រដ្ឋាភិបាលកូរ៉េខាងត្បូងមានគម្រោងផ្តល់ទិដ្ឋាការទេសចរណ៍ (Tourist Visa) រយៈពេលវែងរហូតដល់១០ឆ្នាំសម្រាប់ពលរដ្ឋវៀតណាម ដើម្បីសម្រេចគោលដៅទាក់ទាញភ្ញៀវទេសចរវៀតណាមមកលេងប្រទេសកូរ៉េខាងត្បូងឱ្យបានចំនួន៦សែននាក់ នៅឆ្នាំ២០២៦ ។ ការផ្តល់ទិដ្ឋាការនេះផ្តោតលើពលរដ្ឋវៀតណាមដែលរស់នៅទីក្រុងហាណូយ ហូជីមិញ និងដាណាង មានសិទ្ធិធ្វើដំណើរចេញ-ចូលកូរ៉េខាងត្បូងជាច្រើនលើក ។

តាមការចុះផ្សាយរបស់សារព័ត៌មានវៀតណាម Saigon Times កាលពីថ្ងៃទី១៧ ខែមីនា ឆ្នាំ២០២៦ រដ្ឋាភិបាលកូរ៉េខាងត្បូងបានប្រកាសពីយុទ្ធសាស្ត្រ «ការផ្លាស់ប្តូរដ៏សំខាន់ក្នុងវិស័យទេសចរណ៍អន្តរជាតិ» ដោយកំណត់គោលដៅទាក់ទាញភ្ញៀវទេសចរបរទេសរហូតដល់៣០លាននាក់ ក្នុងនោះផ្តោតសំខាន់លើការបន្ធូរបន្ថយលក្ខខណ្ឌទិដ្ឋាការសម្រាប់ពលរដ្ឋវៀតណាម រួមទាំងកំណត់វិធានការគាំទ្រវិស័យទេសចរណ៍ក្នុងស្រុក ។

ក្រសួងវប្បធម៌ កីឡា និងទេសចរណ៍កូរ៉េខាងត្បូងកំពុងតែពិចារណាពីការផ្តល់ទិដ្ឋាការទេសចរណ៍ដល់ពលរដ្ឋវៀតណាមអាចធ្វើដំណើរចេញ-ចូលកូរ៉េខាងត្បូងបានច្រើនលើក និងរយៈពេល១០ឆ្នាំ ទើបទិដ្ឋាការផុតសុពលភាព ជាពិសេស ការផ្តល់ទិដ្ឋាការផ្តោតលើពលរដ្ឋវៀតណាមរស់នៅទីក្រុងធំៗ ដូចជា ៖ ទីក្រុងហាណូយ ហូជីមិញ និងដាណាង ។

នេះជាការបន្ថែមរយៈពេលលើទិដ្ឋាការចាស់ដែលមានរយៈពេលត្រឹមតែ៥ឆ្នាំ ដើម្បីផ្តល់ភាពងាយស្រួលដល់ក្រុមភ្ញៀវទេសចរវៀតណាមដែលមានជីវភាពធូរធា, ក្រុមអ្នកជំនាញ និងអ្នកធ្វើដំណើរទៅសួរសុខទុក្ខសាច់ញាតិរយៈពេលយូរ ។ វាជាយុទ្ធសាស្ត្រសំខាន់សម្រាប់ការបង្កើនទំនាក់រវាងកូរ៉េខាងត្បូងនិងវៀតណាម ក៏ដូចជាជំរុញឱ្យភ្ញៀវទេសចរវៀតណាមមកកូរ៉េខាងត្បូងម្តងហើយម្តងទៀត ។

កាលពីឆ្នាំ២០២៥ កូរ៉េខាងត្បូងទទួលបានភ្ញៀវទេសចរវៀតណាមស្មើជិត៥សែន ៥ម៉ឺននាក់ កើនឡើង៩% បើធៀបនឹងឆ្នាំ២០២៤ ។ នៅឆ្នាំ២០២៦ រដ្ឋាភិបាលកូរ៉េខាងត្បូងកំណត់គោលដៅទទួលភ្ញៀវទេសចរវៀតណាមរហូតដល់៦សែននាក់ ដែលចំនួននេះខ្ពស់ជាងចំនួនភ្ញៀវទេសចរវៀតណាមមកលេងកូរ៉េខាងត្បូងកាលពីឆ្នាំ២០១៩ ឬខ្ពស់ជាងចំនួនភ្ញៀវទេសចរវៀតណាមមុនពេលជំងឺកូវីដ-១៩ ឆ្លងរាងត្បាត ។ រីឯភ្ញៀវទេសចរបរទេសសរុបដែលកូរ៉េខាងត្បូងទទួលបានកាលពីឆ្នាំ២០២៥ ស្មើជាង១៨លាននាក់ កើនឡើង១៥% បើធៀបនឹងឆ្នាំ២០២៤ ។

ក្រៅពីនេះ កូរ៉េខាងត្បូងក៏បានពន្យារពេលការលើកលែងថ្លៃទិដ្ឋាការសម្រាប់ភ្ញៀវទេសចរវៀតណាម រួមទាំងភ្ញៀវទសចរមកពី៥ប្រទេសទៀតក្នុងតំបន់អាស៊ាន រហូតដល់ខែមិថុនា ឆ្នាំ២០២៦ ដើម្បីជំរុញការងើបឡើងវិញនៃវិស័យទេសចរណ៍ពីតំបន់អាស៊ាន ៕

នាយកមជ្ឈមណ្ឌលប្រឆាំងភេរវក.ម្មអាមេរិកដែលលោកប្រធានាធិបតី Donald Trump តែងតាំងឱ្យឡើងកាន់តំណែង បានប្រកាសលាឈប់កាលពីថ្ងៃទី១៧ ខែមីនា ឆ្នាំ២០២៦ ដោយសារមិនគាំទ្រអាមេរិកធ្វើសង្គ្រា.មជាមួយអ៊ីរ៉ង់ ។ ចំពោះការលាឈប់នេះ លោក Trump មិនខ្វល់ឡើយ លោកចាត់ទុកជារឿងល្អ និងថា បុគ្គលដែលមិនចាត់ទុកអ៊ីរ៉ង់គំរា.មកំហែងអាមេរិក បុគ្គលនោះជាមនុស្សមិនឆ្លាត ពីព្រោះការវាយប្រ.ហារដោយសារការគំរា.មរបស់អ៊ីរ៉ង់ ប្រទេសនានាក៏ទទួលស្គាល់ដែរ ។

កាលពីថ្ងៃទី១៧ ខែមីនា លោក Joe Kent នាយកមជ្ឈមណ្ឌលប្រឆាំងភេរវកម្មអាមេរិកបានប្រកាសតាមបណ្តាញសង្គមថា សុំលាលែងពីតំណែងដោយសារលោកមិនគាំទ្រអាមេរិកធ្វើសង្គ្រាមជាមួយអ៊ីរ៉ង់ដែលបណ្តាលឱ្យយុវជនអាមេរិកបាត់បង់ជីវិត និងខូចខាតទ្រព្យសម្បត្តិយ៉ាងច្រើន ហើយលោកមានទំនុកចិត្តវាជារឿងត្រឹមត្រូវដែលសម្រេចចិត្តបែបនេះ ។

លិខិតលាឈប់របស់លោក Joe Kent ដែលផ្ញើទៅលោកប្រធានាធិបតី Tump បញ្ជាក់ថា អ៊ីរ៉ង់មិនបានគំរាមកំហែងអាមេរិកទេ ហើយអាមេរិកវាយប្រហារនេះដោយសារការដាក់សម្ពាធពីអ៊ីស្រាអែល និងក្រុមអ៊ីស្រាអែលដែលមានឥទ្ធិពលនៅអាមេរិក ។ លោក Joe Kent គាំទ្រគោលនយោបាយការបរទេសរបស់លោក Trump ដែលបានឃោសនាបោះឆ្នោតកាលពីឆ្នាំ២០១៦, ឆ្នាំ២០២០ និងឆ្នាំ២០២៤ និងការអនុវត្តគោលនយោបាយនេះក្នុងអាណត្តិដំបូង ហើយរហូតមកដល់ខែមិថុនា ឆ្នាំ២០២៥ លោក Trump ក៏ដឹងច្បាស់ដែរ គឺសង្គ្រាមនៅមជ្ឈិមបូព៌ានឹងធ្វើឱ្យអ្នកស្នេហាជាតិអាមេរិកស្លាប់ រួមទាំងការខូចខាតទ្រព្យសម្បត្តិ និងប៉ះពាល់ការរីកចម្រើន ។

កាលពីខែមិថុនា ឆ្នាំ២០២៥ អាមេរិកបានពាក់ព័ន្ធក្នុងសង្គ្រាមរវាងអ៊ីស្រាអែលជាមួយអ៊ីរ៉ង់ មានរយៈពេល១២ថ្ងៃ ដោយអាមេរិកបានទម្លាក់គ្រាប់បែកបំផ្លាញរោងចក្រនុយក្លេអ៊ែរនៅក្រោមដីរបស់អ៊ីរ៉ង ចំនួន៣កន្លែង ហើយលោក Trump អះអាងថា ការធ្វើបែបនេះដើម្បីកម្ចាត់ការគំរាមកំហែងនុយក្លេអ៊ែររបស់អ៊ីរ៉ង់ ។

លោក Joe Kent បន្តថា ក្នុងឋានៈជាកងទ័ព លោកធ្លាប់ចូលរួមការប្រយុទ្ធចំនួន១១លើក ហើយលោកមិនគាំទ្រការបញ្ជូនយុវជនអាមេរិកទៅធ្វើសង្គ្រាម និងស្លាប់ក្នុងសង្គ្រាមដែលគ្មានប្រយោជន៍ទាល់តែសោះចំពោះពលរដ្ឋអាមេរិក ពួកគេមិនគួរលះបង់ជីវិតឡើយ ។

ចំណែកលោក Trump កាលពីថ្ងៃទី១៧ ខែមីនា ថា មិនខ្វល់នឹងការលាលែងពីតំណែងរបស់នាយកមជ្ឈមណ្ឌលប្រឆាំងភេរវកម្ម វាល្អប្រសើរដែលលោក Joe Kent លាឈប់ដោយសារភាពទន់ជ្រាយ ប៉ុន្តែការធ្វើសង្គ្រាមដោយសារអ៊ីរ៉ង់គំរាមកំហែងអាមេរិក ហើយប្រទេសនានាក៏ទទួលស្គាល់ដែរពីអ៊ីរ៉ង់គំរាមខ្លាំងកម្រិតណា ។ លោកធ្លាប់គិតថា លោក Joe Kent ជាមនុស្សល្អ ពេលនេះ បើបុគ្គលណាម្នាក់មិនចាត់ទុកអ៊ីរ៉ង់គំរាមទេ យើងលែងត្រូវការបុគ្គលនោះ ពីព្រោះគេជាមនុស្សមិនឆ្លាត មិនរហ័សរហួន ។

គួរបញ្ជាក់ថា លោក Trump បានជ្រើសរើសលោក Joe Kent ឱ្យឡើងកាន់តំណែងជានាយកមជ្ឈមណ្ឌលប្រឆាំងភេរវកម្មអាមេរិក ហើយព្រឺទ្ធសភាអាមេរិកបានទទួលស្គាល់ការឡើងកាន់តំណែងនេះកាលពីខែកក្កដា ឆ្នាំ២០២៥ ៕

ស្របពេលដែលមនុស្សជាច្រើននៅទូទាំងពិភពលោកស្ដីបន្ទោសសហរដ្ឋអាមេរិក ចំពោះការប្រើប្រាស់ប្រតិបត្តិការយោធាជាមួយអ៊ីរ៉ង់បង្កឲ្យមានជាវិបត្តិថាមពលសកល លោក Trump បានបកស្រាយវិញដោយខ្លីថា «ប្រសិនបើអាមេរិកមិនវា.យប្រហា.រអ៊ីរ៉ង់ទេ នោះសង្រ្គា.មលោកលើកទី៣ នឹងកើតមានដោយសារនុយក្លេអ៊ែររបស់អ៊ីរ៉ង់មិនខាន»។ ការថ្លែងនេះធ្វើឡើងក្រោយពេលដែលសហរដ្ឋអាមេរិកអះអាងថា ពួកគេបានវា.យកម្ទេចទីតាំងផ្ទុកមីស៊ីល និងកម្មវិធីនុយក្លេអ៊ែរជាច្រើនកន្លែងរបស់អ៊ីរ៉ង់។

យោងតាមរបាយការណ៍ដែលចុះផ្សាយដោយសារព័ត៌មាន Al Jazeera កាលពីថ្ងៃអង្គារ ប្រធានាធិបតីអាមេរិក លោក Donald Trump បានអះអាងថា ៖ បើគ្មានការវាយប្រហាររបស់សហរដ្ឋអាមេរិកលើប្រទេសអ៊ីរ៉ង់ទេ សង្គ្រាមនុយក្លេអ៊ែរនឹងផ្ទុះឡើង ហើយនឹងបន្តរីករាលដាលរហូតក្លាយជាសង្គ្រាមលោកលើកទី 3 ។

បន្ថែមលើនោះ លោក Trump ក៏បានផ្ដល់ការព្រមានដល់អ្នកណាក៏ដោយដែលហ៊ានគាំទ្រអ៊ីរ៉ង់ឲ្យមានអាវុធនុយក្លេអ៊ែរផងដែរ ដោយអះអាងថា ទីក្រុងតេអេរ៉ង់នឹងប្រើប្រាស់អាវុធបែបនេះភ្លាមៗដើម្បីបំផ្លាញតំបន់មជ្ឈិមបូព៌ាឲ្យខ្ទេចខ្ទីជាក់ជាមិនខាន មិនមែនបំផ្លាញត្រឹមតែអ៊ីស្រាអែលនោះទេ។

ទោះជាយ៉ាងណា អ៊ីរ៉ង់នៅតែបដិសេធម្តងហើយម្តងទៀតថាខ្លួនមិនបានបន្តផលិតអាវុធនុយក្លេអ៊ែរទេ ហើយរដ្ឋមន្ត្រីការបរទេស Abbas Araghchi បានទទូចថា ទីក្រុងតេអេរ៉ង់គ្រាន់តែកំណត់គោលដៅមូលដ្ឋានទ័ព និងទីតាំងយោធារបស់សហរដ្ឋអាមេរិកនៅក្នុងតំបន់ប៉ុណ្ណោះ មិនមែនប្រទេសជិតខាងខ្លួនឯងទេ។

ការអះអាងទាំងនេះឆ្លុះបញ្ចាំងពីយុត្តិកម្មដែលលោក Trump បានផ្តល់ជូននៅដើមដំបូងនៃយុទ្ធនាការយោធា នៅពេលដែលលោកបានលើកឡើងពីស្តុកអ៊ុយរ៉ាញ៉ូមរបស់អ៊ីរ៉ង់ ដែលចម្រាញ់បាន 60% ដែលបេសកជនអាមេរិក Steve Witkoff បាននិយាយថា ចំនួននៃអ៊ុយរ៉ាញ៉ូមនេះគឺលម្មគ្រប់គ្រាន់សម្រាប់ផលិតទៅជាអា.វុធនុយក្លេអ៊ែរជាបានយ៉ាងច្រើន ហើយនេះគឺជាហេតុផលចម្បងដែលអាមេរិកចាប់ផ្តើមការវាយប្រហារលើអ៊ីរ៉ង់។

គួររម្លឹកថា ការវាយប្រហាររវាងសហរដ្ឋអាមេរិក និងអ៊ីស្រាអែលលើអ៊ីរ៉ង់បានចាប់ផ្តើមនៅថ្ងៃទី 28 ខែកុម្ភៈ ហើយត្រូវបានគេរាយការណ៍ថាបានសម្លា.ប់មនុស្សជាង 1,200 នាក់ រួមទាំងមេដឹកនាំកំពូល Ali Khamenei ផងដែរ។ ទន្ទឹមនឹងនោះ មានសមាជិកយោធាអាមេរិកចំនួន 14 នាក់ហើយដែលត្រូវបានសម្លា.ប់ចាប់តាំងពីការប្រយុទ្ធនេះបានចាប់ផ្តើម៕

ពូកែខាងដើរចោ.ទប្រទេសគេ ប៉ុន្តែខ្លួនឯងវិញបោកបានគ្រប់ទម្រង់! អស់ពីល្បីរឿងបោ.កប្រាស់បន្លំជនបរទេស ឥឡូវមកបោ.កគ្នាឯងវិញម្ដង ដោយឆ្លៀតឱកាសក្នុងពេលប្រេងសាំងកំពុងឡើងថ្លៃ ក្រុមឆបោ.កតាមប្រព័ន្ធអនឡាញ បានផ្ញើរសារជូនដំណឹងអំពីការផ្ដល់ «បណ្ណចាក់សាំងឥតគិតថ្លៃ ឬការបញ្ចុះតម្លៃពិសេស» ទៅកាន់ទូរស័ព្ទរបស់ពលរដ្ឋដើម្បីល្បួងឱ្យពលរដ្ឋចុចលើតំណភ្ជាប់ (Link) ក្លែងក្លាយរបស់ពួកគេរួចហេគចូលទៅលួចលុយបានរាប់ម៉ឺនរាប់សែនបាតពីជនរងគ្រោះម្នាក់ៗ។

យោងតាមការចេញផ្សាយរបស់កាសែត Bangkok Post កាលពីថ្ងៃចន្ទ ទី១៦ ខែមីនា, ក្រុម Scammer អនាមិកបានបង្កើត Link ឬ ផ្ញើសារផ្សព្វផ្សាយក្លែងក្លាយតាមរយៈបណ្តាញសង្គម ដោយប្រើឈ្មោះក្រុមហ៊ុនប្រេងធំៗ ហើយសន្យាថានឹងផ្តល់កាតចាក់សាំងឥតគិតថ្លៃឬបញ្ចុះតម្លៃប្រេងសាំងដោយគ្រាន់តែចូលចុះឈ្មោះតាម Link ដែលគេដាក់ជូន។

ក្រោយជនរងគ្រោះចុចលើ Link នោះរួចពួកគេនឹងតម្រូវឲ្យបំពេញព័ត៌មានផ្ទាល់ខ្លួនដូចជា លេខសម្គាល់ខ្លួន លេខទូរស័ព្ទ ឬព័ត៌មានគណនីធនាគារ។ ពេលចុច Link កម្មវិធីបង្កប់មេរោគ (Malware) នឹងដំឡើង ដែលទាំងនេះ នឹងអាចធ្វើឱ្យក្រុមចោរ ចូលទៅកាន់គណនីធនាគារ និងផ្ទេរប្រាក់ចេញយ៉ាងងាយស្រួល និងឆាប់រហ័សបំផុត ។

នៅក្នុងករណីឆបោកជាក់ស្ដែងមួយ បុគ្គលិកការិយាល័យម្នាក់អាយុ ៣៤ ឆ្នាំ បានបាត់បង់ប្រាក់ជាង ៨ម៉ឺនបាត (ជាង ២,២០០ដុល្លារអាម៉េរិក) ក្នុងរយៈពេលត្រឹមតែ ១០ នាទីប៉ុណ្ណោះ បន្ទាប់ពីបានបំពេញព័ត៌មានដើម្បីស្នើសុំបណ្ណចាក់សាំងតម្លៃ ៥០០បាត តាមរយៈសារជូនដឹងដំណឹងក្លែងក្លាយ។ ជនរងគ្រោះម្នាក់ទៀតដែលជាអ្នកលក់អនឡាញ ក៏បានបាត់បង់ប្រាក់ជាង ៥ម៉ឺនបាត ក្រោយពីបានបំពេញការស្ទង់មតិមួយ ដើម្បីអាចប្ដូរយកបណ្ណចាក់សាំងតម្លៃ ៣០០ បាត ។

ឆ្លើយតបនឹងបញ្ហានេះ អាជ្ញាធរថៃបានណែនាំឱ្យប្រជាពលរដ្ឋមានការប្រុងប្រយ័ត្នខ្ពស់ និងមិនត្រូវជឿលើសារផ្ដល់រង្វាន់ដែលគ្មានប្រភពច្បាស់លាស់ឡើយ។ ប្រសិនបើមានការសង្ស័យ គួរត្រួតពិនិត្យ ឬទាក់ទងសួរនាំក្រុមហ៊ុនផ្ទាល់ ឬក៏រាយការណ៍ទៅកាន់លេខទូរស័ព្ទបន្ទាន់របស់ភ្នាក់ងារប្រឆាំងបទល្មើសបច្ចេកវិទ្យា ដើម្បីការពារខ្លួនពីការបាត់បង់ទ្រព្យសម្បត្តិ ។

ករណីទាំងនេះបានបង្ហាញថា ជនរងគ្រោះជាច្រើនបានខាតបង់ប្រាក់កាសរាប់ម៉ឺនបាត ដោយសារតែចង់បានបណ្ណចាក់សាំងដែលមានតម្លៃត្រឹមតែប៉ុន្មានរយបាតប៉ុណ្ណោះ ហើយការណ៍នេះ សបញ្ជាក់ឱ្យឃើញថា ក្រុមឆបោកកំពុងប្រើប្រាស់ភាពលោភលន់ និងតម្រូវការចាំបាច់ប្រចាំថ្ងៃរបស់ពលរដ្ឋ មកធ្វើជាឧបករណ៍។

យ៉ាងណាមិញ បើទោះជាបញ្ហាទាំងនេះមិនទាន់មានការរារការណ៍ថាមាននៅក្នុងប្រទេសកម្ពុជាយើងក៏ពិតមែន ប៉ុន្តែវាក៏ជាមេរៀនថ្មីបន្ថែមមួយទៀតសម្រាប់ប្រជាជនខ្មែរយើង ក្នុងការស្វែងយល់ឲ្យបានច្បាស់លាស់មុននឹងជឿលើអ្វីមួយ ជៀសវាងមានបញ្ហានាំឲ្យខាតបង់ដល់ទ្រព្យសម្បត្តិ៕