ខេត្តបាត់ដំបង៖ ជនសង័្សយ២នាក់បានលបចូលទៅគាស់ផ្ទះមន្ត្រីយោធាម្នាក់ លួចបានកាំភ្លើងអាកា៤៧មួយដើម និងទ្រព្យសម្បត្តិមួយចំនួន ហើយរត់គេចខ្លួនបានរយៈពេលជាង១ឆ្នាំ ក៏អស់លក្ខណ៍ត្រូវសមត្ថកិច្ចឃាត់ខ្លួន បញ្ជូនទៅកាន់តុលាការ នៅព្រឹក ថ្ងៃទី២៥ ខែមេសា ឆ្នាំ២០១៨នេះ ដើម្បីផ្ដន្ទាទោសតាមច្បាប់។
មន្រ្ដីនគរបាលស្រុករតនមណ្ឌល បានឲ្យដឹងថា ជនជាប់ចោទដែលសមត្ថកិច្ចឃាត់ខ្លួន ទី១-ឈ្មោះ លៀង មករា ហៅប្រុស អាយុ៣៤ឆ្នាំ រស់នៅភូមិអូរតាទៀក ឃុំតាតោក ស្រុកសំឡូត និងទី២-ឈ្មោះ មុត លី អាយុ៤១ឆ្នាំ រស់នៅភូមិរំជៃ ឃុំស្នឹង ស្រុកបាណន់។ រីឯការឃាត់ខ្លួនជនជាប់ចោទខាងលើនេះ គឺសមត្ថកិច្ចធ្វើឡើង តាមដីកាលេខ២៧ ផព្រទ ចុះថ្ងៃទី០៣ ខែមេសា ឆ្នាំ២០១៨ ចេញដោយលោក ប៉ង់ ចាន់យុសុទ្ធារា ព្រះរាជ្ញារងអមសាលាដំបូងខេត្ត បានចោទប្រកាន់ជនជាប់ចោទទាំង២នាក់នេះ ពីបទគាស់ទម្លុះទម្លាយលំនៅឋានមន្ត្រីយោធាម្នាក់ ដែលបានប្រព្រឹត្ត កាលពីយប់ ថ្ងៃទី០៧ ខែកុម្ភៈ ឆ្នាំ២០១៧ នៅក្នុងភូមិតាសាញត្បូង ឃុំតាសាញ ស្រុកសំឡូត ខេត្តបាត់ដំបង។
មន្រ្ដីនគរបាលដដែល បានបន្តថា កាលពីយប់ ថ្ងៃទី០៧ ខែកុម្ភៈ ឆ្នាំ២០១៧ ជនសង័្សយទាំង២នាក់ បាននាំគ្នាចូលទៅលគាស់ទម្លុះទម្លាយផ្ទះរបស់មន្រ្តីយោធាម្នាក់ នៅក្នុងភូមិតាសាញត្បូង ឃុំតាសាញ ស្រុកសំឡូត ខេត្តបាត់ដំបង ដោយលួចបានកាំភ្លើង AK៤៧ មួយដើម និងទ្រព្យសម្បត្តិមួយចំនួនទៀត។ បន្ទាប់ពីប្រព្រឹត្តនូវបទល្មើសរួចហើយ ជនសង័្សយបានរត់គេចខ្លួនបាត់រហូត។ ដោយឡែកមន្ត្រីយោធារងគ្រោះវិញ បន្ទាប់ពីកើតមាននូវករណីចោរគាស់ផ្ទះ លួចទ្រព្យសម្បត្តិ និងកាំភ្លើងរបស់ខ្លួនហើយ គាត់ក៏បានដាក់ទៅពាក្យបណ្ដឹង សុំឲ្យសមត្ថកិច្ចពាក់ព័ន្ធ ជួយស្រាវជ្រាវស្វែងរក ចាប់ខ្លួនជនដៃដល់ ដើម្បីនាំមកផ្ដន្ទាទោសតាមច្បាប់។
មន្ត្រីនគរបាលដដែល បានបន្តថា ក្រោយពេលមានពាក្យបណ្ដឹងពីជនរងគ្រោះ សមត្ថកិច្ចជំនាញក៏បានស្រាវជ្រាវ និងបានកំណត់មុខសញ្ញារបស់ជនសង័្សយ ហើយសហការគ្នាជាមួយនឹងសមត្ថកិច្ចពាក់ព័ន្ធ នៅតាមបណ្ដាខេត្ត និងស្រុកនានា។ លុះមកដល់ថ្ងៃទី២៣ ខែមេសា ឆ្នាំ២១០៨ សមត្ថកិច្ចបានប្រទះឃើញ និងចាប់ខ្លួនជនសង័្សយ នៅភូមិបឹងអំពិល ឃុំបឹងអំពិល ស្រុករតនមណ្ឌល ខេត្តបាត់ដំបង។
លោកឧត្តមសេនីយ៍ត្រី ជេត វណ្ណនី ស្នងការរងខេត្តបាត់ដំបង បានមានប្រសាសន៍ថា បន្ទាប់ពីចាប់ខ្លួនជនសង័្សយបានហើយ លោកស្នងការខេត្ត ក្រោមការឯកភាពពីស្ថាប័នអយ្យការ បានបញ្ជាឲ្យកម្លាំងក្រុមអន្តរាគមន៍បង្ការ បង្ក្រាប នៃស្នងការដ្ឋាននគរបាលខេត្តបាត់ដំបង ចុះឆែកឆេរលំនៅឋានរបស់ជនជាប់ចោទទាំង២នាក់ រកឃើញអាវុធមួយដើម ម៉ាកAK47 មានបង់មួយ និងគ្រាប់បែកមួយគ្រាប់ផងដែរ។
លោកស្នងការរងបានបញ្ជាក់ថា កាំភ្លើងអាកាដែលដកហូតបាននោះ គឺមិនមែនជាកាំភ្លើងដែលជនជាប់ចោទលួចបានពីក្នុងផ្ទះមន្ត្រីយោធា នៅស្រុកសំឡូតនោះទេ គឺជាកាំភ្លើងផ្សេង។ រីឯគ្រាប់បែកត្រូវឈ្មោះ មុត លី លាក់ទុកនៅក្នុងដើមឈើ ដែលយើងមិនអាចយកចេញបានទេ ព្រោះគ្រាប់បែកមានសភាពច្រែះចាប់ អាចបង្កគ្រោះថ្នាក់ ហើយពេលនេះគ្រាប់បែកនោះ លោកបានប្រគល់ទៅឲ្យខាងអង្គភាពកម្ចាត់មីន ជាអ្នកដោះស្រាយ។
ក្រោយពេលឃាត់ខ្លួនរួច សមត្ថកិច្ចជំនាញបានបញ្ជូនជនសង័្សយទៅកាន់ស្នងការដ្ឋាននគរបាលខេត្ត ដើម្បីកសាងសំណុំរឿង បញ្ជូនទៅកាន់តុលាការ នៅព្រឹក ថ្ងៃទី២៥ ខែមេសា ឆ្នាំ២០១៨នេះ ចាត់ការតាមច្បាប់៕
