ប្រទេសថៃ ៖ លោក Disthat Panyarachun នាយកប្រតិបត្តិក្រុមហ៊ុន PTT ប្រចាំប្រទេសថៃបញ្ជាក់ថា ក្រុមហ៊ុន PTT បានពិចារណារក្សាតម្លៃប្រេងឥន្ធនៈនៅចុងឆ្នាំ២០២៣ នេះ ដើម្បីជារង្វាន់ឆ្នាំថ្មីសម្រាប់ពលរដ្ឋថៃ និងជួយសម្រាលបន្ទុកការចំណាយក្នុងជីវភាពរស់នៅប្រចាំថ្ងៃផងដែរ ។ ក្រុមហ៊ុននេះសង្ឃឹមថា នឹងប្រកាសតម្លៃប្រេងជាផ្លូវការនាពេលឆាប់ៗនេះ ។ នេះបើតាមការចុះផ្សាយរបស់សារព័ត៌មានថៃ កាលពីថ្ងៃទី១៤ ខែធ្នូ ឆ្នាំ២០២៣ ។

ដូចគ្នានេះ លោក Somchai Techawanit ប្រធានផ្នែកទីផ្សារនៃក្រុមហ៊ុន Bangchak Corporation Public Company Limited បានលើកឡើងថា ក្នុងអំឡុងពេលបុណ្យចូលឆ្នាំសកល គិតចាប់ពីថ្ងៃទី២៨ ខែធ្នូ ឆ្នាំ២០២៣ រហូតដល់ថ្ងៃទី២ ខែមករា ឆ្នាំ២០២៤ ក្រុមហ៊ុន Bangchak នឹងរក្សាតម្លៃប្រេងឥន្ធនៈឱ្យនៅដដែល និងមិនដំឡើងថ្លៃទេ ។ បើតម្លៃប្រេងនៅលើទីផ្សារពិភពលោកធ្លាក់ចុះ ក្រុមហ៊ុននេះនឹងបញ្ចុះតម្លៃប្រេងនៅប្រទេសថៃដូចគ្នាដែរ ។

ក្រោយពីក្រុមហ៊ុនប្រេងឥន្ធនៈទាំងពីរនេះប្រកាសថា នឹងរក្សាតម្លៃប្រេងឥន្ធនៈឱ្យនៅដដែល និងមិនដំឡើងថ្លៃប្រេងនោះ បានធ្វើឱ្យពលរដ្ឋថៃបង្ហាញការគាំទ្រយ៉ាងខ្លាំង ។ ពលរដ្ឋនិយាយថា ក្នុងអំឡុងពេលចូលឆ្នាំសកល ពួកគេនឹងត្រូវធ្វើដំណើរទៅកម្សាន្តនៅតាមបណ្តាខេត្ត និងតំបន់ទេសចរណ៍ផ្សេងៗ ហើយតម្រូវការប្រេងសម្រាប់យានជំនិះនឹងកើនឡើងផងដែរ ។ ចុងក្រោយ ពួកគេសំណូមពរថា សូមកុំឱ្យក្រុមហ៊ុនប្រេងឆ្លៀតឱកាសដំឡើងថ្លៃប្រេងពេលមានបុណ្យទាន ។

នៅពេលបុណ្យចូលឆ្នាំសកល ពលរដ្ឋថៃជាច្រើននាក់បានធ្វើដំណើរកម្សាន្ត ជាពិសេស ពួកគេធ្វើដំណើរនៅពេលយប់ ។ គណៈរដ្ឋមន្ត្រីថៃបានអនុម័តពន្យារពេលឱ្យក្លិបកម្សាន្តដែលមានទីតាំងក្នុងសណ្ឋាគារស្របតាមច្បាប់ រីឯក្លិបកម្សាន្តមានទីតាំងនៅទីក្រុងបាងកក, ភូកេត, ឈុនបុរី, ឈៀងម៉ៃ និងកោះសាមុយ អាចបើកសេវាកម្មទទួលភ្ញៀវរហូតដល់ម៉ោង៤ភ្លឺ ។ ចំណែកក្រុមហ៊ុនប្រកបអាជីវកម្មនានានៅទីក្រុងប៉ាតាយ៉ា ក៏ត្រៀមខ្លួនផ្តល់សេវាកម្មដល់ភ្ញៀវតាមពេលវេលាកំណត់ផងដែរ ។

ក្រុមហ៊ុនប្រកបអាជីវកម្មយល់ឃើញថា វាជារឿងល្អសម្រាប់អ្នករស់នៅទីក្រុងប៉ាតាយ៉ា ដោយសារពួកគេអាចប្រកបរបររកស៊ីនៅពេលរាត្រី ហើយអាចរកប្រាក់ចំណូលបន្ថែមទៀត ខណៈភ្ញៀវទេសចរក៏កើនឡើងផងដែរ ។ វាជាការពង្រឹងសេដ្ឋកិច្ចដល់ទីក្រុងប៉ាតាយ៉ា រីឯបញ្ហាសុវត្ថិភាពវិញ អាជ្ញាធរបានត្រៀមខ្លួនការពារសុវត្ថិភាព និងផ្តល់ភាពងាយស្រួលដល់ភ្ញៀវទេសចរទាំងអស់ ៕ ប្រភព ៖ Mono News

ប្រទេសជប៉ុន៖ ក្រុមហ៊ុន Honda របស់ជប៉ុនបានបញ្ឈប់ការលក់ម៉ូដែលរថយន្តអគ្គិសនី Honda e នៅអឺរ៉ុប ក៏ដូចជាបានដកផលិតផលនេះចេញពីបញ្ជីលក់នៅក្នុងប្រទេសកំណើតរបស់ខ្លួនផងដែរ។

យោងតាមគេហទំព័រអន្តរជាតិ Drive ដែលបានចុះផ្សាយនៅថ្ងៃទី១៤ ខែធ្នូថា រថយន្តអគ្គិសនី Honda e ត្រូវបានគេបញ្ឈប់ជាផ្លូវការនៅក្នុងចក្រភពអង់គ្លេស និងអឺរ៉ុប បន្ទាប់ពីក្រុមហ៊ុនឈប់លក់ផលិតផលនេះនៅក្នុងប្រទេសជប៉ុនដែលជាប្រទេសកំណើតរបស់ខ្លួន ដោយសារការលក់យឺត គ្មានអតិថិជន ចំពេលតម្លៃខ្ពស់ និងមានកំណត់ចម្ងាយបើកបរត្រឹមតែ ២០០ គីឡូម៉ែត្រប៉ុណ្ណោះ។

Honda e បានបើកដំណើរការដំបូងនៅឆ្នាំ ២០២០ ជាប្រភេទម៉ូដែលរថយន្តអគ្គិសនីខ្នាតតូចដោយត្រូវបានដាក់លក់តែនៅលើទីផ្សារដែលរៀបរាប់ខាងលើប៉ុណ្ណោះ ខណៈដែលរថយន្តនេះមិនត្រូវបាននាំចូលទៅសហរដ្ឋអាមេរិកទេ។ ទោះជាយ៉ាងណាក៏ដោយ ក្រុមហ៊ុន Honda បាននិយាយថា ម៉ូដែល e បានបំពេញការងាររបស់ខ្លួន ដោយបាននាំយក “អតិថិជនថ្មីៗជាច្រើនមកកាន់ម៉ាកនេះ ដោយសារការរចនាប្លែកៗ បច្ចេកវិទ្យាទំនើប និងបទពិសោធន៍បើកបរប្រកបដោយថាមពលរបស់ Honda”។

កន្លងទៅ នៅចក្រភពអង់គ្លេស Honda e មានតម្លៃប្រហែល ៤៦,៥០០ ដុល្លារអាមេរិក រីឯនៅអឺរ៉ុបវិញមានតម្លៃប្រមាណ ៦០,០០០ ដុល្លារអាមេរិក។ ទន្ទឹមនឹងនោះ ការធ្វើដំណើរអតិបរមាត្រឹមតែ ២០០ គីឡូម៉ែត្រក្នុងមួយសាក និងអាចសម្រេចបានតែក្នុងកាលៈទេសៈផ្លូវល្អប៉ុណ្ណោះ។

នៅទ្វីបអឺរ៉ុបរថយន្តអគ្គិសនី Honda e គឺសំដៅលើគ្រួសារដែលរស់នៅក្នុងទីក្រុងមានប្រាក់ចំណូលទាប ឬត្រូវការរថយន្តទីពីរសម្រាប់សាគួរប៉ុណ្ណោះ។ នៅឆ្នាំ ២០២០ មានរថយន្តចំនួន ៤០០០ គ្រឿងត្រូវបានលក់នៅលើទីផ្សារនេះ ប៉ុន្តែការលក់បានធ្លាក់ចុះមកនៅត្រឹម ៣៧០០ គ្រឿងក្នុងឆ្នាំ២០២១ ហើយនៅឆ្នាំ២០២២ មានតែ ២១០០គ្រឿង ប៉ុណ្ណោះដែលត្រូវបានប្រគល់ជូនអតិថិជន។

ការធ្លាក់ចុះនៃការលក់អាចត្រូវបានសន្មតថាជាផលប៉ះពាល់នៃជំងឺរាតត្បាត ដោយសារតែទាំងផលិតកម្ម និងការលក់ត្រូវបានប៉ះពាល់។ ទោះយ៉ាងណាក៏ដោយ រថយន្តនេះមិនមានសញ្ញានៃការងើបឡើងវិញនោះទេ ក៏ដូចជាការលក់មិនដល់ពាក់កណ្តាលនៃគោលដៅ ដែលជាមូលហេតុដែលវាត្រូវបានបញ្ឈប់ និងឈប់ផលិតម៉ូដែលនេះតទៅទៀត៕

ប្រទេសថៃ ៖ កាលពីថ្ងៃទី១៤ ខែធ្នូ ឆ្នាំ២០២៣ សារព័ត៌មានថៃផ្សាយថា ម្ហូបរបស់ថៃឈ្មោះ «ឆាម្រះព្រៅ» បានជាប់ចំណាត់ថ្នាក់ទី៣ ជាម្ហូបល្អបំផុតនៅលើពិភពលោក ប្រចាំឆ្នាំ២០២៣ ។ រីឯម្ហូបឈ្មោះ «ខាវសយ» បានជាប់ចំណាត់ថ្នាក់ទី៦ និងម្ហូបឈ្មោះ «សម្លផានែង» បានជាប់ចំណាត់ថ្នាក់ទី១០ ។ រីឯម្ហូបជាប់ចំណាត់ថ្នាក់ទី១ ជាម្ហូបល្អបំផុតនៅលើពិភពលោក គឺបានទៅលើម្ហូបឈ្មោះ «Picanha» របស់ប្រទេសប្រេស៊ីល ។

Tasteatlas គឺជាគេហទំព័របង្ហាញពីការធ្វើដំណើរផ្អែកលើបទពិសោធន៍ពាក់ព័ន្ធនឹងម្ហូបអាហារ និងទទួលការណែនាំពីអ្នកជំនាញ ក៏ដូចជាអ្នកបញ្ចេញមតិពីម្ហូបអាហារ បានផ្សព្វផ្សាយម្ហូបអាហារល្អបំផុតនៅលើពិភពលោក ប្រចាំឆ្នាំ២០២៣ ថា ម្ហូបរបស់ថៃបានជាប់ចំណាត់ថ្នាក់ចំនួន៥មុខ ដូចជា ៖

-ឆាម្រះព្រៅ ជាប់ចំណាត់ថ្នាក់ទី៣
-ខាវសយ ជាប់ចំណាត់ថ្នាក់ទី៦
-សម្លផានែង ជាប់ចំណាត់ថ្នាក់ទី១០
-ស្ងោរមាន់ ជាប់ចំណាត់ថ្នាក់ទី១៥ និង
-សម្លម៉ាស់សាម៉ាន់ ជាប់ចំណាត់ថ្នាក់ទី៧៣

ចំណែកមុខម្ហូប «ឆាម្រះព្រៅ» ដែលបានជាប់ចំណាត់ថ្នាក់ទី៣ នៅលើពិភពលោក គេហទំព័រនេះបញ្ជាក់ថា ម្ហូបមួយមុខនេះចម្អិនឡើងដោយដាក់សាច់ចញ្ច្រាំ ឬអាហារសមុទ្រ ព្រមទាំងគ្រឿងផ្សំផ្សេងទៀត ដូចជា ៖ ម្រេះព្រៅ, ខ្ទឹមបារាំង, ខ្ទឹមស, ម្រេច និងម្ទេស ។ គេត្រូវផ្សំគ្រឿងម្ហូបមួយមុខនេះដោយដាក់ស្ករ, ទឹកត្រី និងទឹកស៊ីអ៊ីវ ហើយចុងក្រោយ គេបរិភោគវាជាមួយបាយស និងដាក់ស៊ុតចៀនពីលើផងដែរ ។ លើសពីនេះ ម្ហូបឆាម្រេះព្រៅ បានជាប់ចំណាត់ថ្នាក់ទី៤ ជាប្រភេទម្ហូបដែលជនបរទេសនៅប្រទេសថៃ ចូលចិត្តបរិភោគទៀតផង ។

សម្រាប់ម្ហូបល្អបំផុតបានជាប់ចំណាត់ថ្នាក់ទី១ នៅលើពិភពលោក ប្រចាំឆ្នាំ២០២៣ គឺបានទៅលើម្ហូបឈ្មោះ «Picanha» របស់ប្រទេសប្រេស៊ីល ។ រីឯម្ហូបជាប់ចំណាត់ថ្នាក់ទី២ បានទៅលើម្ហូប «Roti canai» របស់ប្រទេសម៉ាឡេស៊ី ៕ ប្រភព ៖ 3Plus News

ប្រទេសថៃ ៖ លោក Chatchart Sitthiphan អភិបាលក្រុងបាងកកលើកឡើងថា បើរយៈពេល២ថ្ងៃទៀត បើកម្រិតធូលីនៅតែកើនឡើងខ្ពស់ លោកនឹងប្រកាសឱ្យពលរដ្ឋធ្វើការពីផ្ទះ (Work From Home) ។ រីឯអ្នកហាត់ប្រាណនៅតាមទីសាធារណៈ ក៏ត្រូវផ្អាកហាត់ផងដែរ ដោយសារកម្រិតធូលីកើនឡើងខ្ពស់នៅទីក្រុងបាងកក ។ នេះបើតាមការចុះផ្សាយរបស់សារព័ត៌មានថៃឈ្មោះ Amarin News នៅថ្ងៃទី១៣ ខែធ្នូ ឆ្នាំ២០២៣ ។

លោក Chatchart Sitthiphan អភិបាលក្រុងបាងកកឱ្យដឹងថា នៅពាក់កណ្តាលខែធ្នូ ឆ្នាំ២០២៣ នេះ លោកត្រៀមកំណត់វិធានការសម្រាប់រថយន្តប្រើប្រាស់ប្រេងម៉ាស៊ូតក្នុងរយៈពេលជាង៧ឆ្នាំ ដោយលើកទឹកចិត្តឱ្យពួកគេផ្លាស់ប្តូរប្រេងម៉ាស៊ីនក្នុងតម្លៃថោក ។ រីឯការប្រើប្រាស់រថយន្តបាញ់ទឹក វាអាចជួយកាត់បន្ថយធូលីបានតែមួយកម្រិតប៉ុណ្ណោះ ហើយនៅពេលឈប់បាញ់ទឹក នឹងមានធូលីច្រើនដូចមុន ។

នៅថ្ងៃទី១៣ ខែធ្នូ ឆ្នាំ២០២៣ លោកអភិបាលក្រុងបាងកកលើកឡើងថា លោកបានជួបជាមួយលោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ ដើម្បីវាយតម្លៃអំពីកម្រិតធូលីនៅតំបន់ «រ៉ាជប្រាស៊ុង» ។ តាមការពិនិត្យមើលការវាយតម្លៃបង្ហាញថា នៅថ្ងៃទី១៤ ខែធ្នូ កម្រិតធូលីនឹងធ្ងន់ធ្ងរជាងថ្ងៃទី១៣ ខែធ្នូ ហើយវានឹងកាន់តែធ្ងន់ធ្ងរបំផុត នៅថ្ងៃទី១៧ ខែធ្នូ ។ ប៉ុន្តែក្រោយថ្ងៃទី១៨ ខែធ្នូ កម្រិតធូលីនឹងធ្លាក់ចុះវិញ ហើយបរិយាកាសនឹងល្អប្រសើរឡើង ដោយយើងត្រូវត្រួតពិនិត្យគ្រប់តំបន់ទាំងអស់នៅទីក្រុងបាងកក ។

ចំពោះមូលហេតុបណ្តាលឱ្យមានធូលីខ្ពស់ លោកគិតថា ដោយសារការធ្វើចរាចរចង្អៀតពេក ទើបបណ្តាលឱ្យប៉ះពាល់ដល់បរិយាកាស ។ ហេតុនេះ លោកសូមសំណូមពរឱ្យពលរដ្ឋគ្រប់រូបជួយគ្នា ជាពិសេស អ្នកជិះរថយន្តចាក់ប្រេងម៉ាស៊ូត ដែលមានរយៈពេលលើស៧ឆ្នាំ ។ បច្ចុប្បន្ន រថយន្តប្រើប្រេងម៉ាស៊ូតមានចំនួន១លានគ្រឿង ហើយបើទោះជារថយន្តទាំងនេះបានឆ្លងកាត់ការពិនិត្យផ្សែងខ្មៅក្តី ប៉ុន្តែវានៅតែបញ្ចេញជាតិពុលយ៉ាងច្រើន ។ ដូច្នេះ រថយន្តចាក់ប្រេងម៉ាស៊ូត គួរទៅប្តូរប្រេងម៉ាស៊ីន និងតម្រង ។

កន្លងមក ទីក្រុងបាងកកបានកំណត់វិធានការជាមួយក្រសួងថាមពល ប៉ុន្តែនៅពាក់កណ្តាលខែធ្នូ ឆ្នាំ២០២៣ យើងនឹងកំណត់វិធានការលើកទឹកចិត្តអ្នកជិះរថយន្តប្រើប្រេងម៉ាស៊ូត និងប្រើម៉ាស៊ីនចាស់ ដើម្បីឱ្យពួកគេប្តូរប្រេងម៉ាស៊ីន និងតម្រងក្នុងតម្លៃសមរម្យ ។ លើសពីនេះ យើងនឹងសហការជាមួយក្រុមហ៊ុនរថយន្ត និងក្រុមហ៊ុនផលិតប្រេង ដើម្បីដោះស្រាយបញ្ហានាពេលនេះ ។

លោកអភិបាលក្រុងបាងកកបន្ថែមថា ចាប់ពីពេលនេះទៅ លោកនឹងតាមដាន និងវាយតម្លៃយ៉ាងតឹងរ៉ឹង ហើយបើកម្រិតធូលីនៅតែកើនឡើងខ្ពស់ លោកនឹងប្រកាសឱ្យពលរដ្ឋធ្វើការពីផ្ទះ (Work From Home) ខណៈអ្នកហាត់ប្រាណនៅតាមទីសាធារណៈត្រូវផ្អាកសិន ។

ចំណែកសំណើសុំប្រើប្រាស់រថយន្តបាញ់ទឹកនោះ វាអាចជួយបានមួយកម្រិតប៉ុណ្ណោះ ប៉ុន្តែមិនអាចដោះស្រាយបញ្ហាបានទេ ព្រោះនៅពេលឈប់បាញ់ទឹក កម្រិតធូលីនឹងច្រើនដូចមុន ។ នៅឆ្នាំ២០២៣ មានអ្នកប្រើប្រាស់រថយន្តអគ្គិសនីកាន់តែច្រើន ប៉ុន្តែវាមិនអាចកាត់បន្ថយបរិមាណផ្សែងខ្មៅបានទេ ដោយសារការប្រើប្រាស់រថយន្តម៉ាស៊ូតក្នុងផ្នែកពាណិជ្ជកម្ម ។

អ្នកសារព័ត៌មានបានសួរទៅកាន់លោក Chatchart Sitthiphan អភិបាលក្រុងបាងកកថា នៅពេលព្រឹក ក្រោយពីលោកបានរត់ហាត់ប្រាណ តើលោកបានឃើញកម្រិតធូលីនៅពេលព្រឹកដែរឬទេ? លោកអភិបាលក្រុងឆ្លើយថា ៖ «ពេលនេះ កម្រិតធូលី PM 2.5 ធ្ងន់ធ្ងរណាស់ ។ ដូច្នេះ យើងគួរតែផ្លាស់ប្តូរវិធីហាត់ប្រាណមកហាត់នៅក្នុងក្លិបហាត់ប្រាណវិញ» ៕ ប្រភព ៖ Amarin News

ប្រទេសជប៉ុន៖ រដ្ឋមន្ត្រីជប៉ុន ៤ រូបបានដាក់ពាក្យលាលែងពីតំណែងបន្ទាប់ពីរងការចោទប្រកាន់ថាជាប់ពាក់ព័ន្ធនឹងករណីសូកប៉ាន់ចំនួន ៣,៤ លានដុល្លារអាមេរិក ដែលធ្វើឱ្យនាយករដ្ឋមន្ត្រីសោកស្ដាយចំពោះឧបទ្ទវហេតុនេះយ៉ាងខ្លាំង ក៏ដូចជាបានសន្យាថានឹងស្តារជំនឿរបស់ប្រជាជនមកលើរដ្ឋាភិបាលនេះឡើងវិញ។

យោងតាមគេហទំព័រអន្តរជាតិ South China Morning Post ដែលបានរាយការណ៍នៅថ្ងៃទី១៤ ខែធ្នូថ្មីៗនេះថា រដ្ឋមន្ត្រីចំនួនបួននៅក្នុងរដ្ឋាភិបាលរបស់នាយករដ្ឋមន្ត្រីជប៉ុន Fumio Kishida បានដាក់លិខិតលាលែងពីតំណែង បន្ទាប់ពីរងការចោទប្រកាន់ថាជាប់ពាក់ព័ន្ធនឹងសំណូកសរុប ៥០០ លានយ៉េន (ប្រមាណ ៣,៤ លានដុល្លារអាមេរិក)។

អ្នកទាំង ៤ នោះរួមមាន៖ លោក Yasutoshi Nishimura រដ្ឋមន្ត្រីក្រសួងសេដ្ឋកិច្ច និងឧស្សាហកម្ម, លោក Junji Suzuki រដ្ឋមន្ត្រីក្រសួងកិច្ចការផ្ទៃក្នុង, លោក Ichiro Miyashita រដ្ឋមន្ត្រីក្រសួងកសិកម្ម និងលោក Hi. Rokazu Matsuno អគ្គលេខាធិការគណៈរដ្ឋមន្ត្រី បានដាក់លិខិតលាលែងពីតំណែងទៅនាយករដ្ឋមន្ត្រីជប៉ុននៅព្រឹកថ្ងៃព្រហស្បតិ៍។ ដូចគ្នានេះដែរសម្រាប់អនុរដ្ឋមន្ត្រី ៥ នាក់ផ្សេងទៀតក៏នឹងត្រូវលាលែងពីតំណែងផងដែរ។

ទោះជាយ៉ាងណាក៏ដោយ បច្ចុប្បន្នមានទាន់មានលទ្ធផលក្នុងការផ្លាស់ប្តូររដ្ឋាភិបាលថ្មីទេ ដោយសារនាយករដ្ឋមន្ត្រីជប៉ុនមិនទាន់សម្រេចថានឹងអនុម័តលិខិតលាលែងនេះឬក៏អត់។

គួរបញ្ជាក់ដែរថា រដ្ឋមន្ត្រីទាំងបួនរូបនេះត្រូវបានដឹកនាំដោយលោក Shinzo Abe ដែលជាអតីតនាយករដ្ឋមន្ត្រីជប៉ុន ហើយត្រូវបានគេហៅថា “Abe Group” ដែលជាក្រុមផ្តល់ប្រាក់រង្វាន់ដល់សមាជិករបស់ខ្លួន ពីព្រឹត្តិការណ៍រៃអង្គាសប្រាក់ដែលរៀបចំដោយក្រុមភាគតិចនៃគណបក្ស។

ទន្ទឹមនឹងនេះ នាយករដ្ឋមន្ត្រីជប៉ុនក៏បានចេញមុខក្នុងបទសម្ភាសមួយថា លោកពិតជាសោកស្ដាយចំពោះឧបទ្ទវហេតុនេះខ្លាំងណាស់ ហើយលោកក៏បានសន្យាថានឹងស្តារជំនឿរបស់ប្រជាជនមកលើរដ្ឋាភិបាលនេះឡើងវិញផងដែរ៕

ប្រទេសនានានៅលើពិភពលោក បានផ្តល់ប្រាក់ឈ្នួលអប្បបរមាឱ្យពលរដ្ឋមិនដូចគ្នាទេ ហើយមិនមែនគ្រប់ប្រទេសសុទ្ធតែផ្តល់ប្រាក់ឈ្នួលអប្បបរមាសមស្របនឹងការចំណាយក្នុងជីវភាពរស់នៅរបស់ពលរដ្ឋទេ ។ លើសពីនេះ មានប្រទេសចំនួន១០ នៅលើពិភពលោក បានផ្តល់ប្រាក់ឈ្នួលទាបបំផុតឱ្យពលរដ្ឋរបស់ខ្លួន ។

គេហទំព័រមួយឈ្មោះ Velocity Global បានផ្សព្វផ្សាយអំពីប្រាក់ឈ្នួលអប្បបរមាប្រចាំខែរបស់បុគ្គលិក ដែលពួកគេទទួលបានក្នុងប្រទេសនីមួយៗនៅទូទាំងពិភពលោក ក្នុងនោះមានប្រទេសចំនួន១០ ដែលផ្តល់ប្រាក់ឈ្នួលទាបបំផុតឱ្យពលរដ្ឋ រួមមាន ៖

១-ប្រទេសនីហ្សេរីយ៉ា ៖ ប្រាក់ឈ្នួលអប្បបរមាស្មើនឹង ៦៥ដុល្លារអាមេរិកក្នុង១ខែ

២-ប្រទេសអ៊ូសបេគីស្ថាន ៖ ប្រាក់ឈ្នួលអប្បបរមាស្មើនឹង ៨៦ដុល្លារអាមេរិកក្នុង១ខែ

៣-ប្រទេសឥណ្ឌា ៖ បើតាមច្បាប់កំណត់ គឺប្រាក់ឈ្នួលអប្បបរមាស្មើនឹង ៦៥ដុល្លារអាមេរិកក្នុង១ខែ ។ ប៉ុន្តែប្រាក់ឈ្នួលនេះនឹងខុសៗគ្នាអាស្រ័យលើជំនាញ និងក្រុមហ៊ុន

៤-ប្រទេសប៉ាគីស្ថាន ៖ ប្រាក់ឈ្នួលអប្បបរមាស្មើនឹង ១១២ដុល្លារអាមេរិកក្នុង១ខែ

៥-ប្រទេសកាហ្សាក់ស្ថាន ៖ ប្រាក់ឈ្នួលអប្បបរមាស្មើនឹង ១៥៦ដុល្លារអាមេរិកក្នុង១ខែ

៦-ប្រទេសអាមេនី ៖ ប្រាក់ឈ្នួលអប្បបរមាស្មើនឹង ១៩៥ដុល្លារអាមេរិកក្នុង១ខែ

៧-ប្រទេសហ្វីលីពីន ៖ ប្រាក់ឈ្នួលអប្បបរមានៅប្រទេសហ្វីលីពីនខុសៗគ្នាទៅតាមតំបន់ គឺចាប់ពី ៥ដុល្លារអាមេរិក ទៅ ១០ដុល្លារអាមេរិកក្នុង១ថ្ងៃ ឬស្មើប្រមាណ ២១៥ដុល្លារអាមេរិកក្នុង១ខែ

៨-ប្រទេសអ៊ុយក្រែន ៖ ប្រាក់ឈ្នួលអប្បបរមាស្មើនឹង ១៨១ដុល្លារអាមេរិកក្នុង១ខែ

៩-ប្រទេសវៀតណាម ៖ វៀតណាមបានរៀបចំប្រព័ន្ធប្រាក់ឈ្នួលអប្បបរមា ចំនួន២ប្រភេទ រួមមាន ៖
-ប្រាក់ឈ្នួលអប្បបរមាប្រចាំខែ សម្រាប់មន្ត្រីរាជការ គឺចាប់ពី ៦៤ដុល្លារអាមេរិក
-ប្រាក់ឈ្នួលអប្បបរមាប្រចាំខែ សម្រាប់បុគ្គលិកក្រុមហ៊ុនឯកជន គឺចាប់ពី ១៣៨ដុល្លារអាមេរិក រហូតដល់ ១៩៩ដុល្លារអាមេរិក និង

១០-ប្រទេសឥណ្ឌូណេស៊ី ៖ ប្រាក់ឈ្នួលអប្បបរមាប្រចាំខែនៅឥណ្ឌូណេស៊ីខុសៗទៅតាមខេត្តនីមួយៗ គឺចាប់ពី ១២៦ដុល្លារអាមេរិក រហូតដល់ ៣១៦ដុល្លារអាមេរិកក្នុង១ខែ

ចំណែកប្រទេសថៃ មានប្រាក់ឈ្នួលអប្បបរមាជាមធ្យមស្មើនឹង ១០ដុល្លារអាមេរិកក្នុង១ថ្ងៃ (ឬស្មើ ៣៥៤បាត) ។ ដូច្នេះ វាស្មើនឹង ២៦១ដុល្លារអាមេរិកក្នុង១ខែ (ឬស្មើ ៩.៣៥០បាត) ៕ ប្រភព ៖ khaosod