ខេត្តបាត់ដំបង៖ ស្រ្ដី២នាក់ជាថៅកែហាង និងបុគ្គលិក ទើបនឹងចេញពីផឹកស្រវឹង បានបើកម៉ូតូយ៉ាងលឿន ជ្រុលចង្កូតទៅបុកគ្នា ជាមួយនឹងម៉ូតូមួយគ្រឿងទៀត ពេញទំហឹង បណ្ដាលឲ្យរងរបួសធ្ងន់ទាំងសងខាង កាលពីវេលាម៉ោង ៩និង៤០នាទីយប់ ថ្ងៃទី២៥ ខែមេសា ឆ្នាំ២០១៨ នៅក្នុងភូមិរំចេក១ សង្កាត់រតនៈ ក្រុងបាត់ដំបង។
ប្រភពព័ត៌មាន បានឲ្យដឹងថា ម៉ូតូបង្ក ម៉ាកឃ្លីក ពណ៌ស ស៊េរី២០១៨ ពាក់ស្លាកលេខ បាត់ដំបង 1AC-0904 បើកបរដោយ ឈ្មោះ ឃ្លាំង ហេង ហៅ មុំ ភេទស្រី អាយុ៣១ឆ្នាំ មុខរបរជាបុគ្គលិក នៃអាហារដ្ឋានមួយកន្លែង ស្ថិតនៅចំណុចចុងតាកុក ស្ថិតក្នុងភូមិរំចេក១ សង្កាត់រតនៈ មានលំនៅក្នុងភូមិថ្នល់បំបែក ឃុំអន្លង់វែង ស្រុកអន្លង់វែង ខេត្តឧត្តរមានជ័យ និងអ្នករួមដំណើរជាមួយ ឈ្មោះ កង តឿ ភេទស្រី អាយុ៣១ឆ្នាំ មុខរបរជាថៅកែ អាហារដ្ឋានខាងលើ មានលំនៅក្នុងភូមិជ្រៃកោង សង្កាត់ស្លាកែត ក្រុងបាត់ដំបង ខេត្តបាត់ដំបង។ រីឯម៉ូតូមួយគ្រឿងទៀត ម៉ាកស៊ុយហ្ស៊ុយគីវីវ៉ា ពណ៌ខ្មៅ គ្មានស្លាកលេខ មិនស្គាល់ឈ្មោះអ្នកបើកបរ។
ប្រភពព័ត៌មានដដែល បានបន្តថា មុនពេលកើតមាន នូវគ្រោះថ្នាក់ចរាចរណ៍នោះ គេឃើញស្រ្ដី២នាក់ ដែលជាបុគ្គលិក និងថៅកែហាង បានជិះម៉ូតូមួយគ្រឿង ទាំងសភាពស្រវឹងជោកជាំ។ លុះពេលពួកគាត់ធ្វើដំណើរ មកដល់ចំណុចកើតហេតុ ក៏ជ្រុលចង្កូតទៅបុកម៉ូតូមួយគ្រឿងទៀត ដែលបើកបញ្ច្រាសទិសគ្នា ពេញទំហឹង ដួលរដូករណែល បណ្ដាលសឲ្យរងរបួសទាំងសងខាង។
ក្រោយពេលកើតហេតុ ភាគីខាងម៉ូតូវីវ៉ាត្រូវបងប្អូន បញ្ជូនទៅកាន់មន្ទីរពេទ្យ មុនពេលសមត្ថកិច្ចចុះទៅដល់។ ចំណែកស្រ្ដីទាំង២នាក់ខាងលើ ត្រូវមន្ត្រីនគរបាល ចរាចរផ្លូវគោកខេត្ត វាស់កម្រិតជាតិអាល់កុល ប៉ុន្តែពួកគាត់មិនអាចផ្លុំកើត ដោយសារតែមាត់បែកខ្លាំងពេក។
បន្ទាប់មកសមត្ថកិច្ច បានបញ្ជូនពួកគាត់ទៅកាន់ មន្ទីរពេទ្យវិសាលសុខ ហើយត្រូវបានគ្រូពេទ្យអះអាងថា ស្រ្ដីទាំង២នាក់នេះ ធុំក្លិនស្រាខ្លាំងណាស់។ ដោយឡែកម៉ូតូទាំង២គ្រឿងខាងលើ ត្រូវមន្រ្ដីការិយាល័យ នគរបាលចរាចរណ៍ផ្លូវគោក ខេត្តបាត់ដំបង វាស់វែង និងយកទៅរក្សាទុក ដើម្បីរង់ចាំចាត់ការបន្តនីតិវិធី៕
