ខេត្តសៀមរាប៖ ថៅកែលក់គ្រឿងបន្លាស់រថយន្តម្នាក់ ត្រូវឃាតករចាក់សម្លាប់ ប្លន់យកទ្រព្យសម្បត្តិ ហើយសាកសពរបស់ជនរងគ្រោះ ត្រូវគេប្រទះឃើញ បង្កឲ្យភ្ញាក់ផ្អើលឡើង កាលពីព្រឹក ថ្ងៃទី២៤ ខែមេសា ឆ្នាំ២០១៨ ស្ថិតក្នុងក្រុមទី៩ ភូមិក្រួស សង្កាត់ស្វាយដង្គំ ក្រុងសៀមរាប។
លោកឧត្តមសេនីយ៍ត្រី ទិត្យ ណារ៉ុង ស្នងការខេត្តសៀមរាប បានឲ្យដឹងថា ជនរងគ្រោះ ឈ្មោះ ពិត បារាំង ភេទប្រុស អាយុ៤៩ឆ្នាំ មុខរបរលក់គ្រឿងរថយន្ត ស្នាក់នៅក្រុមទី៩ ភូមិក្រួស សង្កាត់ស្វាយដង្គំ ក្រុងសៀមរាប។
លោកឧត្តមសេនីយ៍ត្រី ទិត្យ ណារ៉ុង ស្នងការខេត្តសៀបរាប បានឱ្យដឹងជាបឋមថា អំពើឃាតកម្មខាងលើ អាចជាករណីឃាតកម្មគិតទុកជាមុន ពីព្រោះជនដៃដល់បានយកទ្រព្យសម្បត្តិអស់ជាច្រើន។ ប៉ុន្តែសមត្ថកិច្ចមិនទាន់បានដឹងចំនួនជាក់លាក់នៅឡើយទេ ហើយជនសង្ស័យអាចជាមនុស្សស្គាល់គ្នា។
ក្រោយពេលកើតហេតុ សមត្ថកិច្ចបានចុះទៅពិនិត្យ និងធ្វើកោសល្យវិច័យទៅលើសាកសព រួចហើយធ្វើកំណត់ហេតុប្រគល់សាកសពទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី។ បច្ចុប្បន្ន សមត្ថកិច្ចជំនាញកំពុងតែដុតដៃជើងស្រាវជ្រាវ ស្វែងរកចាប់ខ្លួនឃាតករ នាំមកផ្តន្ទាទោសតាមច្បាប់៕