ខេត្តកណ្តាល៖ យុវជនម្នាក់បានប្រើល្បិចនាំស្រីស្នេហ៍ជាអនីតិជន ទៅលេងល្បែកផ្កាប់ផ្ងារអស់មួយយប់ ក៏ត្រូវម្ដាយរបស់នាងប្ដឹងទៅសមត្ថកិច្ចឲ្យចុះទៅឃាត់ខ្លួន កាលពីរសៀល ថ្ងៃទី២៤ ខែមេសា នៅក្នុងភូមិស្តៅកន្លែង៥ ឃុំដីឥដ្ឋ ស្រុកកៀនស្វាយ។
បើតាមសម្ដីរបស់ជនរងគ្រោះបានឲ្យដឹងថា នាង និងជនសង្ស័យធ្លាប់មានទំនាក់ទំនងស្នេហានឹងគ្នា រហូតក្លាយទៅជាសង្សារ។ លុះមកដល់ថ្ងៃទី២២ ខែមេសា ឆ្នាំ២០១៨ សង្សាររបស់នាង (ជនសង្ស័យ) បានចុចទូរស័ព្ទមកបបួលនាងទៅលេងផ្ទះមិត្តភក្តិរបស់គេម្នាក់ ឈ្មោះ អុន រស់នៅភូមិស្តៅកន្លែង៥ ឃុំដីឥដ្ឋ ស្រុកកៀនស្វាយ ហើយនាងក៏បានយល់ព្រមទៅជាមួយ។ នៅពេលឮថានាងយល់ព្រម ជនសង្ស័យក៏បានជិះម៉ូតូទៅដឹកនាងទៅផ្ទះមិត្តរបស់គេ ហើយនិយាយគ្នាលេងនៅទីនោះមួយសន្ទុះធំ។ បន្ទាប់មកនាងបានប្រាប់ជនសង្ស័យឲ្យជូននាងត្រឡប់ទៅផ្ទះវិញ តែជនសង្ស័យបានប្រាប់នាងថា «យប់ហើយ នៅដេកទីនេះជាមួយគ្នាមួយយប់ទៅ»។
ជនរងគ្រោះ បានបន្តថា ក្រោយមកជនសង្ស័យបាននាំនាងទៅដេកនៅលើគ្រែ នៅខាងក្រោមផ្ទះរបស់មិត្តភក្ដិរបស់គេ។ ស្របពេលយប់ស្ងាត់ មិនមានអ្នកណានៅជិតផងនោះ ជនសង័្សយក៏បានរួមភេទជាមួយនាងបានសម្រេចមួយដង។ លុះដល់ពេលយប់ជ្រៅ គេក៏ចង់រួមភេទម្ដងទៀត តែត្រូវនាងបដិសេធ ទើបគេសម្ងំនៅស្ងៀម ហើយដេកឱបនាង រហូតដល់វេលាម៉ោង៤ទៀតភ្លឺ ថ្ងៃទី២៣ ខែមេសា ទើបជនសង្ស័យជូននារីរងគ្រោះត្រឡប់ទៅផ្ទះវិញ។ នៅពេលនោះ ម្ដាយរបស់នាងបានជជីកសួរ ទើបនាងរៀបរាប់តាមដំណើររឿងទៅ។ លុះមកដល់វេលាម៉ោង២រសៀល ថ្ងៃទី២៤ ខែមេសា ឆ្នាំ២០១៨ ម្តាយរបស់នាងបានទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលដីឥដ្ឋ ដើម្បីសុំឲ្យសមត្ថកិច្ចចាត់ការលើជនសង្ស័យ។
មន្ត្រីនគរបាលស្រុកកៀនស្វាយ បានឲ្យដឹងថា ជនសង្ស័យជាប់ពាក់ព័ន្ធនឹងករណីរួមភេទជាមួយនឹងអនីតិជន ហើយត្រូវសមត្ថកិច្ចឃាត់ខ្លួននោះ ឈ្មោះ ស៊ុយ រតនា អាយុ២០ឆ្នាំ មុខរបរជាកម្មករ មានលំនៅក្នុងភូមិស្រែអំពិល ឃុំឈើទាល ស្រុកកៀនស្វាយ។ រីឯជនរងគ្រោះ ឈ្មោះ ក គ អាយុ១៥ឆ្នាំ រស់នៅក្នុងខេត្តកណ្ដាល។
មន្ត្រីនគរបាលដដែល បានបន្តថា បន្ទាប់ពីមានពាក្យបណ្ដឹងពីអាណាព្យាបាលរបស់ជនរងគ្រោះភ្លាម សមត្ថកិច្ចបានចុះទៅឃាត់ខ្លួនជនសង្ស័យនាំមកសាកសួរតាមនីតិវិធី។ នៅពេលនោះ ជនសង្ស័យសារភាពថា ខ្លួនពិតជាបាននាំសង្សាររបស់គេមករួមភេទប្រាកដមែន»។ ប៉ុន្តែក្រោយពេលចាប់ខ្លួន ក្រុមគ្រួសារជនសង្ស័យបានព្យាយាមផ្សះផ្សាជាមួយនឹងម្តាយជនរងគ្រោះ ដោយលើកហេតុផលថា «កូនៗស្រលាញ់គ្នា ហើយអង្ករក្លាយទៅជាបាយទៅហើយ គួរតែរៀបការឲ្យពួកគេទៅ»។ ដោយឡែកម្តាយរបស់ជនរងគ្រោះ ហាក់មានបំណងចង់ឲ្យកូនជួបគ្នាដែរ ប៉ុន្តែអ៊ំរបស់ជនរងគ្រោះបានជំទាស់ ដោយផ្អែកថា ក្មួយរបស់គាត់នៅក្មេង មិនទាន់គ្រប់អាយុត្រូវរៀបការទេ»។
មន្ត្រីនគរបាលដដែល បានបន្តថា ទោះជាយ៉ាងណា ជនសង្ស័យនៅតែទទូចសុំឲ្យឪពុកម្តាយរបស់ខ្លួន សម្របសម្រួលជាមួយម្តាយខាងស្រីដើម្បីបើកផ្លូវឲ្យពួកគេទាំងពីរនាក់បានជួបគ្នា។ ប៉ុន្តែគិតពីផ្លូវច្បាប់វិញ គឺវាសនារបស់ជនសង្ស័យ គេចមិនផុតពីគុកនោះទេ តែបើមាការយោគយល់ពីរាម្តាយខាងស្រីជាអ្នកសំរេច ទើបអាចសង្ឃឹមខ្លះ៕
