បុរសម្នាក់ជាជនជាតិបរទេស វ័យជាង៦០ឆ្នាំម្នាក់ សង្ស័យបែកថ្នាំ រត់ចេញពីសណ្ឋាគារនៅផ្លូវ១៣៦ ហើយរត់ចូលរថយន្តដែលកំពុងតែ បើកបរតាមផ្លូវសាធារណៈ បង្កអោយផ្អើលដល់សមត្ថកិច្ច ចុះមកឃាត់ខ្លាចមានគ្រោះថ្នាក់ ដោយហេតុការណ៍នេះបានកើតឡើង កាលពីវេលាម៉ោង 2និង10នាទីរំលងអាធាត្រឈានចូលថ្ងៃទី២១ ខែឧសភា ឆ្នាំ២០១៨ តាមបណ្តោយផ្លូវព្រះសីហនុ នៅចំណុចក្បែរនឹងរង្វង់មូល សម្តេចជួនណាត ស្ថិតនៅក្នុងសង្កាត់ទន្លេបាសាក់ ខណ្ឌចំការមន។
សាក្សីដែលឃើញហេតុការណ៍ បានអោយដឹងថា មុនពេលកើតហេតុ គេបានឃើញបុរសម្នាក់ ជាជនជាតិបរទេសមិនស្គាល់អត្តសញ្ញាណ វ័យជាង៦០ឆ្នាំ អត់ពាក់អាវមានរូបរាងស្គមស្គាំង សង្ស័យបែកថ្នាំ បានជារត់ចេញពីសណ្ឋាគារនៅតាមផ្លូវ១៣៦ សង្កាត់ផ្សារកណ្តាល១ ខណ្ឌដូនពេញ ហើយព្យាយាមរត់ចូលរថយន្ត ដែលកំពុងតែធ្វើដំណើរ តាមដងផ្លូវ ព្រមទាំងកាន់ដែកកែច្នៃ មួយនៅជាប់នឹងដៃ ដោយរត់តាំងពីវត្តភ្នំ រហូតដល់ជិតរង្វង់មូល សម្តេចជួនណាត បង្កអោយមានការភ្ញាក់ផ្អើល ទៅដល់សមត្ថកិច្ច ប៉ុស្តិ៍ទន្លេបាសាក់ មកជួយអន្តរាគមន៍ឃាត់គាត់ កុំអោយរត់ចូលឡានទៀត នឹងលួងលោមគាត់អោយប្រាប់ក ន្លែងស្នាក់នៅរបស់គាត់ អស់រយះពេលជិតកន្លះម៉ោង ទើបយល់ព្រម ប្រាប់លេខទូរស័ព្ទម៉ូយម៉ូតូ ដែលតែងតែឌុបគាត់ ។
ពេលម៉ូយម៉ូតូឌុបគាត់ មកដល់កន្លែងកើតហេតុ បានប្រាប់ថា ជនជាតិបរទេសខាងលើនេះ បានឈ្លោះគ្នាជាមួយមិត្តស្រីគាត់ ហើយក៏រត់ចេញ ពីលើសណ្ឋាគារតែម្តង ហើយសមត្ថកិច្ចឆែកនៅក្នុងកាបូបគាត់ មើលឃើញមានតែកុំទ្យូទ័រមួយគ្រឿងនិងស្រាមួយដបតែប៉ុណ្ណោះ។ ក្រោយពេលកើតហេតុ ម៉ូតូឌុបក៏បានដឹកជនជាតិបរទេសនោះ ត្រឡប់ទៅសណ្ឋាគាររបស់គាត់វិញ ៕
