ជប៉ុន៖ ប្រទេសជប៉ុនបានសម្លាប់ខ្លាឃ្មុំរាប់ពាន់ក្បាលជារៀងរាល់ឆ្នាំ ដោយសារការវាយប្រហារជាបន្តបន្ទាប់មកលើមនុស្សដែលបង្កឱ្យមានការប្រកាសអាសន្ន។

យោងតាមគេហទំព័រអន្តរជាតិ Nippon ដែលបានចុះផ្សាយនៅថ្ងៃទី២១ ខែធ្នូថា ខ្លាឃ្មុំព្រៃរាប់ពាន់ក្បាលបានផ្លាស់ទីចេញពីតំបន់ជនបទទៅជិតទីផ្សារក្បែរទីក្រុង ដើម្បីស្វែងរកអាហារ ដោយតំបន់ខ្លះបានឃើញចំនួនខ្លាឃ្មុំកើនឡើងបីដងក្នុងរយៈពេលជាងមួយទសវត្សរ៍។ ដូច្នេះចំនួននៃការមើលឃើញខ្លាឃ្មុំបានកើនឡើងជិតទ្វេដងនៅឆ្នាំនេះ ហើយការវាយប្រហារខ្លាឃ្មុំជាបន្តបន្ទាប់មកលើមនុស្សក៏បានបង្កឱ្យមានការប្រកាសអាសន្នផងដែរ។

ក្នុងឆ្នាំ ២០២៣ នេះមនុស្ស ៦ នាក់បានស្លាប់ និង ២១២ នាក់ទៀតបានរងរបួសដោយសារការវាយប្រហាររបស់ខ្លាឃ្មុំ ដែលជាឆ្នាំខ្ពស់បំផុតនៃអ្នកស្លាប់និងរបួសចាប់តាំងពីប្រទេសជប៉ុនបានកត់ត្រាទិន្នន័យក្នុងឆ្នាំ ២០០៦។ ក្រុមអ្នកជំនាញបាននិយាយថាចំនួននៃការវាយប្រហាររបស់ខ្លាឃ្មុំបានកើនឡើងយ៉ាងខ្លាំងនៅឆ្នាំនេះដោយសារតែការថយចុះនៃអាហារ និងផ្លែឈើធ្វើឱ្យសត្វខ្លាឃ្មុំជាច្រើនក្បាលមានការស្រែកឃ្លាន។ បច្ចុប្បន្នចំនួនខ្លាឃ្មុំពណ៌ត្នោតនៅកោះហុកកៃមានចំនួនរហូតទៅដល់ ១១.៧០០ ក្បាល ច្រើនជាងទ្វេដងបើធៀបនឹងឆ្នាំ ១៩៩០។

ទោះជាយ៉ាងណាក៏ដោយ ប្រទេសជប៉ុនបានសម្លាប់ខ្លាឃ្មុំជាមធ្យម ៤,៩០០ ក្បាលក្នុងមួយឆ្នាំក្នុងរយៈពេល ៥ ឆ្នាំចុងក្រោយនេះ នេះបើយោងតាមក្រសួងបរិស្ថាន។ ដូច្នេះហើយនៅឆ្នាំ ២០២៤ ប្រទេសនេះគ្រោងនឹងបាញ់សម្លាប់សត្វខ្លាឃ្មុំប្រមាណ ៦,៣០០ ក្បាល ដោយអ្នកជំនាញជឿថាខ្លាឃ្មុំអាចនឹងកើនឡើងដល់ ៨,០០០ ក្បាលនៅឆ្នាំក្រោយ។

គួរបញ្ជាក់ដែរថា ប្រទេសជប៉ុនមានខ្លាឃ្មុំពីរប្រភេទគឺខ្លាឃ្មុំខ្មៅ និងខ្លាឃ្មុំត្នោត។ ខ្លាឃ្មុំខ្មៅតែងតែរស់នៅក្នុងព្រៃ ហើយជារឿយៗលាក់ខ្លួនពីមនុស្ស។ ទន្ទឹមនឹងនេះ ខ្លាឃ្មុំពណ៌ត្នោតដែលមានទំហំធំជាង តែងតែលេចឡើងកាន់តែជិតមនុស្ស ហើយអាចគំរាមកំហែង ឬវាយប្រហារទៅលើមនុស្សផងដែរ៕

ប្រទេសថៃ ៖ សមត្ថកិច្ចថៃបានចាប់ខ្លួនស្ត្រីខ្មែរ និងឡាវ ដែលពួកគេពរកូនមកអង្គុយសុំទាននៅប្រទេសថៃ បន្ទាប់មក សមត្ថកិច្ចបានបញ្ជូនកូនៗពួកគេទៅត្រួតពិនិត្យ DNA ដើម្បីបញ្ជាក់ថា តើក្មេងៗពិតជាកូនតាមការអះអាងរបស់ស្ត្រីទាំងនេះ ឬជាករណីជួញដូរមនុស្សឱ្យមកអង្គុយសុំទាន និងទទួលបានក្តីអាណិតអាសូរ ។ នេះបើតាមការចុះផ្សាយរបស់សារព័ត៌មានថៃ កាលពីថ្ងៃទី២១ ខែធ្នូ ឆ្នាំ២០២៣ ។

កម្លាំងសមត្ថកិច្ចបានសហការជាមួយភ្នាក់ងារសង្គ្រោះជនគ្មានទីពឹងនៅទីក្រុងបាងកក ចុះទៅត្រួតពិនិត្យនៅតាមតំបន់គោលដៅមួយចំនួន ដូចជា ៖ ក្រោមស្ពានអាកាស, ម្តុំសណ្ឋាគារ និងតំបន់ពាណិជ្ជកម្មនានា ។ ក្នុងអំឡុងពេលចុះត្រួតពិនិត្យនេះ សមត្ថកិច្ចបានរកឃើញស្ត្រីជនជាតិឡាវម្នាក់ និងស្ត្រីខ្មែរចំនួន២នាក់ទៀតកំពុងតែពរក្មេងតូចអង្គុយសុំទាននៅតាមទីសាធារណៈ ។

បើតាមការសាកសួរឱ្យដឹងថា ក្រុមស្ត្រីសុំទានទាំងនេះបានចូលមករស់នៅប្រទេសថៃដោយខុសច្បាប់ ហើយពួកគេព្យាយាមរត់គេចពីសមត្ថកិច្ច ។ សមត្ថកិច្ចលើកឡើងថា យើងបានចាប់ខ្លួនស្ត្រីទាំង៣នាក់នេះ រួមទាំងក្មេងៗផងដែរ ដើម្បីបញ្ជូនពួកគេទៅត្រួតពិនិត្យ DNA ថា តើពួកគេជាកូន និងម្តាយពិតប្រាកដដែរឬទេ? ប្រសិនបើពួកគេមិនមែនជាម្តាយ និងកូនទេ ចាត់ទុកថា នេះជាករណីជួញដូរមនុស្ស ។

សមត្ថកិច្ចថៃបានចោទប្រកាន់ពួកគេពីបទប្រព្រឹត្តទង្វើឱ្យអ្នកដទៃអាណិតអាសួរ និងផ្តល់ប្រាក់ ឬទ្រព្យសម្បត្តិផ្សេងៗឱ្យ ។ លើសពីនេះ ពួកគេគឺជាជនបរទេសដែលបានលួចចូលមករស់នៅប្រទេសថៃខុសច្បាប់ ៕ ប្រភព ៖ PPTV HD 36

ចិនគឺជាប្រទេសដែលមានការផលិតរថយន្តអគ្គិសនីធំជាងគេបំផុតរបស់ពិភពលោក ប៉ុន្តែមិនមែនជាប្រទេសដែលមានអ្នកប្រើប្រាស់រថយន្តអគ្គិសនីច្រើនជាងគេនោះទេ ផ្ទុយទៅវិញប្រទេសចំនួន ១០ ខាងក្រោមនេះគឺមានអ្នកប្រើប្រាស់រថយន្តអគ្គិសនីច្រើនជាងគេបំផុតលើពិភពលោក។ នេះបើយោងតាមស្ថិតិ Insider Monkey បានឱ្យដឹងថា ទិន្នន័យនេះត្រូវបានគេប្រៀបធៀបទៅនឹងចំនួនប្រជាជន និងចាត់ថ្នាក់ដោយសមាមាត្រនៃយានជំនិះក្នុងចំណោមមនុស្ស ១,០០០ នាក់។ ដូច្នេះប្រទេសទាំង ១០ ដែលមានអ្នកប្រើប្រាស់រថយន្តអគ្គិសនីច្រើនជាងគេបំផុតនោះរួមមាន៖

១.សហរដ្ឋអាមេរិក៖ អាមេរិកគឺជាប្រទេសដែលមានឥទ្ធិពលបំផុតនៅក្នុងឧស្សាហកម្មរថយន្តអគ្គិសនីពិភពលោក។ ហេតុនេះហើយក្នុងចំណោមប្រជាជនអាមេរិកចំនួន ១,០០០ នាក់មានរថយន្តអគ្គិសនីសម្រាប់ប្រើប្រាស់រហូតទៅដល់ ៨៣៤ គ្រឿង។

២.ប្រទេសអូស្ត្រាលី៖ អូស្ត្រាលីគឺជាប្រទេសមានគោលដៅសន្សំសំចៃប្រេង ដូច្នេះប្រទេសនេះមានរថយន្តអគ្គិសនី ៧៧៤ គ្រឿងក្នុងចំណោមមនុស្ស ១,០០០ នាក់។

៣.ប្រទេសប៉ូឡូញ៖ ប្រទេសប៉ូឡូញក៏ស្ថិតនៅក្នុងក្រុមចម្រុះដែលប្រឆាំងនឹងការហាមឃាត់របស់សហភាពអឺរ៉ុបលើរថយន្តសាំង និងម៉ាស៊ូតផងដែរ។ ហេតុនេះហើយប្រជាជនប៉ូឡូញមានរថយន្តអគ្គិសនីសម្រាប់ប្រើប្រាស់ចំនួន ៦៨៩ គ្រឿងក្នុងចំណោមមនុស្ស ១,០០០ នាក់។

៤.ប្រទេសអ៊ីតាលី៖ អ៊ីតាលីជាប្រទេសមួយក្នុងចំណោមប្រទេសដែលមានរថយន្តច្រើនបំផុតក្នុងពិភពលោក ដោយនៅទីនេះមានស្ថានីយ៍រថយន្តអគ្គិសនី រួមទាំងប្រព័ន្ធសាកថ្មជាច្រើនកន្លែង។ ដូច្នេះក្នុងចំណោមមនុស្ស ១,០០០ នាក់ មានរថយន្តអគ្គិសនី ៦៧៧ គ្រឿង។

៥.ប្រទេសកាណាដា៖ ប្រទេសកាណាដាក៏កំពុងផ្លាស់ប្តូរបន្តិចម្តងៗទៅកាន់រថយន្តអគ្គិសនី ដោយក្រុមហ៊ុន LG Energy Solutions បានប្រកាសពីការវិនិយោគចំនួន ៣.៥ ពាន់លានដុល្លារ ដើម្បីសាងសង់រោងចក្រថាមពលថ្មនៅក្នុង Windsor។ ដូច្នេះប្រទេសនេះមានរថយន្តអគ្គិសនីប្រមាណ ៦៧៣ គ្រឿងក្នុងចំណោមមនុស្ស ១,០០០ នាក់។

៦.ប្រទេសជប៉ុន៖ ជប៉ុនក៏ជាប្រទេសដែលមានអ្នកប្រើប្រាស់រថយន្តអគ្គិសនីច្រើនជាងគេផងដែរ ដោយក្នុងចំណោមមនុស្ស ១,០០០ នាក់ ពួកគេមានរថយន្តអគ្គិសនីប្រមាណ ៦៥៩ គ្រឿង។

៧.ប្រទេសអាល្លឺម៉ង់៖ អាឡឺម៉ង់គឺជាប្រទេសដែលផលិតរថយន្តឈានមុខគេរបស់ពិភពលោកជាយូរណាស់មកហើយ ដោយរថយន្តអាល្លឺម៉ង់មានភាពល្បីល្បាញដោយសារបច្ចេកវិទ្យា គុណភាព និងភាពល្អឥតខ្ចោះជាមួយនឹងម៉ាកយីហោដូចជា BMW និង Mercedes ។ បច្ចុប្បន្ននេះ ឧស្សាហកម្មរថយន្តអគ្គិសនីរបស់អាល្លឺម៉ង់មានចំនួន ៥៧៧ គ្រឿងក្នុងចំណោមមនុស្ស ១,០០០ នាក់។

៨.ប្រទេសបារាំង៖ នៅឆ្នាំ ២០២៣ ប្រទេសបារាំងបានបង្កើនការវិនិយោគជិត ២.២ ពាន់លានដុល្លារអាមេរិក ដើម្បីសាងសង់រោងចក្រអាគុយរថយន្តអគ្គិសនី។ ហេតុនេះហើយក្នុងចំណោមប្រជាជនបារាំងចំនួន ១,០០០ នាក់មានអ្នកប្រើប្រាស់រថយន្តអគ្គិសនីរហូតទៅដល់ ៥៧០ គ្រឿង។

៩.ប្រទេសអូទ្រីស៖ អូទ្រីសក៏ជាអ្នកគាំទ្រកិច្ចព្រមព្រៀងរបស់ EU ដើម្បីលុបបំបាត់គំរូរថយន្តដែលបញ្ចេញឧស្ម័នកាបូនិកផងដែរ។ ដូច្នេះប្រទេសនេះមានអ្នកប្រើប្រាស់រថយន្តអគ្គិសនីប្រមាណ ៥៦៨ គ្រឿងក្នុងចំណោមមនុស្ស ១,០០០ នាក់។

១០.ប្រទេសន័រវេស៖ នៅឆ្នាំ ២០២២ រថយន្តអគ្គិសនីជាង ៨០% ត្រូវបានទិញដោយជនជាតិន័រវេស ដែលបង្ហាញថាបដិវត្តន៍នេះពិតកំពុងកើនឡើងយ៉ាងខ្លាំង។ ដូច្នេះប្រទេសន័រវេសមានអ្នកប្រើប្រាស់រថយន្តអគ្គិសនីប្រមាណ ៥៥៥ គ្រឿងក្នុងចំណោមមនុស្ស ១,០០០ នាក់៕

ទិន្នន័យបានបង្ហាញកាលពីពេលថ្មីៗនេះបានបង្ហាញថា សេដ្ឋកិច្ចរបស់ប្រទេសកូរ៉េខាងជើងបានធ្លាក់ចុះជាលើកទី៣ជាប់ៗគ្នានៅក្នុងឆ្នាំ ២០២២ ចំពេលមានទណ្ឌកម្មអន្តរជាតិ និងការរីករាលដាលនៃជំងឺរាតត្បាត COVID-19 ដែលអូសបន្លាយតាំងពីឆ្នាំ២០២០មក។

បើយោងតាមទិន្នន័យពីស្ថិតិកូរ៉េបានឲ្យដឹងថា ផលិតផលក្នុងស្រុកសរុប (GDP) ពិតប្រាកដរបស់កូរ៉េខាងជើងបានធ្លាក់ចុះ ៤.៥ ភាគរយក្នុងឆ្នាំ ២០២០ , បន្ទាប់មកធ្លាក់ចុះការធ្លាក់ចុះ ០.១ ភាគរយនៅឆ្នាំ ២០២១និងធ្លាក់ចុះ ០.២ ភាគរយទៀតកាលពីឆ្នាំ២០២២។ វិស័យផ្សេងៗក៏បានធ្លាក់ចុះជាលំដាប់ ដូចជាវិស័យរ៉ែនិងថាមពល ,ឧស្សាហកម្ម ,កសិកម្មនិងនេសាទ ជាដើម។

ទិន្នន័យបានបង្ហាញថា ប្រទេសចិនគឺជាដៃគូពាណិជ្ជកម្មកំពូលរបស់កូរ៉េខាងជើងដែល ទំនិញ ៩៦.៧ ភាគរយគឺជាការនាំចូលពីប្រទេសចិន បន្ទាប់មកគឺវៀតណាម ១ ភាគរយ និងអាហ្សង់ទីនមាន ០.៨ ភាគរយ។

កត្តាដែលបណ្តាលឲ្យប្រទេសនេះធ្លាក់ចុះជាលំដាប់ព្រោះតែប្រទេសកុម្មនីស្តនេះកំពុងតែប្រឈមមុខនឹងការដាក់ទណ្ឌកម្មសេដ្ឋកិច្ចអន្តរជាតិសម្រាប់កម្មវិធីអាវុធរបស់ខ្លួន និងបានបិទព្រំដែនរបស់ខ្លួនចាប់ពីខែមករា ឆ្នាំ ២០២០ ដល់ខែកញ្ញា ឆ្នាំ ២០២៣ ដើម្បីការពារការរីករាលដាលនៃ COVID-19។

ទិន្នន័យក្នុងឆ្នាំ២០២២បង្ហាញថាប្រជាជនកូរ៉េខាងជើងមានត្រឹមតែពាក់កណ្តាលកូរ៉េខាងត្បូង គឺមានចំនួន ២៥.៧ លាននាក់ បើធៀបនឹង ៥១.៦៧លានរបស់ប្រទេសកូរ៉េខាងត្បូង។ បុរសកូរ៉េខាងជើងមានអាយុសង្ឃឹមរស់បាន៧១,៩ឆ្នាំកាលពីឆ្នាំមុន ខណៈស្ត្រីត្រូវបានគេរំពឹងថានឹងរស់ដល់៧៨,៣ឆ្នាំ។ បើប្រៀបធៀបបុរសកូរ៉េខាងត្បូងត្រូវបានគេរំពឹងថានឹងរស់នៅដល់ ៧៩.៩ ហើយអាយុសង្ឃឹមរបស់ស្ត្រីគឺ ៨៥.៦ ។

បើតាមការផ្សាយរបស់ការិយាល័យស្ថិតិរបស់ប្រទេសកូរ៉េខាងត្បូងក៏បានបំភ្លឺព័ត៌មានទូទៅអំពីប្រទេសកូរ៉េខាងជើងចាប់តាំងពីឆ្នាំ ១៩៩៥មក គឺមានបញ្ហាទាក់ទងនឹងស្ថានភាពសេដ្ឋកិច្ច និងសង្គម ក៏ដូចជាកើតមានគ្រោះមហន្តរាយធម្មជាតិ ជំងឺ និងអត្រាជក់បារីនៅពាសពេញផ្ទៃប្រទេស។ រីឯកាលពីពេលថ្មីៗនេះវិញ ប្រធានាធិបតីកូរ៉េខាងជើង លោកគីម ជុងអ៊ុន ក៏ត្រូវបានពិភពលោកទាំងមូលភ្ញាក់ផ្អើលយ៉ាងខ្លាំង បន្ទាប់ពីលោកសម្រក់ទឹកភ្លែកអង្វរករឲ្យស្រ្តីកូរ៉េខាងជើងបង្កើននូវការយកកូន ដោយសារតែអត្រាកំណើតនៅទូទាំងប្រទេសធ្លាក់ចុះជាលំដាប់ផងដែរ៕

ប្រទេសចិន៖ ប្រទេសចិនគ្រោងនឹងបើកដំណើរការតាក់ស៊ីតាមអាកាស “Air Taxi” នៅតំបន់ Greater Bay ទីក្រុង Shenzhen ដើម្បីជួយកាត់បន្ថយចរាចរណ៍ខ្លាំងក្នុងអំឡុងពេលម៉ោងប្រញាប់ ដោយធ្វើដំណើរ ៣០ គីឡូម៉ែត្រក្នុងរយៈពេល ១០ នាទីប៉ុណ្ណោះ។

យោងតាមគេហទំព័រអន្តរជាតិ CCTV ដែលបានចុះផ្សាយនៅថ្ងៃទី២០ ខែធ្នូថា រដ្ឋាភិបាលចិនបានកំពុងរៀបចំផែនការចាប់ផ្តើមប្រើប្រាស់ “តាក់ស៊ីតាមអាកាស” និងឧទ្ធម្ភាគចក្រនៅក្នុងទីក្រុង Shenzhen ភាគខាងត្បូងនៃខេត្តក្វាងទុង ដែលវាជាមជ្ឈមណ្ឌលសម្រាប់ការហោះហើរ និងចុះចតឧទ្ធម្ភាគចក្រជាង ១០០ នៅទូទាំង Greater Bay Area សម្រាប់ប្រើប្រាស់ក្នុងឱកាសនានា ដូចជាជើងហោះហើរអន្តរក្រុង រួមទាំងជើងហោះហើរឆ្លងដែន និងជើងហោះហើរអាជីវកម្មផ្សេងទៀត។

តាក់ស៊ីតាមអាកាសអាចកាត់បន្ថយពេលវេលាធ្វើដំណើរបានយ៉ាងច្រើន។ ជាពិសេស អ្នកដំណើរដែលមានការប្រញាប់ ដើម្បីឡើងឧទ្ធម្ភាគចក្រពីកន្លែងចុះចតនៅស្រុក Yantian ទៅស្រុក Futian ដែលជាធម្មតាវាមានចម្ងាយប្រហែល ៣០ គីឡូម៉ែត្រ ដោយត្រូវចំណាយពេលប្រហែល ១ ម៉ោងកន្លះ ដើម្បីបើកបរក្នុងអំឡុងពេលស្ទះចរាចរណ៍ ប៉ុន្តែសម្រាប់តាក់ស៊ីតាមអាកាសវិញគឺប្រើពេលត្រឹមតែ ១០ នាទីប៉ុណ្ណោះ។

លោក Cai Wuqun ប្រធាននាយកដ្ឋានផែនការយុទ្ធសាស្ត្រ របស់ក្រុមហ៊ុនអាកាសចរណ៍នៅ Shenzhen បានបង្ហាញឱ្យឃើញ ជាទូទៅតំបន់ជុំវិញផ្លូវ Luosha មានចរាចរណ៍ច្រើនណាស់ ដូច្នេះចរាចរណ៍ផ្លូវអាកាសនឹងជួយជៀសវាងការកកស្ទះនៅលើដី។ ទោះបីជា Air Taxi ជួយធ្វើឱ្យការធ្វើដំណើរមានភាពងាយស្រួល និងលឿនជាងមុនក៏ដោយ បច្ចុប្បន្នវាមានតម្លៃថ្លៃសេវាខ្ពស់ណាស់។

ទោះជាយ៉ាងណាក៏ដោយ ប្រជាជននៅក្នុងឧស្សាហកម្មអាកាសចរណ៍បាននិយាយថានៅពេលអនាគត សេវាកម្មនេះអាចនឹងត្រូវបានប្រើប្រាស់យ៉ាងទូលំទូលាយ សម្រាប់ថ្លៃដឹកជញ្ជូននឹងត្រូវកាត់បន្ថយដោយតាក់ស៊ីអាកាសនៃក្រុង Shenzhen ក៏ដូចជាអភិវឌ្ឍវេទិកាអនឡាញ ដើម្បីឱ្យអ្នកប្រើប្រាស់អាចកក់ការធ្វើដំណើរតាមអាកាសបានដោយគ្រាន់តែ Booking ប៉ុណ្ណោះ។ ដូច្នេះហើយគេរំពឹងថានៅឆ្នាំ ២០២៥ សេវាកម្មយន្តហោះដឹកអ្នកដំណើរតាមអាកាសនឹងមានការប្រើប្រាស់យ៉ាងទូលំទូលាយនៅក្នុងប្រទេសចិន៕