បាងកក៖ ប្រទេសថៃកំពុងប្រឈមនឹងបញ្ហាខ្វះថវិការក្នុងការរៀបចំធ្វើជាម្ចាស់ផ្ទះនៅក្នុងព្រឹត្តិការណ៍ការកីឡាសុីហ្គេមនៅចុងឆ្នាំ2025ខាងមុខប្រមាណជាង 14លានដុល្លារអាមេរិក សម្រាប់ដំណើរការពេញលេញនៅក្នុងកម្មវិធីដ៏ធំដែលខិតចូលមកដល់ក្នុងរយៈពេល90ថ្ងៃទៀត។ នេះបើយោងតាមការចផ្សាយរបស់សារព័ត៌មាន VN Express នៅថ្ងៃទី16 ខែកញ្ញា ឆ្នាំ2025។

ប្រភពខាងលើនេះបានឲ្យដឹងថា ក្រោមការវា.យតម្លៃកាលពីខែមិថុនា គណៈរដ្ឋមន្ត្រីថៃបានអនុម័តថវិកាចំនួន 2.055 ពាន់លានបាត (64.787 លានដុល្លារ) សម្រាប់ធ្វើជាម្ចាស់ផ្ទះទាំង SEA Games 33 និង ASEAN Para Games 13 នៅចុងឆ្នាំនេះ។ លើសពីនេះ អង្គភាពរដ្ឋបាលមូលដ្ឋានត្រូវបានអនុញ្ញាតឱ្យចូលរួមចំណែកផ្តល់ថវិកា ឬគាំទ្រសកម្មភាពផ្សេងទៀតតាមការស្នើសុំរបស់គណៈកម្មាធិការរៀបចំ។

ទោះជាយ៉ាងណាក៏ដោយ គិតត្រឹមថ្ងៃទី 9 ខែកញ្ញានេះ ខណៈការប្រកួតកីឡាស៊ីហ្គេម នៅសល់តែ 90 ថ្ងៃទៀតប៉ុណ្ណោះ នាយកអាជ្ញាធរកីឡាថៃ (SAT) លោក Kongsak Yodmanee បានបញ្ជាក់ថា ការចាយវាយថវិកាមិនទាន់បានបញ្ចប់នៅឡើយទេ ដោយវានៅខ្វះចំនួន 459 លានបាត (14លានដុល្លារ) ទៀត ដើម្បីធានារ៉ាប់រងចំនួនកីឡា អត្តពលិក និងតម្លៃប្រតិបត្តិការឲ្យបានខ្ពស់ជាងនេះ។

ការវា.យតម្លៃខ្វះចន្លោះបណ្ដាលឲ្យខ្វះថវិការ ស្របពេលដែលការកំណត់នៃព្រឹត្តិការណ៍ដ៏ធំនេះកាន់តែខិតជិតមកដល់នេះ ត្រូវបានគេសន្និដ្ឋានថា អាចជាប់ពាក់ព័ន្ធងនឹងអស្ថិរភាពនយោបាយរបស់ថៃនាពេលថ្មីៗនេះ រួមទាំងការលាលែងពីតំណែងរបស់រដ្ឋមន្ត្រីទេសចរណ៍ និងកីឡាថៃ Sorawong Thienthong កាលពីថ្ងៃទី 8 ខែកញ្ញា។

សូមជម្រាបថា ការប្រកួតស៊ីហ្គេមលើកទី33 នឹងប្រព្រឹត្តទៅចាប់ពីថ្ងៃទី9 ដល់ថ្ងៃទី20 ខែធ្នូ នៅទូទាំងទីក្រុងចំនួន3 គឺទីក្រុងបាងកក សុងក្លា និងឈុនបុរី ប្រទេសថៃ។ ក្នុងនោះមានអត្តពលិកប្រមាណ 12,500 នាក់មកពីប្រទេសអាស៊ីអាគ្នេយ៍ចំនួន 11 ត្រូវបានគេរំពឹងថានឹងប្រកួតប្រជែងនៅក្នុង 574 វិញ្ញាសាដែលគ្របដណ្តប់លើ 50 ប្រភេទកីឡា៕

បាងកក៖ អតីតនាយករដ្ឋមន្ត្រីថៃ លោក ថាក់សុីន សុីណាវ៉ាត់ ដែលបច្ចុប្បន្នកំពុងជាប់ទោសនៅក្នុងពន្ធនាគារកាលពីថ្ងៃច័ន្ទ (ថ្ងៃទី ១៥ ខែកញ្ញា)នេះ ត្រូវបានគេផ្លាស់ប្តូរទៅកាន់ផ្នែកវេជ្ជសាស្រ្តនៃពន្ធនាគារវិញម្ដង ដោយសារបញ្ហាសុខភាពរ៉ាំរ៉ៃ និងពាក់ព័ន្ធជាមួយអាយុរបស់គាត់។ នេះបើយោងតាមការចុះផ្សាយរបស់ទីភ្នាក់ងារព័ត៌មាន CNA ។

ប្រភពខាងលើនេះបានឲ្យដឹងថា តុលាការកំពូលរបស់ប្រទេសថៃកាលពីសប្តាហ៍មុនបានបញ្ជាឱ្យលោកថាក់ស៊ីនអាយុ 76 ឆ្នាំជាប់ពន្ធនាគាររយៈពេលមួយឆ្នាំ បន្ទាប់ពីបានសំរេចក្ដីថាគាត់បានអនុវត្តការកាត់ទោសឆ្នាំ 2023 មិនត្រឹមត្រូវ ដោយស្នាក់នៅក្នុងមន្ទីរពេទ្យជាជាងក្នុងបន្ទប់ឃុំឃាំង។

យ៉ាងណាក៏ដោយក្រោយការកាត់ក្ដីនេះ នៅថ្ងៃទី១៥ ខែកញ្ញា លោកថាក់សុីនត្រូវបានគេផ្ទេរចេញពីបន្ទប់ឃុំឃាំងទៅសម្រាកនៅមន្ទីរពេទ្យសម្រាប់ទណ្ឌិតវិញម្ដង ដោយសារតែលក្ខខណ្ឌសុខភាពមិនសមប្រកប និងមានវ័យចំណាស់។ នេះបើតាមការបង្ហើបឲ្យដឹងរបស់មន្រ្តីមិនបញ្ចេញឈ្មោះម្នាក់នៅក្នុងពន្ធនាគារ ប្រាប់មកកាន់ទីភ្នាក់ងារAFP។

តាមអ្នកស្រីផែថងថាន ស៊ីណាវ៉ាត្រ អតីតនាយករដ្ឋមន្រ្តីថៃ និងជាកូនស្រីរបស់លោកថាក់ស៊ីន បានបញ្ជាក់ប្រាប់អ្នកកាសែត នៅថ្ងៃដដែលបន្ទាប់ពីបានទៅសួរសុខទុក្ខ ឪពុកអ្នកស្រីថា លោកថាក់ស៊ីននៅតែរឹងមាំនិងសម្របខ្លួនរស់នៅក្នុងពន្ធនាគារ ប៉ុន្តែគាត់មានបញ្ហាសម្ពាធឈាម ដែលអ្នកស្រីថា ជារឿងធម្មតាសម្រាប់មនុស្សគ្រប់គ្នា ដែលជាប់ឃុំក្នុងពន្ធនាគារ ដោយសារតែស្រ្តេស។

គួររំលឹកថា លោកថាក់ស៊ីនបានជាប់ឆ្នោតជានាយករដ្ឋមន្ត្រីនៅឆ្នាំ២០០១ និងម្តងទៀតក្នុងឆ្នាំ២០០៥ ប៉ុន្តែបាននិរទេសខ្លួនបន្ទាប់ពីអាណត្តិទីពីររបស់គាត់ ដែលត្រូវបានធ្វើឡើងដោយរដ្ឋប្រហារយោធា។

ក្រោយរស់នៅដោយស្ងប់សុខអស់មួយរយៈ នៅឆ្នាំ២០២៥ មហាសេដ្ឋីវ័យ៧៦ឆ្នាំរូបនេះ ក៏ត្រូវបានកាត់ទោសនិងនាំខ្លួនទៅកាន់ពន្ធនាគារភ្លាមៗ បន្ទាប់ពីវិលត្រលប់មកប្រទេសថៃវិញនៅថ្ងៃទី២២ ខែសីហា ឆ្នាំ២០២៣ ក្រោយនិរទេសខ្លួនឯងរស់នៅក្រៅប្រទេសអស់រយៈពេលជាង ១៥ឆ្នាំ។ ប៉ុន្តែលោកថាក់ស៊ីនមិនធ្លាប់បានចំណាយពេលសូម្បីតែមួយយប់ នៅក្នុងបន្ទប់ឃុំឃាំងនោះឡើយ ពោល លោកត្រូវបានផ្ទេរទាំងយប់ ទៅបន្ទប់ឯកជនក្នុងមន្ទីរពេទ្យប៉ូលិសទូទៅនៃទីក្រុងបាងកក បន្ទាប់ពីមហាសេដ្ឋីរូបនេះ បានត្អូញត្អែរពីបញ្ហាបេះដូង និងឈឺទ្រូង៕

សហរដ្ឋអាមេរិក ៖ តាមការផ្សព្វផ្សាយរបស់សារព័ត៌មានបរទេសឱ្យដឹងថា នៅថ្ងៃទី១៦ ខែកញ្ញា ឆ្នាំ២០២៥ អាមេរិកបានឈានដល់ការធ្វើកិច្ចព្រមព្រៀងជាមួយចិនដើម្បីដំណើរការ TikTok នៅអាមេរិក មុនដល់ថ្ងៃកំណត់ឱ្យក្រុមហ៊ុន ByteDance លក់កម្មវិធីនេះឱ្យជ.នជាតិអាមេរិក ឬអាមេរិកហាមឃាត់ការប្រើប្រាស់នៅថ្ងៃទី១៧ ខែកញ្ញា ។ ប្រទេសទាំងពីរប្រកាសថា TikTok នឹងដំណើរការនៅអាមេរិកក្រោមការគ្រប់គ្រងរបស់ក្រុមហ៊ុនអាមេរិក ដែលកិច្ចព្រមព្រៀងនេះត្រូវបានចរចាក្នុងកិច្ចប្រជុំពាណិជ្ជកម្មនៅទីក្រុងម៉ាឌ្រីដ ប្រទេសអេស្ប៉ាញ ។

ប្រធានាធិបតីអាមេរិក លោក Donald Trump បានសរសើរការធ្វើកិច្ចព្រមព្រៀងជាមួយចិនដើម្បីដំណើរការ TikTok នៅអាមេរិក និងបញ្ជាក់ថា នឹងអនុញ្ញាតឱ្យ TikTok ដំណើរការនៅអាមេរិកតាមតម្រូវការរបស់ពលរដ្ឋ ប៉ុន្តែលោកពុំបាននិយាយពីចំណុចលម្អិតផ្សេងៗទេ ។ បើតាមអ្នកវិភាគ គឺកិច្ចព្រមព្រៀងនេះនឹងជួយកាត់បន្ថយភាពតានតឹងផ្នែកពាណិជ្ជកម្ម និងបើកផ្លូវឱ្យប្រទេសទាំងពីរអាចចរចាពីប្រធានបទផ្សេងៗបន្តទៀត ។

យើងបានជ្រាបហើយថា TikTok ត្រូវបានអាមេរិកស្នើឱ្យបិទដំណើរការជាលើកដំបូងពេលលោក Trump ឡើងកាន់តំណែងជាប្រធានាធិបតីអាណត្តិទី១ ក្រោយមក រដ្ឋាភិបាលរបស់លោកប្រធានាធិបតី Joe Biden ក៏បានបង្កើតច្បាប់ហាមឃាត់ការប្រើប្រាស់ TikTok ដូចគ្នា ប៉ុន្តែតែចិនយល់ព្រមលក់កម្មវិធីនេះឱ្យអាមេរិក គឺអាមេរិកនឹងពុំហាមឃាត់ការប្រើប្រាស់ទេ ។ ការអនុញ្ញាតឱ្យពលរដ្ឋអាមេរិកប្រើប្រាស់ TikTok ត្រូវបានពន្យារពេល និងហាមឃាត់ជាច្រើនលើក ហើយ TikTok អាចដំណើរការនៅអាមេរិកបានដោយគោរពតាមលក្ខខណ្ឌថ្មី ។

TikTok មានតួនាទីសំខាន់សម្រាប់ការចែកចាយវប្បធម៌ និងនយោបាយនៅអាមេរិក ហើយក៏ជាកម្មវិធីសំខាន់សម្រាប់ចែកចាយមាតិកាដល់អ្នកគាំទ្រលោក Trump ផងដែរ ។ ក្រៅពីនេះ TikTok ក៏មានតួនាទីចែកចាយពីនយោបាយនៅក្រៅប្រទេស រួមមាន ៖ ការបោះឆ្នោតនៅប្រទេសអាល្លឺម៉ង់ ប៉ូឡូញ ស៊ុយអែត និងបារាំង ដែលធ្វើឱ្យ TikTok ត្រូវបានចាត់ទុកថា គឺជាឧបករណ៍យុទ្ធសាស្ត្រក្នុងសង្គម និងការចែកចាយព័ត៌មាន ៕

ប្រទេសវៀតណាម ៖ បច្ចុប្បន្ន ភ្ញៀវទេសចរចិនបានប្តូរគោលដៅដំណើរកម្សាន្តទៅប្រទេសវៀតណាមវិញ ដោយសារនៅថៃអសន្តិសុខ ជាពិសេស បារម្ភពីការឆបោកតាមអ៊ីនធើរណេត ។ ភ្ញៀវទេសចរចិននៅតែភ័យខ្លា.ចថៃគ្មានសុវត្ថិភាព ក្រោយកើតហេតុការណ៍ជនខិលខូចឆបោកតាមអ៊ីនធើរណេតឱ្យតារាសម្តែងចិនដ៏ល្បីធ្វើដំណើរមកថៃ រួចនាំទៅមីយ៉ាន់ម៉ាកាលពីខែមករា ឆ្នាំ២០២៥ ។

តាមការផ្សព្វផ្សាយរបស់សារព័ត៌មានថៃ នៅថ្ងៃទី១៦ ខែកញ្ញា ឆ្នាំ២០២៥ ឱ្យដឹងថា ភ្ញៀវទេសចរចិនបានធ្វើដំណើរមកថៃធ្លាក់ចុះប្រមាណ៣៥% គិតត្រឹមខែសីហា ឆ្នាំ២០២៥ ខណៈរយៈពេលដូចគ្នានេះ វៀតណាមទទួលបានភ្ញៀវទេសចរចិនកើនឡើង៤៤% បើធៀបនឹងឆ្នាំ២០២៤ ។ ការធ្លាក់ចុះភ្ញៀវទេសចរចិនធ្វើឱ្យថៃបាត់បង់ប្រាក់ចំណូល ចំនួន៣,៥០០លានដុល្លារអាមេរិក ។

អ្វីធ្វើឱ្យភ្ញៀវទេសចរចិនចាប់អារម្មណ៍ខ្លាំង គឺវៀតណាមបានផ្តល់នូវបទពិសោធន៍ថ្មីប្លែក និងបង្ហាញអត្តសញ្ញាណនៅតំបន់ទេសចរណ៍ទៅកាន់ភ្ញៀវទេសចរបរទេស ។ គិតត្រឹមខែសីហា ឆ្នាំ២០២៥ វៀតណាមទទួលបានភ្ញៀវទេសចរបរទេសរហូតដល់១៤លាននាក់ ក្នុងនោះភ្ញៀវទេសចរចិនស្មើ៤៤% វៀតណាមរំពឹងថា នឹងទាក់ទាញភ្ញៀវទេសចរបរទេស រហូតដល់២២លាន៦សែននាក់ នៅចុងឆ្នាំ២០២៥ ដែលខ្ពស់ជាងឆ្នាំ២០១៩ ស្មើត្រឹម១៨លាននាក់ ។

រដ្ឋាភិបាល និងក្រុមហ៊ុនទេសចរណ៍វៀតណាមផ្តោតលើការទាក់ទាញភ្ញៀវទេសចរបរទេសឱ្យបានច្រើន ជាពិសេស ភ្ញៀវទេសចរចិន ដូចជា ៖ ផ្លូវចូលសណ្ឋាគារនៅទីក្រុងឆ្នេរសមុទ្រដាណាង បានសរសេរអក្សរចិន និងជួលបុគ្គលិកនិយាយភាសាចិន ។

ភ្ញៀវទេសចរចិនលែងចាប់អារម្មណ៍ទៅលេងឆ្នេរសមុទ្រ និងវត្តអារ៉ាមនានានៅប្រទេសថៃដូចមុន ដោយពួកគេប្តូរគោលដៅទៅលេងវៀតណាមដើម្បីទទួលបានបទពិសោធន៍ថ្មីៗ ។ បច្ចុប្បន្ន ថៃស្ងប់ស្ងាត់ភ្ញៀវទេសចរ ហើយការលក់ចំណីអាហារតាមផ្លូវក៏ពុំកាក់កបដូចមុន ខណៈពលរដ្ឋថៃបាត់បង់ការងារធ្វើគ្មានប្រាក់ចំណូល ។

អ្នកនាង ហ្វូជៀ បានមកដើរលេងនៅវៀតណាមជាមួយក្រុមគ្រួសារ ដោយសារវៀតណាមមានតំបន់ទេសចរណ៍ធម្មជាតិ ហើយនាងមានគម្រោងមកលេងវៀតណាមម្តងទៀត ។ នាងថា ភ្ញៀវទេសចរចិននៅតែបារម្ភពីការឆបោកតាមអ៊ីនធើរណេត ជាពិសេស ការឆបោកតារាសម្តែងចិនដ៏ល្បីឱ្យធ្វើដំណើរមកថៃ រួចនាំទៅមីយ៉ាន់ម៉ាកាលពីខែមករា ទើបពួកគេបញ្ឈប់គម្រោងដំណើរកម្សាន្តនៅថៃ ៕