រាជធានីភ្នំពេញ៖ ក្រោយពីការឃុំខ្លួន មួយរយៈក្នុងពន្ធនាគាររួចមក លោក កូយ សៅ ចៅក្រមស៊ើបសួរសាលាដំបូង រាជធានីភ្នំពេញ បានធ្វើការសាកសួរអ្នកបំរើ នៅផ្ទះរបស់ជនរងគ្រោះ នៅថ្ងៃ២៦ មេសា ២០១៨នេះ ជុំវិញករណីឃាតកម្មលើរូប អ្នកនាង ចេវ សុវឌ្ឍនា ហើយជាលទ្ធផលនៃការសាកសួរនេះ គឺខាងមន្ត្រីតុលាការអះអាងថា នេះជារឿងសម្ងាត់ មិនអាចទម្លាយឲ្យដឹងជាសាធារណៈនោះឡើយ ។
គួររំលឹកដែរថា ចៅក្រមស៊ើបសួរ សាលាដំបូងរាជធានីភ្នំពេញ លោក កូយ សៅ បានសម្រេចចេញដីការឃុំខ្លួន លោក ឡាយ វណ្ណៈ អតីតអភិបាលខេត្តតាកែវ និងបក្ខពួក៣នាក់ទៀត និងសម្រេចឃុំខ្លួនជាបណ្តោះអាសន្ន កាលពីថ្ងៃទី៣ មេសា ២០១៨ ហើយបានសម្រេចដោះលែង មនុស្ស២នាក់ផ្សេងទៀត ឲ្យមានសេរីភាពឡើងវិញផងដែរ ដោយសារតែមិនជាប់ពាក់ព័ន្ធ ទៅនិងករណីខាងលើនេះ ។
ដោយឡែក អ្នកនាំពាក្យអយ្យការ អមសាលាដំបូងរាជធានីភ្នំពេញ លោក លី សុផាណា បានថ្លែងប្រាប់ថា អយ្យការបានសម្រេចបើកការស៊ើបសួរ ដោយចោទប្រកាន់ទៅលើ ឈ្មោះ ឡាយ វណ្ណៈ និងឈ្មោះ ឡាយ ណារិទ្ធ ពីបទឃាតកម្ម តាមមាត្រា១៩៩ នៃក្រមព្រហ្មទណ្ឌ ហើយចោទប្រកាន់ទៅលើ ឈ្មោះ ម៉េន សាម៉ៃ និងឈ្មោះ ជឹម វុធ ពីបទលាក់បាំងតម្រុយ តាមមាត្រា៥៣២ នៃក្រមព្រហ្មទណ្ឌ ។
យោងតាមច្បាប់ក្រមព្រហ្មទណ្ឌ បានចែងថា មាត្រា១៩៩៖ បទឃាតកម្ម៖ អំពើសម្លាប់មនុស្សដោយចេតនា ដោយប្រើអាវុធ ឬមិនប្រើអាវុធ ដោយគ្មានស្ថានទម្ងន់ណាមួយដូចបានកំណត់ក្នុងមាត្រា២០០ (បទឃាតកម្មគិតទុកជាមុន) ដល់មាត្រា២០៥ (បទឃាតកម្មដោយមានទារុណកម្ម អំពើឃោរឃៅ ឬអំពើរំលោភសេពសន្ថវៈ) នៃក្រមនេះ គឺជាឃាតកម្ម។ ឃាតកម្មត្រូវផ្ដន្ទាទោសដាក់ពន្ធនាគារពី ១០(ដប់)ឆ្នាំ ទៅ១៥(ដប់ប្រាំ)ឆ្នាំ។
មាត្រា៥៣២៖ បទលាក់បំបាំងតម្រុយ៖ អំពើកែប្រែ លុបបំបាត់ ឬលាក់បំបាំងតម្រុយ ឬស្លាកស្នាម នៅលើទីកន្លែងនៃបទឧក្រិដ្ឋ ឬបទមជ្ឈិម ក្នុងគោលបំណងធ្វើជាឧបសគ្គ ដល់ការស្វែងរកឲ្យឃើញនូវការពិត ត្រូវផ្ដន្ទាទោសដាក់ពន្ធនាគារពី ១(មួយ)ឆ្នាំ ទៅ៣(បី)ឆ្នាំ និងពិន័យជាប្រាក់ពី ២,០០០,០០០(ពីរលាន)រៀល ទៅ៦,០០០,០០០(ប្រាំមួយលាន)រៀល៕
