៅកន្លែងម្លប់ចំនួន១អាទិត្យ រួចចាក់កន្លះលីត្រចូលក្នុងលូ ដែលវាអាចជួយសម្លាប់មេរោគ ហើយធ្វើឲ្យកំពិស និងខ្ចៅឆាប់ធំធាត់លឿន។
– កំពិសត្រូវការរយៈពេលប្រមាណ ១ខែជាងទៅ២ខែសម្រាប់ការធំពេញវ័យ ហើយវាត្រូវការរយៈពេលប្រមាណ ៤ខែទើបអាចប្រមូលផលបាន ឯខ្ចៅត្រូវការពេលប្រមាណ៥ខែអាចប្រមូលផលបាន ៕